ອິນເດຍ ສະໜັບສະໜູນຫຼັກໝັ້ນ, ຫຼັກການຂອງອາຊຽນ ກ່ຽວກັບບັນຫາທະເລຕາເວັນອອກ
ກປ.ອອນໄລ - ວັນທີ 28 ເມສາ, ກອງປະຊຸມເຈົ້າໜ້າທີ່ອາວຸໂສ (SOM) ອາຊຽນ-ອິນເດຍ ຄັ້ງທີ 23 ໄດ້ດຳເນີນຜ່ານລະບົບທາງໄກ. ທ່ານ ຫງວຽນກ໊ວກຢູງ ຮອງລັດຖະມົນຕີກະຊວງການຕ່າງປະເທດ, ຫົວໜ້າ SOM ອາຊຽນ ຫວຽດນາມ ໄດ້ເຂົ້າຮ່ວມກອງປະຊຸມ.
ກ່າວຄຳເຫັນທີ່ກອງປະຊຸມ, ທ່ານນາງ Riva Ganguly Das ຮອງລັດຖະມົນຕີກະຊວງການຕ່າງປະເທດ, ຫົວໜ້າ SOM ອິນເດຍ ຖືເປັນສໍາຄັນຕໍ່ການພົວພັນຄູ່ຮ່ວມມືຍຸດທະສາດກັບອາຊຽນ, ສະໜັບສະໜູນອາຊຽນ ສວມບົດບາດໃຈກາງໃນໂຄງປະກອບພາກພື້ນ ແລະສ້າງປະຊາຄົມ, ເພີ່ມທະວີການຮ່ວມສຳພັນ, ເຊື່ອມຕໍ່ ແລະຮັດແຄບໄລຍະຫ່າງການພັດທະນາ. ຫົວໜ້າ SOM ອິນເດຍ ຂອບອົກຂອບໃຈຕໍ່ບັນດາປະເທດອາຊຽນທີ່ໄດ້ສະແດງໃຫ້ເຫັນຄວາມສາມັກຄີ ແລະຄວາມເຫັນອົກເຫັນໃຈ, ແບ່ງປັນກັບດິນເດຍ ໃນຄວາມມານະພະຍາຍາມຮັບມືກັບພະຍາດໂຄວິດ-19 ທີ່ພວມເພີ່ມຂຶ້ນຢ່າງສັບສົນ; ພ້ອມທັງເນັ້ນໜັກວ່າ ສອງຝ່າຍຄວນສືບຕໍ່ສົມທົບກັນຢ່າງແໜ້ນແຟ້ນເພື່ອຮັບມືກັບໂລກພະຍາດ, ໂດຍສະເພາະແມ່ນແລກປ່ຽນບົດຮຽນ ແລະເຕັກໂນໂລຢີບົ່ງມະຕິ, ປິ່ນປົວພະຍາດ, ຜະລິດວັກຊິນປ້ອງກັນພະຍາດໂຄວິດ-19 ແລະຮັບປະກັນການແຈກຢາຍໃຫ້ກວ້າງຂວາງ, ເທົ່າກັນ, ກໍ່ຄືສ້າງແຜນການຕ່າງໆ ເພື່ອເປັນເຈົ້າການຮັບມືກັບໂລກພະຍາດທີ່ຈະແຜ່ລະບາດໃນອະນາຄົດ.
|
|
ທ່ານ ຫງວຽນກ໊ວກຢູງ ຮອງລັດຖະມົນຕີກະຊວງການຕ່າງປະເທດຫວຽດນາມ ເຂົ້າຮ່ວມກອງປະຊຸມ. ພາບ: nhandan.com.vn. |
ເມື່ອແລກປ່ຽນກ່ຽວກັບສະພາບການຂອງສາກົນ ແລະພາກພື້ນ, ອາຊຽນ ແລະອິນເດຍ ຢັ້ງຢືນວ່າ ຈະສົມທົບກັນຢ່າງແໜ້ນແຟ້ນ, ປະກອບສ່ວນເຂົ້າໃນຄວາມມານະພະຍາຍາມຮັກສາສັນຕິພາບ, ສະຖຽນລະພາບ, ຄວາມໝັ້ນຄົງຢູ່ພາກພື້ນ, ໃນນັ້ນມີຄວາມໝັ້ນຄົງ ແລະຄວາມປອດໄພໃນການເດີນທະເລຢູ່ທະເລຕາເວັນອອກ. ອິນເດຍ ໄດ້ເນັ້ນໜັກເຖິງການສະໜັບສະໜູນຫຼັກໝັ້ນ, ຫຼັກການຂອງອາຊຽນ ກ່ຽວກັບບັນຫາທະເລຕາເວັນອອກ, ສະໜັບສະໜູນອາຊຽນ ເສີມຂະຫຍາຍບົດບາດຊຸກຍູ້ການເຈລະຈາ ແລະສ້າງຄວາມໄວ້ເນື້ອເຊື່ອໃຈ, ຮັບປະກັນການປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່່າງຄົບຖ້ວນ ແລະມີປະສິດທິຜົນ, ສ້າງກົດແຫ່ງການປະພຶດຢູ່ທະເລຕາເວັນອອກ (COC) ໃຫ້ມີປະສິດທິພາບ, ປະສິດທິຜົນ, ເໝາະສົມກັບກົດໝາຍສາກົນ ແລະສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ (UNCLOS) 1982. ອິນເດຍ ສະແດງຄວາມປາດຖະໜາຊຸກຍູ້ການຮ່ວມມືກັບອາຊຽນ ບົນພື້ນຖານທັດສະນະຂອງອາຊຽນທີ່ມີຕໍ່ມະຫາສະໝຸດອິນເດຍ-ປາຊີຟິກ (IPOI). ກ່ຽວກັບສະຖານະການຂອງມຽນມາ, ອິນເດຍ ສະແດງຄວາມຊົມເຊີຍຕໍ່ໝາກຜົນກອງປະຊຸມບັນດາການນຳອາຊຽນ ທີ່ໄດ້ຈັດຂຶ້ນໃນວັນທີ 24 ເມສາ 2021 ດ້ວຍຖະແຫຼງການປະທານຂອງກອງປະຊຸມ.
ໂດຍ: ແສງເດືອນ