ຊອກຫານັກສຶກສາທີ່ມີຄວາມເກັ່ງກ້າສາມາດເຂົ້າຮ່ວມການສ້າງສັງຄົມດີຈີຕອນ
ກປ.ອອນໄລ - ວັນທີ 15 ມີນາ, ກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ (Viettel) ໃຫ້ຂ່າວວ່າ ເດືອນມີນາ 2021 ຈະຜັນຂະຫຍາຍລາຍການ Viettel Digital Talent ສະຫງວນໃຫ້ນັກສຶກສາທີ່ມີຄວາມເກັ່ງກ້າສາມາດໃນຂົງເຂດ Cloud, ຄວາມປອດໄພຂໍ້ມູນຂ່າວສານ, ວິທະຍາສາດຂໍ້ມູນ ແລະພູມປັນຍາທຽມ.
ລາຍການໄດ້ອອກແບບໂດຍນັກຊ່ຽວຊານແຖວໜ້າຂອງ Viettel ແລະການເຂົ້າຮ່ວມຂອງບັນດານັກຊ່ຽວຊານຢູ່ພາຍໃນປະເທດ ແລະຕ່າງປະເທດ, ໝັ້ນໝາຍວ່າຈະນຳເອົາຄວາມຮູ້ ແລະການເຂົ້າຮ່ວມຕົວຈິງມາໃຫ້ນັກສຶກສາ. ເປົ້າໝາຍຂອງ Viettel Digital Talent ແມ່ນນັກສຶກສາປີ 3 ແລະປີ 4, ນັກຄົ້ນຄວ້າປະລິນຍາໂທ, ປະລິນຍາເອກທີ່ມີຜົນງານການຮຽນດີເດັ່ນໃນຂະແໜງການຕ່າງໆ, ຄື: ເຕັກໂນໂລຢີຂໍ້ມູນຂ່າວສານ, ວິທະຍາສາດຄອມພິວເຕີ, ເລກ-ຄອມ, ຄວາມປອດໄພຂໍ້ມູນຂ່າວສານ, ວິທະຍາສາດຂໍ້ມູນ ແລະພູມປັນຍາທຽມ.
|
|
ພາບປະກອບ: ສໍານັກຂ່າວສານຫວຽດນາມ. |
ໃນໄລຍະ 3 ເດືອນທໍາອິດຂອງລາຍການ, ນັກສຶກສາໄດ້ບໍາລຸງສ້າງລົງເລິກຂະແໜງໂດຍນັກຊ່ຽວຊານແຖວໜ້າໃນຂົງເຂດອາຊີບ ເຊິ່ງເຂົາເຈົ້າໄດ້ຄັດເລືອກ. ໃນ 3 ເດືອນທີ່ຍັງເຫຼືອ, ນັກສຶກສາຈະເຂົ້າຮ່ວມໂຄງການຕົວຈິງຂອງ Viettel ໂດຍກົງ. ສິ້ນສຸດລາຍການ, ນັກຮຽນເກັ່ງທີ່ສຸດຈະຖືກຄັດເລືອກໃຫ້ຂຶ້ນບັນລະຍາຍຕໍ່ຄະນະອຳນວຍການໃຫຍ່ດ້ວຍໂອກາດທີ່ຈະໄດ້ຮັບຂອງຂວັນທີ່ມີມູນຄ່າເຖິງ 30 ລ້ານດົ່ງ.
ດ້ວຍພາລະກຳນໍາໜ້າໃນການສ້າງສັງຄົມດີຈີຕອນ ແລະກາຍເປັນກຸ່ມບໍລິສັດເຕັກໂນໂລຢີທົ່ວໂລກ, Viettel ພວມລົງທຶນຢ່າງແຮງເພື່ອຍົກສູງຄຸນນະພາບແຫຼ່ງຊັບພະຍາກອນມະນຸດຜ່ານການປັບປຸງສະພາບແວດລ້ອມແຫ່ງການເຮັດວຽກ ແລະເພີ່ມຄວາມດຶງດູດຂອງເຄື່ອງໝາຍການຄ້າຕໍ່ຜູ້ທີ່ມີຄວາມເກັ່ງກ້າສາມາດໃນຂົງເຂດເຕັກໂນໂລຢີສູງ.
ໂດຍ: ເຈິ່ນຮວ່ຽນ