ອາຟຼິກາ ປາດຖະໜາຢາກຍົກສູງຄວາມເຂົ້າໃຈ ແລະເພີ່ມທະວີການຮ່ວມມືກັບຫວຽດນາມ
ກປ.ອອນໄລ - ວັນທີ 15 ພຶດສະພາ, ຢູ່ຮ່າໂນ້ຍ, ກຸ່ມສະຖານທູດອາຟຼິກາ ປະຈຳຫວຽດນາມ ໄດ້ຈັດກອງປະຊຸມຂ່າວເນື່ອງໃນໂອກາດສະເຫຼີມສະຫຼອງວັນອາຟຼິກາ (ວັນທີ 25 ພຶດສະພາ). ນີ້ແມ່ນເຫດການ ເພື່ອໃຫ້ບັນດາປະເທດອາຟຼິກາ ເຜີຍແຜ່ຄວາມເປັນຫຼາຍຮູບຫຼາຍແບບຂອງມູນເຊື້ອ, ວັດທະນະທຳ, ເພີ່ມຄວາມເຂົ້າໃຈກ່ຽວກັບທະວີບນີ້, ກໍ່ຄືຊຸກຍູ້ກາລະໂອກາດຮ່ວມມືລະຫວ່າງອາຟຼິກາ ແລະຫວຽດນາມ.
ທີ່ເຫດການ, ເອກອັກຄະລັດຖະທູດບັນດາປະເທດອາຟຼິກາ ໄດ້ເນັ້ນໜັກເຖິງຄວາມສຳຄັນຂອງການຍົກລະດັບການຮ່ວມມືລະຫວ່າງອາຟຼິກາ ແລະຫວຽດນາມ, ພ້ອມທັງສະແດງຄວາມປາດຖະໜາຢາກເພີ່ມທະວີການພົວພັນຄູ່ຮ່ວມມືຫຼາຍດ້ານລະຫວ່າງບັນດາປະເທດອາຟຼິກາ ແລະຫວຽດນາມ; ກໍ່ຄືຊຸກຍູ້ການພົບປະແລກປ່ຽນວັດທະນະທໍາ, ຄວາມເຂົ້າໃຈເຊິ່ງກັນ ແລະກັນລະຫວ່າງສອງຝ່າຍ.
![left](/image/images/left.png) ![center](/image/images/center.png) ![right](/image/images/right.png) ![del](/images/red-error_16px.gif) |
![](https://file3.qdnd.vn/data/images/26/2024/05/16/upload_2124/qtrang16052024_02.jpeg?dpi=150&quality=100&w=500) |
ເອກອັກຄະລັດຖະທູດບັນດາປະເທດອາຟຼິກາ ຈັດກອງປະຊຸມຂ່າວເນື່ອງໃນໂອກາດວັນອາຟຼິກາຢູ່ຫວຽດນາມ. ພາບ: vov.vn |
ຕາມທ່ານ Jamale Chouaibi ເອກອັກຄະລັດຖະທູດມາຣົກ ປະຈຳ ຫວຽດນາມ ແລ້ວ, ອາຟຼິກາ ແມ່ນພາກພື້ນທີ່ມີກາລະໂອກາດ ແລະທ່າແຮງພັດທະນາເສດຖະກິດອັນໃຫຍ່ຫຼວງ, ດ້ວຍພົນລະເມືອງ 1,3 ຕື້ຄົນ, ແຫຼ່ງຊັບພະຍາກອນທຳມະຊາດອຸດົມສົມບູນ ແລະອັດຕາການເຕີບໂຕສະເລ່ຍ 4,3% ຕໍ່ປີໃນໄລຍະຈະມາເຖິງ. ທ່ານເອກອັກຄະລັດຖະທູດ Jamale Chouaibi ກໍ່ໃຫ້ຮູ້ວ່າ ຈຳນວນຄົນຊັ້ນກາງຢູ່ອາຟຼິກາ ພວມເພີ່ມຂຶ້ນຢ່າງວ່ອງໄວ, ໃນນັ້ນມີຫຼາຍຄົນຢາກມາຢ້ຽມຢາມຈຸດນັດພົບທີ່ດຶງດູດຄື ຫວຽດນາມ. ສະນັ້ນ, ການເຮັດລະບຽບການຂໍວີຊາ ແລະເຂົ້າເມືອງຢ່າງງ່າຍດາຍຈະແມ່ນບາດກ້າວທຳອິດຂອງຫວຽດນາມ ເພື່ອດຶງດູດນັກທ່ອງທ່ຽວຈາກອາຟຼິກາ ໃຫ້ຫຼາຍຂຶ້ນ, ຜ່ານນັ້ນສ້າງກາລະໂອກາດຮ່ວມມືໃນການແລກປ່ຽນການຄ້າ.
ໂດຍມີທັດສະນະດຽວກັນ, ທ່ານນາງ Vuyiswa Tulelo, ເອກອັກຄະລັດຖະທູດອາຟຼິກາໃຕ້ ປະຈຳ ຫວຽດນາມ ຢືນຢັນວ່າ ນີ້ແມ່ນເວລາທີ່ເໝາະສົມເພື່ອຊອກຫາວິທີຮ່ວມມືໃໝ່, ສ້າງກຳລັງແຮງໃໝ່ໃຫ້ການພົວພັນລະຫວ່າງບັນດາປະເທດອາຟຼິກາ ແລະຫວຽດນາມ. ທ່ານນາງເອກອັກຄະລັດຖະທູດ ຕີລາຄາວ່າ ສອງຝ່າຍມີທ່າໄດ້ປຽບສຳຄັນໃນການຮ່ວມມືຢ່າງແໜ້ນແຟ້ນລະຫວ່າງສະຫະພັນອາຟຼິກາ (AU) ແລະອາຊຽນ. ທ່ານນາງ ໃຫ້ຮູ້ວ່າ ປະຈຸບັນ, ອາຟຼິກາໃຕ້ ພວມມານະພະຍາຍາມຮ່ວມມືກັບຫວຽດນາມ ເພື່ອໃຫ້ມີໜ້າໃນບັນຊີລາຍຊື່ທີ່ໄດ້ຮັບການໜູນຊ່ວຍຈາກຫວຽດນາມ ກ່ຽວກັບການເຮັດລະບຽບການທ່ອງທ່ຽວໃຫ້ງ່າຍດາຍໂດຍໄວ, ຄື: ການລົງທະບຽນວີຊາທາງອອນລາຍ, ການຍົກເວັ້ນວີຊາການທ່ອງທ່ຽວໃນເວລາສັ້ນ.
ໂດຍ: ຈາງຫງວຽນ