ກໍາລັງປ້ອງກັນອາກາດ-ທະຫານອາກາດ ຫວຽດນາມ ແລະລາວ ເພີ່ມທະວີການຮ່ວມມື

ຕອນບ່າຍວັນທີ 26 ທັນວາ, ທີ່ສໍານັກງານກະຊວງປ້ອງກັນປະເທດຫວຽດນາມ, ທ່ານພົນໂທ ຟານວັນຢາງ, ກໍາມະການສູນກາງພັກ, ຄະນະປະຈໍາຄະນະພັກການທະຫານສູນກາງ, ຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ, ຮອງລັດຖະມົນຕີກະຊວງປ້ອງກັນປະເທດຫວຽດນາມ, ໄດ້ໃຫ້ການຕ້ອນຮັບຄະນະກົມປ້ອງກັນອາກາດ ແລະກົມທະຫານອາກາດກອງທັບປະຊາຊົນລາວ ໂດຍທ່ານພັນເອກ ໄພລັດ ພິມມະສັກ, ຫົວໜ້າກົມປ້ອງກັນອາກາດ, ເປັນຫົວໜ້າຄະນະ, ພວມມີການຢ້ຽມຢາມ ແລະເຮັດວຽກຢູ່ ຫວຽດນາມ.

ທ່ານພົນໂທ ຟານວັນຢາງ, ຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ, ຕ້ອນຮັບທ່ານພັນເອກ ໄພລັດ ພິມມະສັກ ຫົວໜ້າກົມປ້ອງກັນອາກາດກອງທັບປະຊາຊົນລາວ. ພາບ: ຮວ່າງຫວູ໊-ມີງແຄ໋ງ

ທ່ານພົນໂທ ຟານວັນຢາງ ຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ ແລະທ່ານພັນເອກ ໄພລັດ ພິມມະສັກ ຫົວໜ້າກົມປ້ອງກັນອາກາດກອງທັບປະຊາຊົນລາວ ພ້ອມບັນດາພະນັກງານກະຊວງປ້ອງກັນປະເທດສອງປະເທດ. ພາບ: ຮວ່າງຫວູ໊-ມີງແຄ໋ງ

ທ່ານພັນເອກ ໄພລັດ ພິມມະສັກ ແຈ້ງໃຫ້ທ່ານພົນໂທ ຟານວັນຢາງ ຮັບຊາບກ່ຽວກັບໝາກຜົນການເຮັດວຽກກ່ອນໜ້ານັ້ນກັບກອງບັນຊາການເຫຼົ່າທັບປ້ອງກັນອາກາດ-ທະຫານອາກາດ. ຕາມນັ້ນແລ້ວ, ສອງຝ່າຍໄດ້ຕີລາຄາໝາກຜົນແຫ່ງການຮ່ວມມືໃນໄລຍະຜ່ານມາ ແລະປຶກສາຫາລືທິດທາງການຮ່ວມມືໃນໄລຍະຈະມາເຖິງ, ໃນນັ້ນເອົາໃຈໃສ່ເປັນພິເສດເຂົ້າບັນດາຂົງເຂດແລກປ່ຽນຄະນະຜູ້ແທນ, ການບໍາລຸງສ້າງ, ການຮ່ວມມືດ້ານເຕັກນິກ.

ຕີລາຄາສູງໝາກຜົນການເຮັດວຽກ, ທ່ານພົນໂທ ຟານວັນຢາງ ຢືນຢັນວ່າ, ການນໍາກະຊວງປ້ອງກັນປະເທດຫວຽດນາມ ຍາມໃດກໍ່ສ້າງເງື່ອນໄຂສະດວກເພື່ອໃຫ້ກໍາລັງປ້ອງກັນອາກາດ-ທະຫານອາກາດສອງປະເທດຮ່ວມມືຢ່າງມີປະສິດທິຜົນ, ຮັບໃຊ້ໃຫ້ພາລະກິດປ້ອງກັນຊາດ-ປ້ອງກັນຄວາມສະຫງົບຂອງແຕ່ລະປະເທດ.

ແປໂດຍ: ເຈິ່ນຮວ່ຽນ