ການແຂ່ງຂັນນັກສຶກສາກັບຄວາມປອດໄພດ້ານຂໍ້ມູນຂ່າວສານອາຊຽນ ປີ 2020
ກປ.ອອນໄລ - ການແຂ່ງຂັນນັກສຶກສາກັບຄວາມປອດໄພດ້ານຂໍ້ມູນຂ່າວສານອາຊຽນ ປີ 2020 ຈະໄດ້ຈັດຕັ້ງຜ່ານລະບົບທາງໄກ, ດ້ວຍການເຂົ້າຮ່ວມຂອງ 121 ທີມທີ່ມາຈາກ 31 ໂຮງຮຽນມະຫາວິທະຍາໄລ, ວິທະຍາໄລຂອງຫວຽດນາມ ແລະ 37 ທີມມາຈາກບັນດາໂຮງຮຽນມະຫາວິທະຍາໄລຂອງ 6 ປະເທດອາຊຽນ.
ປີ 2020 ແມ່ນປີທີສິບສາມທີ່ການແຂ່ງຂັນໄດ້ຈັດຕັ້ງຢູ່ຫວຽດນາມ ແລະແມ່ນປີທີສອງທີ່ການແຂ່ງຂັນໄດ້ຮັບການເປີດກວ້າງເຖິງບັນດາປະເທດອາຊຽນ. ການແຂ່ງຂັນໂດຍສະມາຄົມຄວາມປອດໄພດ້ານຂໍ້ມູນຂ່າວສານຫວຽດນາມ (VNISA) ເປັນປະທານ, ສົມທົບກັບກົມເຕັກໂນໂລຢີ-ຂໍ້ມູນຂ່າວສານ (ກະຊວງສຶກສາ ແລະກໍ່ສ້າງຫວຽດນາມ) ແລະກົມຄວາມປອດໄພດ້ານຂໍ້ມູນຂ່າວສານ (ກະຊວງຖະແຫຼງຂ່າວ ແລະສື່ສານຫວຽດນາມ) ຈັດຕັ້ງ, ແມ່ນກິດຈະກໍາໃນຂອບເຂດເຫດການປະຈໍາປີ “ວັນແຫ່ງຄວາມປອດໄພດ້ານຂໍ້ມູນຂ່າວສານຫວຽດນາມ” ປີ 2020.
|
|
ບັນດານັກສອບເສັງເຂົ້າຮ່ວມການແຂ່ງຂັນ. ພາບ: ກິມເຟື້ອງ. |
ການແຂ່ງຂັນແນໃສ່ເປົ້າໝາຍໂຄສະນາ, ເຜີຍແຜ່, ຍົກສູງຄວາມຮູ້ ແລະຄວາມຮັບຜິດຊອບກ່ຽວກັບຄວາມປອດໄພດ້ານຂໍ້ມູນຂ່າວສານຢູ່ບັນດາຮາກຖານສຶກສາ ແລະກໍ່ສ້າງຊັ້ນປະລິນຍາຕີິ; ພ້ອມທັງຍູ້ແຮງຂະບວນການຄົ້ນຄວ້າ, ຮໍ່າຮຽນ, ແລກປ່ຽນບົດຮຽນ, ອັບເດດຄວາມຮູ້ດ້ານເຕັກໂນໂລຢີທັນສະໄໝໃນຂົງເຂດຄວາມປອດໄພດ້ານຂໍ້ມູນຂ່າວສານ, ປະກອບສ່ວນປະຕິບັດແຜນຮ່າງ “ກໍ່ສ້າງ ແລະພັດທະນາຊັບພະຍາກອນມະນຸດກ່ຽວກັບຄວາມປອດໄພ, ຄວາມໝັ້ນຄົງດ້ານຂໍ້ມູນຂ່າວສານເຖິງປີ 2020” (ແຜນຮ່າງ 99) ແລະແຜນຮ່າງ “ໂຄສະນາຍົກສູງຄວາມຮູ້, ຄວາມຮັບຜິດຊອບກ່ຽວກັບຄວາມປອດໄພດ້ານຂໍ້ມູນຂ່າວສານເຖິງປີ 2020” (ໂຄງຮ່າງ 893).
ເປົ້າໝາຍເຂົ້າຮ່ວມການແຂ່ງຂັນແມ່ນນັກສຶກສາ, ນັກສໍາມະນາກອນທີ່ມາຈາກບັນດາໂຮງຮຽນວິທະຍາໄລ, ມະຫາວິທະຍາໄລ, ສະຖາບັນໃນທົ່ວປະເທດ ແລະບາງໂຮງຮຽນຂອງບັນດາປະເທດອາຊຽນ. ການແຂ່ງຂັນມີ 3 ຮອບ: ຮອບເລີ່ມຕົ້ນ, ຮອບຄັດເລືອກ ແລະຮອບຊະນະເລີດ.
ປີນີ້, ນັກອຸປະຖໍາຕົ້ນຕໍຂອງການແຂ່ງຂັນສືບຕໍ່ແມ່ນກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ (Viettel) ແລະກຸ່ມບໍລິສັດໄປສະນີ-ໂທລະຄົມມະນາຄົມ (VNPT).
ໂດຍ: ທະນາພອນ