ການພົວພັນລະຫວ່າງ ຫວຽດນາມ - ນິວຊີແລນ ແມ່ນໜຶ່ງໃນບັນດາການພົວພັນສອງຝ່າຍທີ່ໄດ້ຮັບການສ້າງມາແຕ່ດົນໃນຂະບວນການທາງການທູດຂອງສອງປະເທດ. ສອງປະເທດໄດ້ສ້າງຕັ້ງການພົວພັນທາງການທູດໃນວັນທີ 19 ມິຖຸນາ 1975, ບໍ່ດົນຫຼັງຈາກຫວຽດນາມ ທ້ອນໂຮມປະເທດຊາດເປັນເອກະພາບ.
ໃນໄລຍະເຄິ່ງສະຕະວັດທີ່ຜ່ານມາ, ເຖິງວ່າຫ່າງໄກກັນທາງດ້ານພູມສັນຖານກໍ່ຕາມ, ແຕ່ ຫວຽດນາມ ແລະ ນິວຊີແລນ ຍັງໄດ້ຢຶດໝັ້ນຕໍ່ການເພີ່ມພູນຄູນສ້າງການພົວພັນ, ນຳການຮ່ວມມືສອງຝ່າຍໃຫ້ນັບມື້ນັບພັດທະນາຢ່າງເລິກເຊິ່ງກວ້າງຂວາງ, ບັນລຸໄດ້ບັນດາຜົນງານສຳຄັນຫຼາຍຢ່າງ.
ຜົນປະໂຫຍດສອງເທົ່າ - ພື້ນຖານຊຸກຍູ້
ເມືຶ່ອແລກປ່ຽນນັກຂ່າວສໍານັກຂ່າວສານຫວຽດນາມ ຢູ່ທະວີບໂອເຊອາເນຍ, ວົງການນັກຊ່ຽວຊານຖືວ່າ ການໂຮມຜົນປະໂຫຍດສອງເທົ່າແມ່ນກຳລັງໜູນຫຼັກແຫຼ່ງຊຸກຍູ້ການພົວພັນຫວຽດນາມ - ນິວຊີແລນ. ທ່ານ ສຈ Roberto Rabel (ສັງກັດມະຫາວິທະຍາໄລ Victoria, Wellington) ວິເຄາະວ່າ ສອງປະເທດໄດ້ເພີ່ມເຕີມໃຫ້ກັນທາງດ້ານເສດຖະກິດ, ພ້ອມທັງແບ່ງປັນຜົນປະໂຫຍດລວມໃນດ້ານການເມືອງ, ການປ້ອງກັນຄວາມສະຫງົບ, ສັງຄົມ, ວັດທະນະທຳ ແລະການພົບປະແລກປ່ຽນປະຊາຊົນ ນັບແຕ່ສອງຝ່າຍຈົນເຖິງພາກພື້ນ ແລະທົ່ວໂລກ.
    |
 |
|
ທ່ານ ສຈ Roberto Rabel. ພາບ: ສໍານັກຂ່າວສານຫວຽດນາມ |
ເສດຖະກິດ ໄດ້ຮັບຖືວ່າເປັນຂົງເຂດເສົາຄ້ຳ. ຫວຽດນາມ ແມ່ນພື້ນຖານເສດຖະກິດເຕີບໂຕໄວ, ເປັນຕະຫຼາດທີ່ມີຜູ້ບໍລິໂພກຂະໜາດໃຫຍ່, ກຳລັງເຊື່ອມໂຍງຢ່າງເລິກເຊິ່ງກວ້າງຂວາງ; ນິວຊີແລນ ມີທ່າແຮງທາງດ້ານກະສິກໍາເຕັກໂນໂລຊີສູງ, ພະລັງງານທົດແທນ ແລະການບໍລິຫານການພັດທະນາແບບຍືນຍົງ.
