ຕອນຄ່ຳວັນທີ 29 ມີນາ, ໂດຍໄດ້ຮັບໜ້າທີ່ເຂົ້າຮ່ວມໜ່ວຍກູ້ໄພຈາກເຫດແຜ່ນດິນໄຫວຢູ່ມຽນມາ, ພັນໂທ ລ້າຍບາແທ່ງ (ໂຮງໝໍທະຫານ 103, ວິທະຍາຄານການແພດກອງທັບ) ໄດ້ກະກຽມເຄື່ອງອຸປະກອນການທະຫານ ແລະເຄື່ອງໃຊ້ທີ່ຈຳເປັນເພື່ອໄປປະຕິບັດງານຢູ່ຕ່າງປະເທດຫຼາຍວັນ. ນີ້ບໍ່ແມ່ນຄັ້ງທຳອິດທີ່ອ້າຍ ແທ່ງ ປະຕິບັດພາລະກິດສາກົນ, ຊ່ວຍເຫຼືອປະເທດເພື່ອນຜ່ານຜ່າເຫດແຜ່ນດິນໄຫວ. ກ່ອນໜ້ານັ້ນ, ກໍໄດ້ເຂົ້າຮ່ວມກັບຄະນະກອງທັບປະຊາຊົນຫວຽດນາມ ໄປຊ່ວຍກູ້ໄພຈາກເຫດແຜ່ນດິນໄຫວຢູ່ຕວກກີ (ເດືອນກຸມພາ 2023), ອ້າຍ ແທ່ງ ໄດ້ມີປະສົບການຫຼາຍຢ່າງ. ດັ່ງນັ້ນ, ການນໍາກົມໃຫຍ່ພະລາທິການ-ເຕັກນິກ ຈຶ່ງມີຄວາມເຊື່ອໝັ້ນ ແລະມອບໃຫ້ອ້າຍເປັນຫົວໜ້າໜ່ວຍເສນາຮັກ.
    |
 |
|
ການນໍາກົມໃຫຍ່ພະລາທິການ-ເຕັກນິກ ມອບຂອງຂວັນໃຫ້ກໍາລັງເສນາຮັກ ກ່ອນທີ່ຈະອອກເດີນທາງໄປປະຕິບັດໜ້າທີ່. ພາບ: ມິງແມ້ງ. |
ພັນໂທ ລ້າຍບາແທ່ງ ໃຫ້ຮູ້ວ່າ: “ຜ່ານການປະຕິບັດໜ້າທີ່ຢູ່ຕວກກີ, ຂ້າພະເຈົ້າຮັບຮູ້ຢ່າງເລິກເຊິ່ງວ່າ ນີ້ແມ່ນໜ້າທີ່ທີ່ຫຍຸ້ງຍາກ, ລຳບາກ, ແຕ່ກໍເປັນກຽດ ແລະພູມໃຈທີ່ສຸດ, ບັນດາກຳລັງຕ້ອງປະຕິບັດໜ້າທີ່ຢ່າງເປັນເອກະລາດ, ຫ່າງໄກຈາກການບັນຊາ, ຊີ້ນຳຂອງກົມກອງ, ຂາດເຂີນທຸກສິ່ງທຸກຢ່າງ; ເຮັດວຽກໜັກ, ຕ້ອງຍາດແຍ່ງໃນແຕ່ລະວິນາທີ, ນາທີ ແລະອາກາດກໍ່ຮ້າຍແຮງທີ່ສຸດ, ຄວາມແຕກຕ່າງກັນກ່ຽວກັບພາສາ ກໍ່ແມ່ນຄວາມຫຍຸ້ງຍາກໃຫຍ່ໃຫ້ແກ່ການເຄື່ອນໄຫວພະຍາບານສຸກເສີນ, ປິ່ນປົວ... ຄຽງຂ້າງນັ້ນ, ຍັງມີອັນຕະລາຍ, ຍ້ອນວ່າພາຍຫຼັງເກີດແຜ່ນດິນໄຫວຍັງປະກົດມີການສັ່ນສະເທືອນ. ແນວໃດກໍ່ຕາມ, ດ້ວຍຈິດໃຈສາກົນອັນສູງສົ່ງ ແລະທາດແທ້ຄຸນສົມບັດຂອງນາຍທະຫານລຸງໂຮ່, ນ້ຳໃຈສຸດເຫື່ອສຸດແຮງປິ່ນປົວຄົນເຈັບຂອງທ່ານໝໍທະຫານ, ພວກຂ້າພະເຈົ້າພ້ອມແລ້ວທີ່ຈະຮັບ ແລະປະຕິບັດສຳເລັດໜ້າທີ່ທີ່ໄດ້ຮັບມອບໝາຍຢ່າງດີເລີດ, ຊ່ວຍຫຼຸດຜ່ອນຄວາມເສຍຫາຍໃຫ້ແກ່ປະຊາຊົນປະເທດເພື່ອນ”.
