ແພດຊ່ຽວຊານຈາກ ສສ ຫວຽດນາມ ຊ່ວຍເຫລືອດ້ານວິຊາການໃນການສະກັດກັ້ນ ພະຍາດໂຄວິດ-19 ຢູ່ແຂວງສະຫວັນນະເຂດ
ວັນທີ 17 ພຶດສະພາ 2021 ຄະນະທີມແພດຊ່ຽວຊານ ຈາກ ສສ ຫວຽດນາມ ໄດ້ມາຊ່ວຍເຫລືອດ້ານວິຊາການ ກັບທີມແພດສະເພາະກິດໃນການສະກັດກັ້ນ ແລະຕ້ານການລະບາດຂອງພະຍາດໂຄວິດ-19 ຢູ່ແຂວງສະຫວັນນະເຂດ, ໂດຍການຮ່ວມກອງປະຊຸມ ກ່ອນການລົງພາກສະໜາມຕົວຈິງມີ ທ່ານ ດຣ. ແສງດາວ ສີດາໄລ ຫົວໜ້າພະແນກສາທາລະນະສຸກແຂວງສະຫວັນນະເຂດ, ທ່ານ ດຣ.ປະນອມ ພອງມະນີ ຮອງຫົວໜ້າກົມອະນາໄມ ແລະຄວບຄຸມພະຍາດຕິດຕໍ່ ກະຊວງສາທາລະນະສຸກ ແລະ ທ່ານ ດຣ. ເວືອງ ແອັງເຢືອງ ຮອງຫົວໜ້າກົມຄຸ້ມຄອງກວດກາ ແລະປິ່ນປົວພະຍາດ ຊວງສາທາລະນະສຸກ ສສ ຫວຽດນາມ ພ້ອມຄະນະ.
    |
 |
|
ບັນຍາກາດທີ່ການເຮັດວຽກ. ພາບ: kpl.gov.la |
ໃນໂອກາດນີ້, ຄະນະທີມແພດຈາກພະແນກສາທາລະນະສຸກແຂວງສະຫວັນນະເຂດ ແລະຄະນະທີມແພດຊ່ຽວຊານ ຈາກ ສສ ຫວຽດນາມ ກໍໄດ້ຜ່ານບົດສະຫລຸບລາຍງານຜົນການຈັດຕັ້ງປະຕິບັດວຽກງານສະກັດກັ້ນ, ຄວບຄຸມ ແລະປ້ອງກັນ ການລະບາດຂອງພະຍາດໂຄວິດ-19. ຈາກນັ້ນ, ຄະນະທີມແພດກໍໄດ້ເຮັດວຽກຮ່ວມກັນ ເຊິ່ງໄດ້ແບ່ງອອກເປັນສອງທີມ ຄື: ທີມຄຸ້ມຄອງກໍລະນີ ແລະ IPC ເຊິ່ງລົງພາກສະໜາມຢູ່ວິທະຍາໄລວິທະຍາສາດສຸຂະພາບ, ທີມທີສອງແມ່ນທີມເຝົ້າລະວັງ, ຄວບຄຸມລະບາດ ແລະຂ້າເຊື້ອ ເຊິ່ງຈະໄດ້ລົງສູນກັກກັນຫລັກ 4, ຈຸດກັກກັນບ່ອນອື່ນໆ, ຈຸດເກັບຕົວຢ່າງ, ເຮັດວຽກຮ່ວມກັບສູນກັກກັນແຮງງານ, ທີມຂ້າເຊື້ອ ແລະລົງພາກສະໜາມຢູ່ໂຮງໝໍແຂວງເປັນຕົ້ນ ຢູ່ຫ້ອງວິເຄາະ, ຫ້ອງ ICU, ຫ້ອງ OPD ແລະ ອື່ນໆ.
ໂດຍ: ຂ່າວສານປະເທດລາວ