ພົນເອກ ຫງວຽນເຕິນເກືອງ ເຂົ້າຮ່ວມວັນບຸນມະຫາສາມັກຄີທົ່ວປວງຊົນທັງຊາດຢູ່ແຂວງ ຮ່ານາມ

ທ່ານພົນເອກ ຫງວຽນເຕິນເກືອງ ສະແດງຄວາມປິຕິຊົມຊື່ນເມື່ອຮູ້ວ່າ ຮ່ານາມ ມີລະດັບເຕີບໂຕສູງສຸດຢູ່ເຂດທົ່ງພຽງແມ່ນ້ຳແດງ, ຢືນອັນດັບທີ 4 ຂອງທົ່ວປະເທດ, ດ້ວຍອັດຕາຄອບຄົວທຸກຍາກເຫຼືອພຽງແຕ່ 2,01%. ພິເສດ, ຄາດວ່າຮອດທ້າຍປີ 2024, ທົ່ວແຂວງຈະມີ 58 ຕາແສງບັນລຸມາດຖານຊົນນະບົດໃໝ່, ຊົນນະບົດກ້າວໜ້າ; ຊົມເຊີຍບັນດາໝາກຜົນ, ຜົນງານທີ່ອົງຄະນະພັກ, ອໍານາດການປົກຄອງ ແລະປະຊາຊົນແຂວງຮ່ານາມ ບັນລຸໄດ້ໃນການພັດທະນາເສດຖະກິດ-ສັງຄົມ, ປັບປຸງການປ້ອງກັນຊາດ-ປ້ອງກັນຄວາມສະຫງົບ, ຍົກສູງຊີວິດການເປັນຢູ່ດ້ານວັດຖຸ, ຈິດໃຈໃຫ້ປະຊາຊົນ.

ທ່ານພົນເອກ ຫງວຽນເຕິນເກືອງ ກ່າວຄໍາເຫັນທີ່ພິທີໄຂວັນບຸນມະຫາສາມັກຄີທົ່ວປວງຊົນທັງຊາດຢູ່ ບ້ານຈູງລຽວ, ຕາແສງ ຕຽນງວ້າຍ, ເທດສະບານຢຸຍຕຽນ, ແຂວງຮ່ານາມ. ພາບ: qdnd.vn

ກ່ຽວກັບຜົນງານພົ້ນເດັ່ນຂອງປະເທດ ແລະກອງທັບໃນໄລຍະຜ່ານມາ, ທ່ານພົນເອກ ຫງວຽນເຕິນເກືອງ ເນັ້ນໜັກວ່າ: ກອງທັບປະຊາຊົນຫວຽດນາມ ສືບຕໍ່ປະຕິບັດພາລະໜ້າທີ່ຂອງກອງທະຫານສູ້ຮົບ ແລະກອງທະຫານປະຕິບັດງານ, ກອງທະຫານອອກແຮງງານທໍາການຜະລິດ; ປະກອບສ່ວນສຳຄັນເຂົ້າໃນບັນດາຜົນງານລວມຂອງປະເທດ ກໍ່ຄືເຂົ້າຮ່ວມບັນດາພັນທະສາກົນ. ທົ່ວກອງທັບຍາມໃດກໍ່ເຊີດຊູຈິດໃຈລະມັດລະວັງການປະຕິວັດ ແລະກຽມພ້ອມສູ້ຮົບສູງ; ເປັນເສນາທິການໃຫ້ພັກ ແລະລັດ ໃນການແກ້ໄຂທຸກກໍລະນີໃຫ້ມີປະສິດທິຜົນຢ່າງທັນການ, ບໍ່ປະໃຫ້ຕົກຢູ່ໃນທ່າຮັບໂດຍບັງເອີນ; ປະກອບສ່ວນສຳຄັນເຂົ້າໃນການຮັກສາສະພາບແວດລ້ອມສັນຕິພາບ ແລະສະຖຽນລະພາບໃຫ້ແກ່ການພັດທະນາຂອງປະເທດ...

ທ່ານພົນເອກ ຫງວຽນເຕິນເກືອງ ມອບຂອງຂວັນໃຫ້ບັນດາຄອບຄົວນະໂຍບາຍ, ຜູ້ມີຄຸນງາມຄວາມດີຢູ່ຕາແສງ ຕຽນງວ້າຍ, ເທດສະບານຢຸຍຕຽນ, ແຂວງຮ່ານາມ. ພາບ: qdnd.vn

ທ່ານພົນເອກ ຫງວຽນເຕິນເກືອງ ຮຽກຮ້ອງໃຫ້ອົງຄະນະພັກ, ອໍານາດການປົກຄອງ ແລະປະຊາຊົນແຂວງຮ່ານາມ ສືບຕໍ່ຍົກສູງຈິດໃຈສາມັກຄີ, ເສີມຂະຫຍາຍມູນເຊື້ອປະຕິວັດຂອງບ້ານເກີດເມືອງນອນ, ປະຕິບັດແຜນນະໂຍບາຍ, ແນວທາງຂອງພັກ, ກົດໝາຍຂອງລັດເປັນຢ່າງດີ; ຜັນຂະຫຍາຍບັນດາມາດຕະການແກ້ໄຂໃນການພັດທະນາເສດຖະກິດ - ສັງຄົມ, ຮັບປະກັນການປ້ອງກັນຊາດ-ປ້ອງກັນຄວາມສະຫງົບ...; ເອົາໃຈໃສ່ສ້າງຮູບແບບຊຸມຊົນຄຸ້ມຄອງເອງເປັນຢ່າງດີ; ຈັດຕັ້ງຂະບວນການເຄື່ອນໄຫວແຂ່ງຂັນຮັກຊາດເປັນຢ່າງດີ, ສົ່ງເສີມປະຊາຊົນເຂົ້າຮ່ວມການກໍ່ສ້າງພັກ, ອໍານາດການປົກຄອງ ແລະອົງການຈັດຕັ້ງມະຫາຊົນໃຫ້ປອດໃສດໝັ້ນຄົງເຂັ້ມແຂງແຕ່ຮາກຖານ.

ໃນບັນຍາກາດເບີກບານມ່ວນຊື່ນຂອງວັນບຸນມະຫາສາມັກຄີທົ່ວປວງຊົນທັງຊາດ, ໂດຍຕາງໜ້າໃຫ້ຄະນະພັກການທະຫານສູນກາງ ແລະກະຊວງປ້ອງກັນປະເທດ, ທ່ານພົນເອກ ຫງວຽນເຕິນເກືອງ ໄດ້ມອບຂອງຂວັນໃຫ້ບັນດາຄອບຄົວນະໂຍບາຍ, ຜູ້ມີຄຸນງາມຄວາມດີ, ຄອບຄົວປະສົບກັບຄວາມຫຍຸ້ງຍາກ, ຜູ້ອາຍຸສູງຢູ່ທ້ອງຖິ່ນ.

ໂດຍ: ທະນາພອນ