ເພີ່ມພູນຄູນສ້າງ, ພັດທະນາການພົວພັນແບບພິເສດ ລາວ - ຫວຽດນາມ
ກປ.ອອນໄລ - ຕອນບ່າຍວັນທີ 31 ພຶດສະພາ, ຢູ່ນະຄອນຫຼວງວຽງຈັນ, ໃນຂອບເຂດການຢ້ຽມຢາມ ແລະເຮັດວຽກຢູ່ ລາວ ແຕ່ວັນທີ 30 ພຶດສະພາ ຫາວັນທີ 3 ມິຖຸນາ, ຄະນະຜູ້ແທນສູນກາງສະມາຄົມມິດຕະພາບຫວຽດນາມ - ລາວ ນໍາໂດຍທ່ານ ເຈິ່ນວັນຕຸ໋ຍ, ປະທານສູນກາງສະມາຄົມມິດຕະພາບ ຫວຽດນາມ - ລາວ ໄດ້ເຂົ້າຢ້ຽມຂໍ່ານັບທ່ານນາງ ປານີ ຢາທໍ່ຕູ້, ປະທານສະພາແຫ່ງຊາດລາວ, ທ່ານ ພັນຄໍາ ວິພາວັນ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດລາວ ແລະທ່ານນາງ ສູນທອນ ໄຊຍະຈັກ, ຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ.
ທີ່ບັນດາການເຂົ້າຢ້ຽມຂໍ່ານັບ, ທ່ານ ເຈິ່ນວັນຕຸ໋ຍ ໄດ້ຕາງໜ້າຄະນະສະແດງຄວາມຂອບໃຈຕໍ່ປະທານສະພາແຫ່ງຊາດລາວ, ຮອງປະທານປະເທດລາວ ແລະຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ທີ່ໄດ້ສະຫຼະເວລາຕ້ອນຮັບ ແລະສະຫງວນອາລົມຈິດອັນສະໜິດສະໜົມໃຫ້ຄະນະ, ພ້ອມທັງລາຍງານກັບປະທານສະພາແຫ່ງຊາດລາວ, ຮອງປະທານ ປະເທດລາວ ແລະຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ຮັບຊາບກ່ຽວກັບຜົນການເຮັດວຽກກ່ອນໜ້ານັ້ນກັບສະມາຄົມມິດຕະພາບລາວ-ຫວຽດນາມ, ກໍຄືທິດທາງ ແລະແຜນການຮ່ວມມືລະຫວ່າງສອງສູນກາງສະມາຄົມ ໃນໄລຍະຈະມາເຖິງ.
    |
 |
|
ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ຕ້ອນຮັບຄະນະຜູ້ແທນສູນກາງສະມາຄົມມິດຕະພາບຫວຽດນາມ - ລາວ. ພາບ: ສໍານັກຂ່າວສານຫວຽດນາມ. |
ປະທານສະພາແຫ່ງຊາດລາວ, ຮອງປະທານປະເທດລາວ ແລະຫົວໜ້າຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ຕີລາຄາສູງການຢ້ຽມຢາມ ແລະເຮັດວຽກຂອງຄະນະຢູ່ລາວ ໃນຄັ້ງນີ້; ຖືວ່າການຢ້ຽມຢາມໄດ້ປະກອບສ່ວນປຸກລະດົມ, ເພ່ີມພູນຄູນສ້າງ ແລະພັດທະນາການພົວພັນພິເສດລະຫວ່າງສອງປະເທດ, ເພາະວ່າການພົວພັນພິເສດ ລາວ - ຫວຽດນາມ ແມ່ນການພົວພັນທີ່ເປັນຕາຍ, ແມ່ນກົດເກນແຫ່ງການຄົງຕົວ ແລະພັດທະນາຂອງແຕ່ລະປະເທດ; ຂອບໃຈພັກ, ລັດ ແລະປະຊາຊົນຫວຽດນາມອ້າຍນ້ອງ ຍາມໃດກໍໃຫ້ການຊ່ວຍເຫຼືອອັນລໍ້າຄ່າ, ໃຫຍ່ຫຼວງ, ທັນການ ແລະບໍ່ມີເງື່ອນໄຂແກ່ລາວ ໃນຕະຫຼອດໄລຍະຜ່ານມາ.
|
|
 |
|
ທ່ານ ພັນຄໍາ ວິພາວັນ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດລາວ ຕ້ອນຮັບຄະນະຜູ້ແທນສູນກາງສະມາຄົມມິດຕະພາບຫວຽດນາມ - ລາວ. ພາບ: ສໍານັກຂ່າວສານຫວຽດນາມ. |
ກອນໜ້ານັ້ນ, ໃນຕອນເຊົ້າວັນດຽວກັນ, ຄະນະຜູ້ແທນສູນກາງສະມາຄົມມິດຕະພາບຫວຽດນາມ - ລາວ ນໍາໂດຍທ່ານ ເຈິ່ນວັນຕຸ໋ຍ ໄດ້ມີການພົບປະເຈລະຈາກັບຄະນະຜູ້ແທນສູນກາງສະມາຄົມມິດຕະພາບລາວ-ຫວຽດນາມ ນໍາໂດຍ ທ່ານ ວິໄລວົງ ບຸດດາຄໍາ, ກໍາມະການສູນກາງພັກ, ປະທານກຳມາທິການແຜນການ ການເງິນ ແລະການກວດສອບຂອງສະພາແຫ່ງຊາດ, ປະທານສະມາຄົມມິດຕະພາບລາວ-ຫວຽດນາມ...
ໂດຍ: ໄຊຊະນະ