ຄວາມໄວ້ເນື້ອເຊື່ອໃຈທາງດ້ານການເມືອງແມ່ນພື້ນຖານ
ທີ່ການພົບປະ, ທ່ານ ໂຕເລິມ ໄດ້ຊົມເຊີຍ ທ່ານ Gerry Brownlee ແລະຄະນະຜູ້ແທນສະພາແຫ່ງຊາດ ນິວຊີແລນ ທີ່ມາຢ້ຽມຢາມຫວຽດນາມ ຢ່າງເປັນທາງການ; ຕີລາຄາສູງຄວາມໝາຍຂອງການຢ້ຽມຢາມທີ່ໄດ້ດຳເນີນໄປໃນໂອກາດທີ່ສອງປະເທດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ນິວຊີແລນ (1975-2025); ກໍ່ຄືໃນໂອກາດສະເຫຼີມສະຫຼອງວັນຊາດທີ 2 ກັນຍາ ຂອງຫວຽດນາມ ຄົບຮອບ 80 ປີ.
ທ່ານ ໂຕເລິມ ໄດ້ຕີລາຄາສູງ ນິວຊີແລນ ເປັນເພື່ອນມິດທີ່ສະໜິດສະໜົມ, ຍາມໃດກໍ່ຮ່ວມເດີນທາງ, ສະໜັບສະໜູນຫວຽດນາມ ໃນພາລະກິດສ້າງສາ ແລະພັດທະນາປະເທດຊາດ; ເນັ້ນໜັກວ່າ ການເພີ່ມທະວີການພົວພັນມິດຕະພາບ ແລະການຮ່ວມມືລະຫວ່າງສອງປະເທດ ບໍ່ພຽງແຕ່ນໍາເອົາຜົນປະໂຫຍດມາໃຫ້ປະຊາຊົນສອງປະເທດເທົ່ານັ້ນ, ຫາກຍັງປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະການຮ່ວມມືລວມໃນພາກພື້ນອາຊີ - ປາຊີຟິກ.
    |
 |
|
ທ່ານ ໂຕເລິມ ເລຂາທິການໃຫຍ່ ແລະທ່ານ Gerry Brownlee ປະທານສະພາແຫ່ງຊາດ ນິວຊີແລນ. ພາບ: qdnd.vn |
ທ່ານເລຂາທິການໃຫຍ່ ສະເໜີໃຫ້ສອງຝ່າຍເພີ່ມທະວີການແລກປ່ຽນຄະນະຜູ້ແທນທຸກຂັ້ນ ແລະຜ່ານບັນດາຊ່ອງທາງຂອງພັກ, ລັດຖະບານ, ສະພາແຫ່ງຊາດ, ປະຊາຊົນ ແລະວິສາຫະກິດ ເພື່ອເພີ່ມທະວີຄວາມເຂົ້າໃຈເຊິ່ງກັນ ແລະກັນ. ທ່ານເລຂາທິການໃຫຍ່ ເນັ້ນໜັກວ່າ ພື້ນຖານເສດຖະກິດ ຫວຽດນາມ ແລະ ນິວຊີແລນ ມີລັກສະນະຊ່ວຍຊູ, ເພີ່ມເຕີມເຊິ່ງກັນແລະກັນ, ຄວາມສາມາດບົ່ມຊ້ອນໃນການຮ່ວມມືລະຫວ່າງສອງປະເທດຍັງໃຫຍ່ຫຼວງ; ໃນສະພາບການເສດຖະກິດ ແລະການຄ້າໂລກມີການຜັນແປຫຼາຍຢ່າງ, ສອງປະເທດຕ້ອງຍູ້ແຮງການຮ່ວມມືດ້ານເສດຖະກິດ, ການຄ້າ ແລະການລົງທຶນ, ສ້າງເງື່ອນໄຂໃຫ້ບັນດາຜະລິດຕະພັນທີ່ມີທ່າແຮງຂອງສອງປະເທດໄດ້ເຂົ້າເຖິງຕະຫຼາດ.
ທ່ານ Gerry Brownlee ໄດ້ສະແດງຄວາມປິຕິຊົມຊື່ນທີ່ໄດ້ເຫັນບາດກ້າວຫັນປ່ຽນສຳຄັນຂອງຫວຽດນາມ ແລະເນັ້ນໜັກວ່າ ນິວຊີແລນ ຖືເປັນສໍາຄັນຕໍ່ບົດບາດຫຼັກແຫຼ່ງຂອງຫວຽດນາມ ໃນພາກພື້ນອາຊີຕາເວັນອອກສ່ຽງໃຕ້, ຖືຫວຽດນາມ ແມ່ນຄູ່ຮ່ວມມືສຳຄັນ ແລະສະໜິດສະໜົມໃນພາກພື້ນ; ຕີລາຄາສູງຕໍ່ເລື່ອງສອງປະເທດໄດ້ແບ່ງປັນຫຼາຍຈຸດທີ່ຄ້າຍຄືກັນ, ພິເສດແມ່ນທັດສະນະກ່ຽວກັບການພັດທະນາໂດຍອີງໃສ່ການເຕີບໂຕເສດຖະກິດສົມທົບກັບການພັດທະນາສັງຄົມ ແລະມະນຸດ; ຢືນຢັນວ່າ ສະພາແຫ່ງຊາດນິວຊີແລນແມ່ນອົງການຕາງໜ້າໃຫ້ແກ່ສຽງເວົ້າຂອງປະຊາຊົນນິວຊີແລນ, ຈະປະກອບສ່ວນຢ່າງຕັ້ງໜ້າເຂົ້າໃນການເພີ່ມທະວີການພົວພັນມິດຕະພາບລະຫວ່າງປະຊາຊົນສອງປະເທດ ແລະນຳຂົງເຂດຮ່ວມມືໃຫ້ເຂົ້າສູ່ລວງເລິກ.
