ການເຄື່ອນໄຫວສະເຫຼີມສະຫຼອງວັນສ້າງຕັ້ງກອງທັບປະຊາຊົນຫວຽດນາມ ຢູ່ ກໍາປູເຈຍ
ກປ.ອອນໄລ - ວັນທີ 21 ທັນວາ, ເນື່ອງໃນໂອກາດສະເຫຼີມສະຫຼອງ 73 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ, 28 ປີແຫ່ງວັນບຸນທົ່ວປວງຊົນປ້ອງກັນຊາດ ແລະ 50 ປີແຫ່ງວັນສ້າງຕັ້ງສາຍພົວພັນທາງການທູດ ຫວຽດນາມ-ກໍາປູເຈຍ, ສະຖານທູດຫວຽດນາມ, ບັນດາອົງການຄຽງຂ້າງສະຖານທູດ , ບັນດາອົງການຕາງໜ້າ, ບັນດາວິສາຫະກິດ, ນັກສຶກສາ ແລະປະຊາຄົມຊາວຫວຽດນາມ ຢູ່ ກໍາປູເຈຍ ໄດ້ຈັດຕັ້ງພິທີວາງພວງມາລາ, ຖະຫວາຍທູບທຽນທີ່ອະນຸສາວະລີມິດຕະພາບ ຫວຽດນາມ-ກໍາປູເຈຍ ຢູ່ ນະຄອນຫຼວງ ພະນົມເປັນ.
ເຂົ້າຮ່ວມພິທີມີຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ໂດຍທ່ານພົນໂທ ຫງວຽນຈິວິ້ງ, ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ນໍາໜ້າຄະນະທີ່ພວມຢ້ຽມຢາມ ແລະເຮັດວຽກຢູ່ ກໍາປູເຈຍ, ແລະຄະນະຜູ້ແທນຕາງໜ້າບັນດາເຫຼົ່າທັບ, ເຫຼົ່າຮົບຂອງກໍາລັງກອງທັບລາດຊະວົງ ກໍາປູເຈຍ.
ໃນບັນຍາກາດທີ່ເຄັ່ງຂຶມຂອງພິທີ, ບັນດາຄະນະໄດ້ສະແດງຄວາມເຄົາລົບນັບຖື, ຄວາມຮູ້ບຸນຄຸນ ແລະອາໄລຫາບັນດານັກວິລະຊົນ, ນັກຮົບເສຍສະຫຼະຊີວິດເພື່ອຊາດ ເຊິ່ງແມ່ນທະຫານອາສາສະໝັກ, ພະນັກງານ, ນັກຊ່ຽວຊານຫວຽດນາມ, ບັນດາຊາວກໍາປູເຈຍ ຜູ້ຮັກຊາດທີ່ໄດ້ເສຍສະຫຼະຊີວີດເພື່ອພາລະກິດປົດປ່ອຍ, ຊ່ວຍເຫຼືອປະຊາຊົນກໍາປູເຈຍ ໃຫ້ຫຼຸດພົ້ນອອກຈາກໄພດັບສູນເຊື້ອຊາດຂອງລະບອບຂະແມແດງ.
    |
 |
| ຄະນະຜູ້ແທນສະຖານທູດຫວຽດນາມ ປະຈໍາ ກໍາປູເຈຍ ແລະປະຊາຄົມຊາວຫວຽດນາມ ຢູ່ກໍາປູເຈຍໄວ້ອາໄລບັນດານັກວິລະຊົນ, ນັກຮົບເສຍສະຫຼະຊີວິດເພື່ອຊາດ. ພາບ: giaoduc.net.vn |
ໃນຊຸມວັນຜ່ານມາ, ຜູ້ແທນຫວຽດນາມ ແລະກໍາປູເຈຍ ຫຼາຍຄະນະໄດ້ມາຍັງອົງການທູດການທະຫານກະຊວງປ້ອງກັນປະເທດຫວຽດນາມ ເພື່ອໃຫ້ອວຍພອນວັນສ້າງຕັ້ງກອງທັບປະຊາຊົນຫວຽດນາມ ແລະວັນບຸນທົ່ວປວງຊົນປ້ອງກັນຊາດ.
ແປໂດຍ: ເກື່ອງດັ້ງ