ມອບເຮືອນໃຫ້ແກ່ແມ່ເຖົ້າຄົນລາວຜູ້ທີ່ໄດ້ກູ້ເອົາຊີວິດທະຫານອາສາສະໝັກຫວຽດນາມ
ກປ.ອອນໄລ - ໃນຂອບເຂດການຢ້ຽມຢາມ ແລະເຮັດວຽກຢູ່ລາວ ແຕ່ວັນທີ 30 ພຶດສະພາ ຫາວັນທີ 3 ມິຖຸນາ 2019, ປະທານສູນກາງສະມາຄົມມິດຕະພາບ ຫວຽດນາມ - ລາວ ແລະຄະນະປະຕິບັດງານໄດ້ໄປແຂວງເຊກອງ ເຂົ້າຮ່ວມພິທີມອບ-ຮັບເຮືອນມິດຕະພາບຫວຽດນາມ - ລາວ ໃຫ້ແກ່ແມ່ເຖົ້າ ກັນເຈຍ ຜູ້ທີ່ໄດ້ກູ້ເອົາຊີວິດທະຫານອາສາສະໝັກຫວຽດນາມ ໃນສະໄໝຕໍ່ສູ້ຕ້ານຈັກກະພັດອາເມລິກາ.
ເຂົ້າຮ່ວມພິທີມີທ່ານ ວິໄລວົງ ບຸດດາຄໍາ ປະທານສູນກາງສະມາຄົມມິດຕະພາບລາວ - ຫວຽດນາມ, ຜູ້ຕາງໜ້າອໍານາດການປົກຄອງແຂວງເຊກອງ ແລະສະຖານກົງສູນໃຫຍ່ຫວຽດນາມ ປະຈໍາ ປາກເຊ.
|
|
ພິທີມອບ-ຮັບເຮືອນມິດຕະພາບຫວຽດນາມ - ລາວ ໃຫ້ແກ່ແມ່ເຖົ້າ ກັນເຈຍ, ແຂວງເຊກອງ. ພາບ: vov.vn. |
ເຮືອນຫຼັງນີ້ມີມູນຄ່າ 700 ລ້ານດົ່ງ, ໂດຍສູນກາງສະມາຄົມມິດຕະພາບຫວຽດນາມ - ລາວ ຂົນຂວາຍບັນດາອົງການຈັດຕັ້ງສະມາຊິກບໍລິຈາກ. ເຮືອນຫຼັງນີ້ມອບໃຫ້ແມ່ເຖົ້າ ກັນເຈຍ, ຢູ່ແຂວງເຊກອງ, ເຊິ່ງເປັນແມ່ຍິງລາວຜູ້ທີ່ໄດ້ຜ່ານຜ່າຮົ້ວກີດຂວາງກ່ຽວກັບຮີດຄອງປະເພນີຂອງຊາດ, ແບ່ງປັນນໍ້ານົມທີ່ກໍາລັງລ້ຽງລູກນ້ອຍຂອງຕົນເພື່ອກູ້ເອົາຊີວິດທະຫານອາສາສະໝັກຫວຽດນາມ ຜູ້ຖືກບາດເຈັບສາຫັດໃນການຕໍ່ສູ້ຕ້ານຈັກກະພັດອາເມລິກາ ກ່ອນນີ້ກວ່າ 40 ປີ.
ເລື່ອງລາວທີ່ຕື້ນຕັນໃຈນັ້ນແມ່ນປະກົດການທີ່ມີຊີວິດຊີວາກ່ຽວກັບການເສຍສະຫຼະອັນສູງສົ່ງ ແລະຄວາມຮັກແພງອຸ້ມຊູຊ່ວຍເຫຼືອເຊິ່ງກັນ ແລະກັນລະຫວ່າງປະຊາຊົນສອງປະເທດ ຫວຽດນາມ - ລາວ, ເປັນການກະທໍາອັນສູງສົ່ງປະກອບສ່ວນເພີ່ມພູນຄູນສ້າງນໍ້າໃຈສາມັກຄີມິດຕະພາບແບບພິເສດຫວຽດນາມ - ລາວ, ລາວ - ຫວຽດນາມ.
|
|
ມອບປື້ມເງິນຝາກປະຢັດມູນຄ່າ 90 ລ້ານດົ່ງໃຫ້ແກ່ແມ່ເຖົ້າ ກັນເຈຍ. ພາບ: vov.vn. |
ເນື່ອງໃນໂອກາດນີ້, ຄະນະຍັງໄດ້ມອບປື້ມເງິນຝາກປະຢັດທີ່ມີມູນຄ່າ 90 ລ້ານດົ່ງ ແລະໂທລະພາບໜຶ່ງໜ່ວຍມີມູນຄ່າ 10 ລ້ານດົ່ງ ໃຫ້ແມ່ເຖົ້າ ກັນເຈຍ.
ກ່າວຄໍາເຫັນທີ່ພິທີມອບ-ຮັບ ແລະເປີດນໍາໃຊ້ເຮືອນແຫ່ງນໍ້າໃຈມິດຕະພາບຫວຽດນາມ - ລາວ, ທ່ານ ວິໄລວົງ ບຸດດາຄໍາ ປະທານສູນກາງສະມາຄົມມິດຕະພາບລາວ - ຫວຽດນາມ ຢັ້ງຢືນວ່າ ເຮືອນທີ່ມອບໃຫ້ແມ່ເຖົ້າ ກັນເຈຍ ນັ້ນແມ່ນຂອງຂວັນອັນລໍ້າຄ່າສະແດງໃຫ້ເຫັນສິນທໍາກິນເຂົ້າຄິດຮອດຄຸນນາກິນປາຄິດຮອດຄຸນນໍ້າ, ນໍ້າໃຈສະໜິດຕິດພັນ, ຮ່ວມທຸກຮ່ວມສຸກຮ່ວມເປັນຮ່ວມຕາຍ ແລະກໍເປັນສະຖານທີ່ສຶກສາອົບຮົມມູນເຊື້ອປະຕິວັດ ແລະນໍ້າໃຈມິດຕະພາບແບບພິເສດຫວຽດນາມ - ລາວ, ລາວ - ຫວຽດນາມ.
ໂດຍ: ໄຊຊະນະ