ການນຳສອງທ່ານ ໄດ້ເຫັນດີເປັນເອກະພາບນຳກັນວ່າຈະຮ່ວມມືຢ່າງແໜ້ນແຟ້ນກວ່າອີກໃນບັນດາບັນຫາພາກພື້ນ ແລະສາກົນ. ທ່ານ ໂຕເລິມ ຢືນຢັນວ່າ ຫວຽດນາມ ພ້ອມແລ້ວທີ່ຈະຮ່ວມມື ແລະສະໜັບສະໜູນ ນິວຊີແລນ ເພີ່ມທະວີການພົວພັນກັບ ອາຊຽນ ແລະມຸ່ງໄປເຖິງການຍົກລະດັບການພົວພັນເຈລະຈາ ອາຊຽນ - ນິວຊີແລນ ຂຶ້ນເປັນຄູ່ຮ່ວມມືຍຸດທະສາດຮອບດ້ານໃນປີ 2025.
ມີ 5 ຈຸດກວ່າ
ຕອນບ່າຍວັນດຽວກັນ, ຢູ່ສຳນັກງານນາຍົກລັດຖະມົນຕີ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ໃຫ້ການຕ້ອນຮັບທ່ານ Gerry Brownlee ປະທານສະພາແຫ່ງຊາດ ນິວຊີແລນ ເນື່ອງໃນໂອກາດທີ່ທ່ານປະທານສະພາແຫ່ງຊາດ ມາຢ້ຽມຢາມຫວຽດນາມ ຢ່າງເປັນທາງການ.
ທ່ານ ຟ້າມມິງຈິ໊ງ ຕີລາຄາສູງການພັດທະນາອັນດີງາມ, ແທດຈິງ ແລະຮອບດ້ານຂອງການພົວພັນຮ່ວມມືສອງຝ່າຍນັບແຕ່ສອງປະເທດໄດ້ຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານໃນການຢ້ຽມຢາມຫວຽດນາມ ຢ່າງເປັນທາງການຂອງທ່ານ Christopher Luxon ນາຍົກລັດຖະມົນຕີ ນິວຊີແລນ ໃນເດືອນກຸມພາ 2025.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະທ່ານ Gerry Brownlee ປະທານສະພາແຫ່ງຊາດ ນິວຊີແລນ. ພາບ: qdnd.vn |
ທ່ານປະທານສະພາແຫ່ງຊາດນິວຊີແລນ ຢືນຢັນວ່າ ຫວຽດນາມ ແມ່ນຄູ່ຮ່ວມມືສຳຄັນ, ລັດຖະບານ ແລະສະພາແຫ່ງຊາດນິວຊີແລນ ໄດ້ໃຫ້ບຸລິມະສິດເພີ່ມທະວີການພົວພັນກັບ ຫວຽດນາມ ໃນນະໂຍບາຍການຕ່າງປະເທດຂອງ ນິວຊີແລນ ໃນພາກພື້ນ; ໂດຍໃຫ້ຮູ້ວ່າ, ສະພາແຫ່ງຊາດນິວຊີແລນ ໃຫ້ຄຳໝັ້ນສັນຍາຢ່າງແຂງແຮງເພື່ອສະໜັບສະໜູນການຊຸກຍູ້ການຮ່ວມມືກັບຫວຽດນາມ ໃນທຸກຂົງເຂດ.
ທ່ານ Gerry Brownlee ກໍ່ເຫັນດີເປັນເອກະພາບຕໍ່ກັບຂໍ້ສະເໜີຂອງທ່ານນາຍົກລັດຖະມົນຕີ ຫວຽດນາມ ກ່ຽວກັບ “5 ຈຸດກວ່າ” ເພື່ອແນໃສ່ເຮັດໃຫ້ການພົວພັນຮ່ວມມື ຫວຽດນາມ - ນິວຊີແລນ ໃນທຸກຂົງເຂດ ເລິກເຊິ່ງກ້ວາງຂວາງກວ່າອີກ, ໃນນັ້ນເຮັດໃຫ້ການພົວພັນດ້ານການເມືອງ, ການພົວພັນຕ່າງປະເທດເລິກເຊິ່ງກວ່າ, ເພີ່ມທະວີການແລກປ່ຽນຄະນະຜູ້ແທນ ແລະການພົບປະຂັ້ນສູງ, ຮັກສາກົນໄກຮ່ວມມືສອງຝ່າຍ, ຜັນຂະຫຍາຍບັນດາເອກະສານທີ່ໄດ້ລົງນາມຢ່າງມີປະສິດທິຜົນ.
