ການໂອ້ລົມສົນທະນານາຍທະຫານໜຸ່ມກອງທັບສອງປະເທດ ຫວຽດນາມ-ຟີລິບປິນ

ຄະນະຫວຽດນາມ ນໍາໂດຍທ່ານພັນເອກພິເສດ ຫງວຽນວັນນີງ, ຮອງຫົວໜ້າຄະນະຊາວໜຸ່ມກອງທັບ (ກົມໃຫຍ່ການເມືອງກອງທັບປະຊາຊົນຫວຽດນາມ). ຄະນະຟີລິບປິນ ນໍາໂດຍທ່ານພັນເອກ Michael G Barrion, ນາຍທະຫານບໍລິຫານ, ຫ້ອງການ ຮອງຫົວໜ້າເສນາທິການຮັບຜິດຊອບການຄຸ້ມຄອງການເງິນ.

ບັນຍາກາດທີ່ການໂອ້ລົມສົນທະນານາຍທະຫານໜຸ່ມກອງທັບສອງປະເທດ ຫວຽດນາມ-ຟີລິບປິນ. ພາບ: ຮວ່າງຫວູ໋

ການໂອ້ລົມສົນທະນາແມ່ນການເຄື່ອນໄຫວໃນຂອບເຂດລາຍການພົບປະແລກປ່ຽນນາຍທະຫານໜຸ່ມກອງທັບສອງປະເທດ ຫວຽດນາມ-ຟີລິບປິນ. ສອງຝ່າຍເນັ້ນໜັກວ່າ, ລາຍການພົບປະແລກປ່ຽນແມ່ນໂອກາດທີ່ດີເພື່ອພ້ອມກັນແບ່ງປັນຂໍ້ມູນຂ່າວສານ, ບົດຮຽນໃນຂົງເຂດວິຊາການ; ຢືນຢັນຄວາມຕັດສິນໃຈຂອງນາຍທະຫານໜຸ່ມກອງທັບສອງປະເທດໃນການປະກອບສ່ວນພັດທະນາສາຍພົວພັນມິດຕະພາບ, ຄູ່ຮ່ວມມືຍຸດທະສາດ ຫວຽດນາມ-ຟີລິບປິນ.

ສອງຝ່າຍເຫັນດີເປັນເອກະພາບຈະສືບຕໍ່ຍູ້ແຮງວຽກງານການສຶກສາ, ໂຄສະນາໃຫ້ຖັນແຖວນາຍທະຫານໜຸ່ມ ແລະປະຊາຊົນສອງປະເທດກ່ຽວກັບປະຫວັດສາດ, ຄວາມໝາຍຂອງສາຍພົວພັນ ຫວຽດນາມ-ຟີລິບປິນ, ເປັນຕົ້ນແມ່ນເນື່ອງໃນໂອກາດສະເຫຼີມສະຫຼອງ 10 ປີແຫ່ງການຍົກລະດັບການພົວພັນສອງຝ່າຍຂຶ້ນເປັນຄູ່ຮ່ວມມືຍຸດທະສາດໃນປີ 2025, ມຸ່ງໄປເຖິງສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດໃນປີ 2026; ແບ່ງປັນຂໍ້ມູນຂ່າວສານເປັນປະຈຳ, ຕອບໂຕ້ຢ່າງທັນການ, ເຮັດໃຫ້ທຸກກົນອຸບາຍເລ່ລ່ຽມຕ້ານ ແລະທໍາລາຍຂອງອິດທິກໍາລັງປໍລະປັກທີ່ຫວັງແບ່ງແຍກສາຍພົວພັນລະຫວ່າງກອງທັບ ແລະປະຊາຊົນສອງປະເທດ ຖືກປະລາໄຊ; ສືບຕໍ່ຮັກສາການເພີ່ມທະວີການພົບປະແລກປ່ຽນ, ແບ່ງປັນບົດຮຽນພຶດຕິກຳຕົວຈິງໃນວຽກງານວິຊາການ ແລະໃນການປະຕິບັດໜ້າທີ່ທີ່ໄດ້ຮັບມອບໝາຍ.

ໂດຍ: ເຈິ່ນຮວ່ຽນ