ໃນຈົດໝາຍຊົມເຊີຍ, ທ່ານ ຟ້າມມິງຈິ໊ງ ນາຍົກລັດຖະມົນຕີ ໄດ້ສົ່ງຄຳຊົມເຊີຍອັນອົບອຸ່ນມາຍັງຄະນະຄູຝຶກ ແລະທີມຊາດບານເຕະຫວຽດນາມ ພາຍຫຼັງໄດ້ຮັບໄຊຊະນະໃນການແຂ່ງຂັນຮອບຊິງຊະນະເລີດຂາໄປ ແລະຂາກັບ ແລະຄວ້າໄດ້ແຊ້ມອາຊຽນ Cup 2024 ຢ່າງເປັນທາງການ.

ທ່ານນາຍົກລັດຖະມົນຕີ ໄດ້ສະແດງຄວາມພາກພູມໃຈ, ຂອບອົກຂອບໃຈທີມຊາດບານເຕະທີ່ໄດ້ມານະພະຍາຍາມຢ່າງບໍ່ຢຸດຢັ້ງ, ຢືດໝັ້ນແຂ່ງຂັນຢ່າງກ້າຫານ, ສາມັກຄີ. ທ່ານນາຍົກລັດຖະມົນຕີ ຢືນຢັນວ່າ ໄຊຊະນະນີ້ບໍ່ພຽງແຕ່ແມ່ນຄວາມເອກອ້າງທະນົງໃຈຂອງກິລາຫວຽດນາມ ເທົ່ານັ້ນ, ຫາກຍັງແມ່ນແຫຼ່ງບັນດານໃຈຂອງທົ່ວປະເທດ, ສະແດງໃຫ້ເຫັນຄວາມມຸ່ງມາດປາດຖະໜາຢາກບືນຕົວຂຶ້ນສູ່ລະດັບສູງໃໝ່ອີກດ້ວຍ.

leftcenterrightdel
ປະຊາຊົນນະຄອນຫຼວງຮ່າໂນ້ຍ ຊົມເຊີຍໄຊຊະນະຂອງທີມຊາດບານເຕະຫວຽດນາມ ຢູ່ຖະໜົນ ຫງວຽນຈ້າຍ. ພາບ: ສໍານັກຂ່າວສານຫວຽດນາມ.

ທ່ານນາຍົກລັດຖະມົນຕີ ໄດ້ສະແດງຄວາມຮູ້ບຸນຄຸນຢ່າງເລິກເຊິ່ງມາຍັງຄະນະຄູຝຶກ, ຖັນແຖວໜູນຊ່ວຍ, ບັນດາຜູ້ທີ່ຮ່ວມເດີນທາງພ້ອມກັບທີມຊາດ. ທ່ານນາຍົກລັດຖະມົນຕີ ໄດ້ສະແດງຄວາມຂອບໃຈພິເສດຕໍ່ແຟນບານໃນທົ່ວປະເທດທີ່ຍາມໃດກໍ່ຮ່ວມເດີນທາງ, ຄຽງບ່າຄຽງໄຫຼ່ ແລະເປັນບ່ອນອີງທີ່ໝັ້ນຄົງໃຫ້ທີມບານເຕະໃນຕະຫຼອດວິວັດການແຂ່ງຂັນເພື່ອຍາດເອົາຊະນະສູງສຸດໃນການແຂ່ງຂັນອາຊຽນ Cup 2024.

ທ່ານນາຍົກລັດຖະມົນຕີ ຢືນຢັນວ່າ ໄຊຊະນະນີ້ສະແດງໃຫ້ເຫັນຄວາມກ້າວໜ້າຂອງບານເຕະຫວຽດນາມ, ທັງແມ່ນຂອງຂວັນທີ່ມີຄວາມໝາຍຕົ້ນປີໃໝ່ທີ່ມອບໃຫ້ປະຊາຊົນທົ່ວປະເທດ.

ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ສົ່ງຄຳຢ້ຽມຢາມຖາມຂ່າວ, ລະດົມກໍາລັງໃຈ ແລະອວຍພອນໃຫ້ນັກກິລາ ຫງວຽນຊວນຊອນ ຟືນຟູສຸຂະພາບໂດຍໄວ ເພື່ອກັບຄືນສະໜາມກິລາ ແລະສືບຕໍ່ປະກອບສ່ວນໃຫ້ກິລາບານເຕະຂອງປະເທດ. ທ່ານນາຍົກລັດຖະມົນຕີ ເຊື່ອໝັ້ນວ່າ ດ້ວຍເຈດຈຳນົງອັນກ້າແກ່ນ, ນັກກິລາ ຫງວຽນຊວນຊອນ ຈະຜ່ານຜ່າຄວາມຫຍຸ້ງຍາກ ແລະກັບຄືນດ້ວຍຄວາມແຂງແຮງກວ່າ, ພ້ອມກັບທີມຊາດຢືນຢັນທີ່ຕັ້ງຂອງບານເຕະຫວຽດນາມ ຢູ່ພາກພື້ນ ແລະກ້າວໄປເຖິງຜົນສຳເລັດໃຫຍ່ຫຼວງກວ່າໃນອະນາຄົດ.

ໂດຍ: ຈາງຫງວຽນ