ໜ່ວຍເສນາຮັກທີ່ເຂົ້າຮ່ວມການແກ້ໄຂຜົນຮ້າຍຢ້ອນຫຼັງຈາກເຫດແຜ່ນດິນໄຫວຢູ່ມຽນມາ ລວມມີ: 1 ທີມກູ້ໄພຈາກໂຮງໝໍທະຫານ 103 (16 ສະຫາຍ); 1 ທີມເສນາຮັກກູ້ໄພຂອງໂຮງໝໍທະຫານ 105 (7 ສະຫາຍ) ແລະ 1 ໜ່ວຍກູ້ໄພ-ສຸກເສີນ ໂຮງໝໍທະຫານ 354 (7 ສະຫາຍ). ໃນນັ້ນ, ມີຫຼາຍຄົນທີ່ມີປະສົບການເຂົ້າຮ່ວມການກູ້ໄພຈາກເຫດແຜ່ນດິນໄຫວຢູ່ຕວກກີ. ພາຍຫຼັງໄດ້ຮັບຄຳສັ່ງຈາກຂັ້ນເທິງ, ໃນຄືນວັນທີ 29 ມີນາ, ບັນດາກົມກອງໄດ້ກະກຽມອຸປະກອນ, ຢາ, ເຄື່ອງໃຊ້ການແພດຢ່າງທັນການເພື່ອຮັບປະກັນການນຳໃຊ້ເຂົ້າໃນວຽກງານກູ້ໄພໃນ 2 ອາທິດ, ປິ່ນປົວຜູ້ປະສົບເຄາະຮ້າຍ 50-100 ຄົນ/ວັນ. ອຸປະກອນພະລາທິການ-ເຕັກນິກ, ເຊັ່ນ: ຕູບຜ້າບັດ, ເຄື່ອງຜະລິດໄຟຟ້າ, ເຄື່ອງປຸງແຕ່ງອາຫານ, ສະບຽງອາຫານ... ກໍ່ໄດ້ຮັບການກະກຽມຢ່າງຮີບດ່ວນ.
ຕອນເຊົ້າວັນທີ 30 ມີນາ, ທີ່ພິທີມອບ-ຮັບໜ້າທີ່ໃຫ້ແກ່ໜ່ວຍເສນາຮັກທີ່ເຂົ້າຮ່ວມແກ້ໄຂຜົນຮ້າຍຢ້ອນຫຼັງຈາກເຫດແຜ່ນດິນໄຫວຢູ່ມຽນມາ, ການນຳກົມໃຫຍ່ພະລາທິການ-ເຕັກນິກ ໄດ້ຍ້ອງຍໍບັນດາກົມກອງ, ບຸກຄົນທີ່ໄດ້ກະກຽມຄວາມພ້ອມໃນການເດີນທາງຢ່າງຮີບດ່ວນ, ຄົບຊຸດ, ຮອບຄອບ, ດ້ວຍຈິດໃຈມີຄວາມຮັບຜິດຊອບສູງ; ພ້ອມທັງເຊື່ອໝັ້ນວ່າ, ໃນທຸກສະພາບການ, ໜ່ວຍເສນາຮັກຍາມໃດກໍ່ຊາບຊຶມຢ່າງເລິກເຊິ່ງແຜນນະໂຍບາຍ, ທັດສະນະ, ແນວທາງການພົວພັນຕ່າງປະເທດຂອງພັກ, ລັດ ແລະຮີດຄອງປະເພນີອັນດີງາມຂອງປະເທດຊາດ, ຂອງກອງທັບປະຊາຊົນຫວຽດນາມ, ຈະປະຕິບັດສຳເລັດໜ້າທີ່ຊ່ວຍເຫຼືອ ແລະປິ່ນປົວຜູ້ປະສົບເຄາະຮ້າຍຈາກເຫດແຜ່ນດິນໄຫວຢູ່ມຽນມາ, ສົມເປັນນັກຮົບເສນາຮັກຂອງທະຫານລຸງໂຮ່.
ໂດຍ: ຈາງຫງວຽນ