ການນຳສອງປະເທດກໍ່ໄດ້ເຫັນດີເປັນເອກະພາບເພີ່ມທະວີການຮ່ວມມືດ້ານການສຶກສາ ແລະບຳລຸງສ້າງ, ແລກປ່ຽນນັກຮຽນ, ນັກສຶກສາ, ນັກວິທະຍາສາດ, ນັກຄົ້ນຄ້ວາ; ພິຈາລະນາເປີດສາຍການບິນໂດຍກົງເພື່ອເຊື່ອມຕໍ່ສອງປະເທດໂດຍໄວ, ຊຸກຍູ້ການພົວພັນແລກປ່ຽນປະຊາຊົນ ແລະການຮ່ວມມືດ້ານເສດຖະກິດ, ການຄ້າເປັນຕົ້ນແມ່ນການຮ່ວມມືລະຫວ່າງທ້ອງຖິ່ນ, ສ້າງເງື່ອນໄຂສະດວກໃຫ້ວິສາຫະກິດຂອງສອງປະເທດຊອກຫາກາລະໂອກາດດຳເນີນທຸລະກິດ ແລະການລົງທຶນ.
ສົມທົບກັນຢ່າງແໜ້ນແຟ້ນຢູ່ເວທີປາໄສລັດຖະສະພາຫຼາຍຝ່າຍ
ກ່ອນໜ້ານັ້ນ, ຕອນເຊົ້າວັນທີ 28 ສິງຫາ, ຢູ່ຫໍສະພາແຫ່ງຊາດ, ທ່ານ ເຈິ່ນແທງເໝິນ ປະທານສະພາແຫ່ງຊາດຫວຽດນາມ ໄດ້ເປັນປະທານພິທີຕ້ອນຮັບທ່ານ Gerry Brownlee ປະທານສະພາແຫ່ງຊາດນິວຊີແລນ ຢ່າງສົມກຽດ. ພາຍຫຼັງພິທີຕ້ອນຮັບ, ປະທານສະພາແຫ່ງຊາດສອງທ່ານ ໄດ້ດຳເນີນການພົບປະເຈລະຈາ.
|
|
 |
|
ທ່ານ ເຈິ່ນແທງເໝິນ ປະທານສະພາແຫ່ງຊາດຫວຽດນາມ ແລະທ່ານ Gerry Brownlee ປະທານສະພາແຫ່ງຊາດ ນິວຊີແລນ. ພາບ: qdnd.vn |
ທ່ານ ເຈິ່ນແທງເໝິນ ສະເໜີໃຫ້ສອງຝ່າຍສືບຕໍ່ປັບປຸງ ແລະຮັດແໜ້ນການພົວພັນດ້ານການເມືອງຜ່ານການຢ້ຽມຢາມ ແລະການພົບປະຂັ້ນສູງ, ແລກປ່ຽນຄະນະຜູ້ແທນເພື່ອຖອດຖອນບົດຮຽນລະຫວ່າງກະຊວງ, ຂະແໜງການ ແລະທ້ອງຖິ່ນຂອງສອງປະເທດ, ເພີ່ມທະວີການພົບປະແລກປ່ຽນລະຫວ່າງກໍາມາທິການ, ກຸ່ມສະມາຊິກລັດຖະສະພາມິດຕະພາບ, ບັນດາສະມາຊິກລັດຖະສະພາໜຸ່ມຂອງສອງປະເທດ; ພ້ອມທັງສະເໜີໃຫ້ກະຊວງການຕ່າງປະເທດສອງປະເທດ ສ້າງໂຄງການດໍາເນີນງານໃຫ້ສຳເລັດໂດຍໄວເພື່ອແນໃສ່ຜັນຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານ, ຫັນບັນດາເນື້ອໃນຂອງຂອບເຂດການພົວພັນໃໝ່ໃຫ້ລະອຽດ.
ທ່ານປະທານສະພາແຫ່ງຊາດຫວຽດນາມ ໄດ້ເນັ້ນໜັກເຖິງຄວາມສຳຄັນຂອງການເຮັດໃຫ້ການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບເລິກເຊິ່ງກວ່າ, ປະກອບສ່ວນປົກປັກຮັກສາຄວາມໝັ້ນຄົງແຫ່ງຊາດຂອງແຕ່ລະປະເທດ, ພ້ອມທັງປະກອບສ່ວນຢ່າງແທດຈິງໃຫ້ແກ່ສັນຕິພາບ, ສະຖຽນລະພາບຢູ່ພາກພື້ນ ແລະໃນໂລກ; ສະເໜີ ນິວຊີແລນ ໜູນຊ່ວຍການຝຶກອົບຮົມ, ຍົກສູງກຳລັງຄວາມສາມາດໃຫ້ຫວຽດນາມ ໃນການເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສປຊ...
ໂດຍ: ຈາງຫງວຽນ