ນັກຮຽນລາວ ແຂ່ງຂັນບັນລະຍາຍພາສາຫວຽດນາມ ຮອບຊີງຊະນະເລີດທົ່ວປະເທດ - ມະຫາວິທະຍາໄລທ໊າຍງວຽນ ເປັນເຈົ້າພາບຈັດຕັ້ງ
ກປ.ອອນໄລ - ວັນທີ 8 ພະຈິກ, ກະຊວງສຶກສາ ແລະກໍ່ສ້າງຫວຽດນາມ ສົມທົບກັບສູນກາງສະມາຄົມມິດຕະພາບຫວຽດນາມ-ລາວ ແລະມະຫາວິທະຍາໄລທ໊າຍງວຽນ ຈັດຕັ້ງການແຂ່ງຂັນບັນລະຍາຍພາສາ ຫວຽດນາມ ຮອບຊີງຊະນະເລີດທົ່ວປະເທດໃຫ້ແກ່ນັກຮຽນລາວ ຢູ່ ຫວຽດນາມ ປີ 2019. ນີ້ແມ່ນການແຂ່ງຂັນຄັ້ງທໍາອິດທີ່ຈັດຂຶ້ນໃຫ້ແກ່ນັກຮຽນລາວ ດ້ວຍຂອບຂະໜາດທົ່ວປະເທດ.
ດ້ວຍຫົວຂໍ້ “ຫວຽດນາມ-ປະເທດທີ່ຂ້າພະເຈົ້າຮັກ”, ການແຂ່ງຂັນຄັ້ງນີ້ມີເປົ້າໝາຍສົ່ງເສີມໃຫ້ນັກສຶກສາລາວ ແບ່ງປັນບັນດາຄວາມຮູ້, ຄວາມເຂົ້າໃຈກ່ຽວກັບປະເທດ, ປະຊາຊົນ ແລະວັດທະນະທໍາຫວຽດນາມ; ບັນດາອານຸສອນອັນເລິກເຊິ່ງກ່ຽວກັບຊີວິດ, ການຮໍ່າຮຽນ ແລະການດໍາລົງຊີວິດຢູ່ຫວຽດນາມ. ບັນດານັກສຶກສາລາວ, ດ້ວຍຄວາມຮູ້, ການເຂົ້າຮ່ວມກິດຈະກໍາຕົວຈິງ ແລະອາລົມຈິດຂອງຕົນທີ່ມີຕໍ່ຫວຽດນາມ ຈະໄດ້ໃຊ້ພາສາຫວຽດນາມ ເພື່ອສະແດງທຸກສິ່ງທຸກຢ່າງທີ່ ຕົນເອງມີຄວາມສົນໃຈທີ່ສຸດ.
|
|
ລາຍການບັນລະຍາຍຂອງທີມມະຫາວິທະຍາໄລສ້າງຄູ-ມະຫາວິທະຍາໄລທ໊າຍງວຽນ. ຢູ່ຮອບຄັດເລືອກ. ພາບ: ກິມຢູງ. |
ທ່ານ ສຈ, ປອ. ຟ້າມຮົ່ງກວາງ - ອະທິການບໍດີມະຫາວິທະຍາໄລທ໊າຍງວຽນ ໃຫ້ຮູ້ວ່າ ຮອບຊີງຊະນະເລີດການແຂ່ງຂັນບັນລະຍາຍພາສາຫວຽດນາມ ໃຫ້ແກ່ນັກສຶກສາລາວ ຢູ່ຫວຽດນາມ ປີ 2019 ຈະຈັດຕັ້ງໃນວັນທີ 8 ພະຈິກ 2019 ແລະທ່ານໃຫ້ຮູ້ຕື່ມອີກວ່າ ມະຫາວິທະຍາໄລທ໊າຍງວຽນ ມີນັກສຶກສາສາກົນກວ່າ 1.000 ຄົນທີ່ມາຈາກ 16 ປະເທດໃນໂລກ, ໃນນັ້ນມີນັກສຶກສາລາວກວ່າ 800 ຄົນ. ການເຄື່ອນໄຫວນີ້ແມ່ນໂອກາດເພື່ອໃຫ້ນັກສຶກສາສອງປະເທດຫວຽດນາມ-ລາວ ໄດ້ພົບປະແລກປ່ຽນວັດທະນະທໍາ, ເພີ່ມທະວີຄວາມເຂົ້າໃຈກ່ຽວກັບປະເທດຊາດ ແລະຊາວຫວຽດນາມ ຜ່ານນັ້ນປະກອບສ່ວນຮັດແໜ້ນນໍ້າໃຈສາມັກຄີມິດຕະພາບ ຫວຽດນາມ-ລາວ ຕື່ມອີກ.
|
|
ມະຫາວິທະຍາໄລທ໊າຍງວຽນ, ບ່ອນຈັດຕັ້ງການແຂ່ງຂັນບັນລະຍາຍພາສາຫວຽດນາມ. ພາບ: ກິມຢູງ. |
ປະຈຸບັນ, ມະຫາວິທະຍາໄລທ໊າຍງວຽນ ໄດ້ກະກຽມວຽກງານຢ່າງລະອຽດແລ້ວນັບແຕ່ການຕ້ອນຮັບ, ພະລາທິການ, ສື່ມວນຊົນເພື່ອມຸ່ງໄປເຖິງຜົນສໍາເລັດຢ່າງດີງາມຂອງການແຂ່ງຂັນໃນຮອບຊີງຊະນະເລີດໃນວັນທີ 8 ພະຈິກ ຈະມາເຖິງຢູ່ມະຫາວິທະຍາໄລທ໊າຍງວຽນ.
ໂດຍ: ເກື່ອງດັ້ງ