ເພີ່ມທະວີການຮ່ວມມືລະຫວ່າງແຂວງ ຮວ່າບິ່ງ ແລະແຂວງ ຫົວພັນ
ກປ.ອອນໄລ - ຕອນບ່າຍວັນທີ 18 ມັງກອນ, ຄະນະປະຕິບັດງານແຂວງ ຫົວພັນ, ສປປ ລາວ ໂດຍທ່ານ ຄໍາຜີວ ວົງສະຫວັນ, ຮອງເລຂາຄະນະພັກແຂວງ, ປະທານຄະນະກໍາມະການແນວລາວສ້າງຊາດແຂວງ ຫົວພັນ ໄດ້ມາຢ້ຽມຢາມ ແລະເຮັດວຽກຢູ່ແຂວງ ຮວ່າບິ່ງ ສສ ຫວຽດນາມ.
ຕ້ອນຮັບຄະນະມີທ່ານ ບຸ່ຍວັນຕິ້ງ, ກໍາມະການສູນກາງພັກ, ເລຂາຄະນະພັກແຂວງ ຮວ່າບິ່ງ. ທີ່ການເຮັດວຽກ, ຜູ້ຕາງໜ້າສອງແຂວງໄດ້ລາຍງານໂດຍຫຍໍ້ສະພາບການພັດທະນາດ້ານເສດຖະກິດ, ສັງຄົມໃນປີ 2016. ແຂວງ ຫົວພັນ ມີລະດັບເຕີບໂຕດ້ານເສດຖະກິດດີພໍສົມຄວນ, ມີຄວາມສາມາດບົ່ມຊ້ອນໃນການພັດທະນາເຂື່ອນໄຟຟ້ານໍ້າຕົກ, ຂຸດຄົ້ນແຮ່ທາດຕ່າງໆ, ພັດທະນາຕົ້ນໄມ້ອຸດສາຫະກໍາ ແລະລ້ຽງຄວາຍ, ງົວ.
ຫົວພັນ ແມ່ນເຂດທີ່ໝັ້ນການຕໍ່ຕ້ານຂອງສອງປະເທດໃນໄລຍະຕ້ານລ່າເມືອງຂຶ້ນ, ພວກຈັກກະພັດເຂົ້າມາຮຸກຮານ. ປະຈຸບັນ, ແຂວງ ຫົວພັນ ຍັງຮັກສາປູຊະນີຍະຖານການຕໍ່ສູ້ຕ້ານ ອາເມລິກາ, ໂຮງໝໍ 100 ຕຽງໜຶ່ງຫຼັງໃນຖໍ້າຂອງທະຫານອາສາສະໝັກ ຫວຽດນາມ. ແຂວງ ຮວ່າບິ່ງ ເປັນປະຕູເຂດຕາເວັນຕົກສ່ຽງເໜືອຂອງ ຫວຽດນາມ, ໃກ້ກັບນະຄອນຫຼວງ ຮ່າໂນ້ຍ, ມີລະດັບເຕີບໂຕດ້ານເສດຖະກິດ 7,62%; ມີທ່າແຮງກ່ຽວກັບການພັດທະນາຜະລິດຕະພັນກະເສດ, ເຄື່ອງປ່າຂອງດົງ, ວັດສະດຸກໍ່ສ້າງ, ການທ່ອງທ່ຽວຊີວະພາບ…
ບັນຍາກາດໃນການເຮັດວຽກ. ພາບ: ຂ່າວສານຫວຽດນາມ
ຜູ້ຕາງໜ້າຂອງສອງແຂວງໄດ້ເຫັນດີເປັນເອກະພາບເພີ່ມທະວີສາຍພົວພັນມິດຕະພາບ ແລະຮ່ວມມືບົນພື້ນຖານການເຄົາລົບນັບຖືເຊິ່ງກັນ ແລະກັນ, ມີຄວາມສະເໝີພາບພ້ອມກັນໄດ້ຮັບຜົນປະໂຫຍດ, ເໝາະສົມກັບກົດໝາຍ, ນະໂຍບາຍຂອງ ຫວຽດນາມ - ລາວ, ເໝາະສົມກັບບັນດາເງື່ອນໄຂສາກົນທີ່ໄດ້ລົງນາມລະຫວ່າງສອງປະເທດ. ສອງແຂວງໄດ້ເຫັນດີເປັນເອກະພາບຍູ້ແຮງການຮ່ວມມືໃນບັນດາຂົງເຂດຄື: ການສຶກສາ, ສາທາລະນະສຸກ, ການຄ້າ, ການລົງທຶນ, ກະສິກໍາ, ການທ່ອງທ່ຽວ.
ໃນຂອບເຂດຂອງການຢ້ຽມຢາມ ແລະເຮັດວຽກຢູ່ແຂວງ ຮວ່າບິ່ງ, ຄະນະຜູ້ແທນແຂວງ ຫົວພັນ ໄດ້ໄປຢ້ຽມຊົມແຜ່ນສີລາປູຊະນີຍະຖານປະຫວັດສາດ - ສະຖານທີ່ດໍາເນີນກອງປະຊຸມໃຫຍ່ກະກຽມໃຫ້ກອງປະຊຸມໃຫຍ່ ຄັ້ງທີ II ຂອງພັກປະຊາຊົນປະຕິວັດ ລາວ ທີ່ກອງບັນຊາການທະຫານແຂວງ ຮວ່າບິ່ງ.
ແປໂດຍ: ຈາງຫງວຽນ