ກຳປັ່ນໂຮງໝໍໝາຍເລກ 561 ພ້ອມກັບຄະນະປະຕິບັດງານເດີນທາງກັບຄືນປະເທດ
ກປ.ອອນໄລ - ໃນລະຫວ່າງວັນທີ 8-9 ພຶດສະພາ, ທີ່ເຂດທະເລທາງທິດເໜືອເກາະ Lombok, ອິນໂດເນເຊຍ, ກຳປັ່ນໂຮງໝໍໝາຍເລກ 561 ໄດ້ເຂົ້າຮ່ວມການຝຶກຊ້ອມ KOMODO ເທິງທະເລໃນຂອບເຂດການຝຶກຊ້ອມທະຫານເຮືອຫຼາຍຝ່າຍ KOMODO 2018 (MNEK 2018).
ກຳປັ່ນໂຮງໝໍໝາຍເລກ 561 ເຂົ້າຮ່ວມກຸ່ມຍຸດທະວິທີປະຕິບັດໜ້າທີ່ການຝຶກຊ້ອມເນື້ອໃນຊອກຫາ, ກູ້ໄພ ແລະໜູນຊ່ວຍມະນຸດສະທຳ. ກຸ່ມຍຸດທະວິທີ 18.2 ໂດຍກຳປັ່ນ Kri Sultan Iskandar Muda-367 ຂອງປະເທດເຈົ້າພາບ ອິນໂດເນເຊຍ ບັນຊາ.
ການຝຶກຊ້ອມ KOMODO ເທິງທະເລແມ່ນຂັ້ນຕອນສຸດທ້າຍໃນການຝຶກຊ້ອມ MNEK 2018. ຍ້ອນມີການກະກຽມຢ່າງລະອຽດ, ກຳລັງທະຫານເຮືອປະຊາຊົນຫວຽດນາມ ພ້ອມກັບກຳປັ່ນໂຮງໝໍໝາຍເລກ 561 ໄດ້ສົມທົບກັບທະຫານເຮືອ ແລະກຳປັ່ນບັນດາປະເທດປະຕິບັດບັນດາເນື້ອໃນຝຶກຊ້ອມເທິງທະເລຢ່າງຄົບຖ້ວນ, ຊັດເຈນ, ປະກອບສ່ວນເຂົ້າໃນຜົນງານລວມຂອງ MNEK 2018.
|
|
ທ່ານພັນເອກພິເສດ ເລຮົ່ງຈ໋ຽນ, ຮອງຜູ້ບັນຊາການທະຫານເຮືອເຂດ 4, ຫົວໜ້າຄະນະມອບໜ້າທີ່ ໃຫ້ຄະນະປະຕິບັດງານ. ພາບ: ໝີ໊ແຮ້ງ. |
ທ່ານພັນເອກພິເສດ ເລຮົ່ງຈ໋ຽນ, ຮອງຜູ້ບັນຊາການທະຫານເຮືອເຂດ 4, ຫົວໜ້າຄະນະປະຕິບັດງານໃຫ້ຮູ້: “ຄະນະປະຕິບັດງານ ແລະກຳປັ່ນໝາຍເລກ 561 ໄດ້ເຂົ້າຮ່ວມຢ່າງຕັ້ງໜ້າ, ມີຄວາມຮັບຜິດຊອບ ແລະສຳເລັດບັນດາເນື້ອໃນການຝຶກຊ້ອມທະຫານເຮືອຫຼາຍຝ່າຍ KOMODO 2018, ໄດ້ຮັບການຕີລາຄາສູງຈາກປະເທດເຈົ້າພາບ. ໝາກຜົນໃຫຍ່ຫຼວງທີ່ພວກເຮົາບັນລຸໄດ້ເມື່ອ ເຂົ້າຮ່ວມການຝຶກຊ້ອມໃນຄັ້ງນີ້ແມ່ນໄດ້ຊຸກຍູ້ການພົວພັນຮ່ວມມື, ມິດຕະພາບ, ຜ່ານນັ້ນເພີ່ມທະວີຄວາມເຂົ້າໃຈ, ຄວາມໄວ້ເນື້ອເຊື່ອໃຈກັບກຳລັງທະຫານເຮືອບັນດາປະເທດ. ພວກເຮົາຖອດຖອນບົດຮຽນໃນວຽກງານສົມທົບ, ປະສົມປະສານໃນສະພາບແວດລ້ອມຫຼາຍຝ່າຍສາກົນໄດ້ຫຼາຍທີ່ສຸດ.
ຕອນບ່າຍ 9-5, ການຝຶກຊ້ອມ MNEK 2018 ໄດ້ສິ້ນສຸດລົງຢ່າງຈົບງາມ. ຫຼັງຈາກນັ້ນ, ບັນດາກຳປັ່ນໄດ້ເດີນທາງກັບຄືນປະເທດຕາມແຜນການ.
ແປໂດຍ: ຮຸຍດົງ