ເລຂາທິການໃຫຍ່ອາຊຽນ ຕີລາຄາສູງຕໍ່ການປະກອບສ່ວນຂອງຫວຽດນາມ ເຂົ້າໃນການກໍ່ສ້າງປະຊາຄົມ
ກປ.ອອນໄລ - ວັນທີ 13 ພຶດສະພາ, ຢູ່ສໍານັກງານຂອງຄະນະເລຂາທິການສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ຢູ່ນະຄອນຫຼວງຈາກາຕາ, ປະເທດອິນໂດເນເຊຍ, ທ່ານນາງ ໂຕນທິງອກເຮືອງ, ເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າຫວຽດນາມ ປະຈໍາອາຊຽນ ໄດ້ຍື່ນສະເໜີໃບມອບສິດຕໍ່ທ່ານ Kao Kim Hour ເລຂາທິການໃຫຍ່ອາຊຽນ.
ທີ່ການຕ້ອນຮັບພາຍຫຼັງພິທີມອບຮັບ, ທ່ານ Kao Kim Hourn ເລຂາທິການໃຫຍ່ອາຊຽນ ໄດ້ຊົມເຊີຍທ່ານນາງເອກອັກຄະລັດຖະທູດ ໂຕນທິງອກເຮືອງ ທີ່ໄດ້ມາຮັບໜ້າທີ່ ແລະຢືນຢັນວ່າ: ຄະນະເລຂາທິການອາຊຽນ ພ້ອມແລ້ວທີ່ຈະຮ່ວມມືຢ່າງແໜ້ນແຟ້ນກັບທ່ານນາງເອກອັກຄະລັດຖະທູດ ກໍ່ຄືຄະນະຜູ້ຕາງໜ້າຫວຽດນາມ ປະຈໍາອາຊຽນ ເພື່ອໜູນຊ່ວຍການເຄື່ອນໄຫວຂອງອາຊຽນ, ມຸ່ງໄປເຖິງການບັນລຸວິໄສທັດປະຊາຄົມອາຊຽນ 2025 ແລະວິໄສທັດຍາວໄກກວ່ານີ້ຕື່ມອີກ.
![left](/image/images/left.png) ![center](/image/images/center.png) ![right](/image/images/right.png) ![del](/images/red-error_16px.gif) |
![](https://file3.qdnd.vn/data/images/26/2024/05/14/upload_2124/qtrang14052024_01.jpeg?dpi=150&quality=100&w=500) |
ທ່ານນາງເອກອັກຄະລັດຖະທູດ ໂຕນທິງອກເຮືອງ ແລະ ທ່ານ Kao Kim Hourn ເລຂາທິການໃຫຍ່ອາຊຽນ ທີ່ພິທີມອບໃບມອບສິດ. ພາບ: vov.vn |
ທ່ານ Kao Kim Hourn ຕີລາຄາສູງຕໍ່ການປະກອບສ່ວນຂອງຫວຽດນາມ ໃນການສ້າງປະຊາຄົມອາຊຽນ, ກໍ່ຄືບົດບາດທີ່ຕັ້ງໜ້າ ແລະການປະສານງານໃນການພົວພັນຕ່າງປະເທດຂອງອາຊຽນ, ພິເສດແມ່ນປະເທດປະສານງານການພົວພັນ ອາຊຽນ - ສ. ເກົາຫຼີ. ທ່ານເລຂາທິການໃຫຍ່ອາຊຽນ ຂອບໃຈຫວຽດນາມ ທີ່ໄດ້ສ້າງເງື່ອນໄຂໃຫ້ແກ່ການຢ້ຽມຢາມ ແລະເຮັດວຽກຢູ່ຫວຽດນາມ ໃນໄລຍະຜ່ານມາ ບັນລຸໄດ້ໝາກຜົນອັນຕັ້ງໜ້າ; ສະແດງຄວາມເປັນກຽດທີ່ໄດ້ເຂົ້າຮ່ວມ ແລະກ່າວຄຳເຫັນທີ່ເວທີປາໄສອະນາຄົດອາຊຽນ (AFF).
ທີ່ການພົບປະ, ທ່ານນາງເອກອັກຄະລັດຖະທູດ ໂຕນທິງອກເຮືອງ ໄດ້ຂອບອົກຂອບໃຈທ່ານເລຂາທິການໃຫຍ່ ທີ່ໄດ້ໃຫ້ການສະໜັບສະໜູນ, ເຂົ້າຮ່ວມ ແລະປະກອບສ່ວນຢ່າງຕັ້ງໜ້າໃຫ້ AFF, ແມ່ນໜຶ່ງໃນບັນດາຂໍ້ລິເລີ່ມສຳຄັນຂອງທ່ານນາຍົກລັດຖະມົນຕີຫວຽດນາມ. ທ່ານນາງເອກອັກຄະລັດຖະທູດ ປາດຖະໜາວ່າ ຄະນະເລຂາທິການ ແລະເລຂາທິການໃຫຍ່ອາຊຽນ ຈະສືບຕໍ່ຍູ້ແຮງຄວາມມານະພະຍາຍາມໜູນຊ່ວຍບັນດາປະເທດສະມາຊິກສຳເລັດການກໍ່ສ້າງ ແລະປະຕິບັດເປົ້າໝາຍໃນວິໄສທັດປະຊາຄົມອາຊຽນ 2045, ໃນນັ້ນພິເສດແມ່ນການນຳປະຊາຄົມອາຊຽນ ໄດ້ເຂົ້າໃກ້ປະຊາຊົນ, ນຳເອົາຜົນປະໂຫຍດທີ່ແທດຈິງມາໃຫ້ປະຊາຊົນ, ວິສາຫະກິດ.
ທ່ານນາງເອກອັກຄະລັດຖະທູດ ໄດ້ສະແດງຄວາມຂອບອົກຂອບໃຈຕໍ່ຄະນະເລຂາທິການ ແລະສ່ວນຕົວທ່ານເລຂາທິການໃຫຍ່ Kao Kim Hourn ທີ່ໄດ້ສົມທົບ ແລະໜູນຊ່ວຍຄະນະຜູ້ຕາງໜ້າຫວຽດນາມ ຢູ່ອາຊຽນ ໃນໄລຍະຜ່ານມາ, ພິເສດແມ່ນໃນໄລຍະປະສານງານການພົວພັນ ອາຊຽນ - ສ. ເກົາຫຼີ, ປາດຖະໜາວ່າ ທ່ານເລຂາທິການໃຫຍ່ ແລະຄະນະເລຂາທິການອາຊຽນ ສືບຕໍ່ສົມທົບກັນໜູນຊ່ວຍຫວຽດນາມ ໃນໜ້າທີ່ປ່ຽນຜຽນກັນໃນໄລຍະຈະມາເຖິງ.
ໂດຍ: ຈາງຫງວຽນ