ຫວຽດນາມ - ຟີລິບປິນ ຊຸກຍູ້ການຮ່ວມມືດ້ານປ້ອງກັນຊາດ

ທີ່ການຕ້ອນຮັບ, ທ່ານພົນຕີ ຫງວຽນຈ້ອງບິ່ງ ເນັ້ນໜັກວ່າ, ການພົວພັນຮ່ວມມືດ້ານປ້ອງກັນຊາດ ຫວຽດນາມ - ຟີລິບປິນ ໃນໄລຍະຜ່ານມາ ໄດ້ຮັບການຖືເປັນສໍາຄັນຈາກສອງຝ່າຍ, ບັນລຸໄດ້ໝາກຜົນແທດຈິງໃນຫຼາຍຂົງເຂດ ຄື: ແລກປ່ຽນຄະນະຜູ້ແທນທຸກຂັ້ນ, ຮັກສາປະສິດທິຜົນຂອງກົນໄກປຶກສາຫາລື, ການເຈລະຈາ, ການຮ່ວມມືເຫຼົ່າທັບ, ເຫຼົ່າຮົບ, ບໍາລຸງສ້າງ, ການສົມທົບກັນ, ສະໜັບສະໜູນເຊິ່ງກັນ ແລະກັນຢູ່ເວທີປາໄສ ແລະກົນໄກຫຼາຍຝ່າຍ ໂດຍອາຊຽນ ນໍາພາ. ຮັບຮູ້ ແລະຕີລາຄາສູງຜົນການຮ່ວມມືຢ່າງມີປະສິດທິຜົນ ແລະແທດຈິງລະຫວ່າງກຳລັງທະຫານເຮືອສອງປະເທດ ໃນໄລຍະຜ່ານມາ.

ທ່ານພົນຕີ ຫງວຽນຈ້ອງບິ່ງ ຕ້ອນຮັບທ່ານພົນຕີ Toribio Dulinayan Adaci Jr.. ພາບ: qdnd.vn

ທ່ານພົນຕີ ຫງວຽນຈ້ອງບິ່ງ ສະເໜີວ່າ ໃນໄລຍະຈະມາເຖິງ, ສອງຝ່າຍສືບຕໍ່ຮັກສາບັນດາຊ່ອງທາງການພົບປະ ແລະເຮັດວຽກໃນທຸກຂັ້ນ, ທຸກກົນໄກພົບປະແລກປ່ຽນ, ຮ່ວມມື; ເປີດກວ້າງການຮ່ວມມືກ່ຽວກັບການຊ່ວຍເຫຼືອດ້ານມະນຸດສະທຳ ແລະການກູ້ຊ່ວຍໄພພິບັດທາງທະເລ; ເພີ່ມທະວີຂໍ້ມູນຂ່າວສານການຕິດຕໍ່ພົວພັນໂດຍກົງ, ອັບເດດສະພາບການເປັນປະຈຳ, ແກ້ໄຂບັນດາກໍລະນີທີ່ເກີດຂຶ້ນຢູ່ທະເລຢ່າງທັນການ ແລະມີປະສິດທິຜົນ, ແກ້ໄຂເລື່ອງຊາວປະມົງລະເມີດເຂດນ່ານທະເລຂອງກັນຢ່າງມີມະນຸດສະທຳ.

ທ່ານພົນຕີ Toribio Dulinayan Adaci Jr. ສະແດງຄວາມຂອບອົກຂອບໃຈມາຍັງກະຊວງປ້ອງກັນປະເທດຂອງສອງປະເທດ ຫວຽດນາມ ແລະຟີລິບປິນ ເຊິ່ງຍາມໃດກໍ່ໄດ້ສ້າງເງື່ອນໄຂໃຫ້ການຮ່ວມມືລະຫວ່າງກຳລັງທະຫານເຮືອສອງປະເທດ; ຕີລາຄາວ່າ ໃນໄລຍະຜ່ານມາ, ກຳລັງທະຫານເຮືອສອງປະເທດໄດ້ຮັກສາທ່າຮ່ວມມືຢ່າງມີປະສິດທິຜົນ; ຢືນຢັນວ່າ ທະຫານເຮືອຟີລິບປິນ ຖືເປັນສໍາຄັນການພົວພັນຮ່ວມມືກັບທະຫານເຮືອປະຊາຊົນຫວຽດນາມ, ໂດຍສະເພາະແມ່ນໃນການຊ່ວຍເຫຼືອດ້ານມະນຸດສະທຳ ແລະການກູ້ຊ່ວຍໄພພິບັດທາງທະເລ.

ໂດຍ: ທະນາພອນ