ທັງສອງປະເທດລ້ວນແຕ່ແມ່ນສະມາຊິກຂອງສັນຍາຄູ່ຮ່ວມມືຮອບດ້ານ ແລະກ້າວໜ້າຂ້າມປາຊີຟິກ (CPTPP) ແລະສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP), ພ້ອມກັນໃຫ້ຄຳໝັ້ນສັນຍາຊຸກຍູ້ການຄ້າເສລີ, ຄວາມຍຸຕິທຳ, ໂດຍອີງໃສ່ລະບຽບກົດໝາຍ. ການເພີ່ມເຕີມໃຫ້ກັນນີ້ ໄດ້ສ້າງກາລະໂອກາດຫຼາຍຢ່າງເພື່ອເປີດກວ້າງການຮ່ວມມືດ້ານການຄ້າ ແລະການລົງທຶນ.
ຄຽງຂ້າງຂົງເຂດເສດຖະກິດແລ້ວ, ການພົວພັນສອງຝ່າຍກໍ່ໄດ້ຮັບການປັບປຸງຍ້ອນບັນດາຄຸນຄ່າລວມກ່ຽວກັບການທູດ. ທ່ານນາງ Suzannah Jessep, ຜູ້ອຳນວຍການກອງທຶນອາຊີ ນິວຊີແລນ ເນັ້ນໜັກວ່າ: ຫວຽດນາມ ແລະ ນິວຊີແລນ ລ້ວນແຕ່ຕັ້ງໜ້າເຂົ້າຮ່ວມການສ້າງຄວາມເປັນລະບຽບຂອງພາກພື້ນ, ພ້ອມກັນໃຫ້ຄໍາໝັ້ນສັນຍາຕໍ່ກັບກົດໝາຍສາກົນ, ລະບົບການຄ້າເປີດ ແລະສັນຕິພາບ, ສະຖຽນລະພາບຂອງພາກພື້ນ. ການຮ່ວມມືດັ່ງກ່າວ ໄດ້ປະກອບສ່ວນສ້າງຄວາມໄວ້ເນື້ອເຊື່ອໃຈຍຸດທະສາດ, ຊ່ວຍໃຫ້ສອງປະເທດສົມທົບກັນຢ່າງມີປະສິດທິຜົນຢູ່ເວທີປາໄສຫຼາຍຝ່າຍ.
ສຈ Damon Salesa (ສັງກັດມະຫາວິທະຍາໄລເຕັກໂນໂລຍີ Auckland) ຖືວ່າ ການຍົກລະດັບການພົວພັນໄປເປັນຄູ່ຮ່ວມມືຍຸດທະສາດຮອບດ້ານ ໄດ້ສະແດງໃຫ້ເຫັນຄວາມໄວ້ເນື້ອເຊື່ອໃຈນັບມື້ນັບເລິກເຊິ່ງ, ການເຊື່ອມຕໍ່ຍຸດທະສາດສູງ ແລະກາລະໂອກາດການຮ່ວມມືທີ່ກວ້າງຂວາງກວ່າ, ພ້ອມທັງສ້າງຂອບເຂດການຮ່ວມມືຢ່າງເປັນລະບົບ, ມີໂຄງສ້າງໃຫ້ແກ່ການຮ່ວມມືໃນຫຼາຍຂົງເຂດ ຄື: ການຄ້າ, ການປ້ອງກັນຄວາມສະຫງົບ, ການສຶກສາ, ການເຊື່ອມຕໍ່ປະຊາຊົນ.
ຄວາມສາມາດບົ່ມຊ້ອນການຮ່ວມມືຍັງໃຫຍ່ຫຼວງ
ບັນດານັກຮຽນຮູ້ ລ້ວນແຕ່ເຫັນດີເປັນເອກະພາບວ່າ ຄວາມສາມາດບົ່ມຊ້ອນການຮ່ວມມືລະຫວ່າງ ຫວຽດນາມ ແລະ ນິວຊີແລນ ຍັງກວ້າງຂວາງ. ສຈ Roberto Rabel ໄດ້ເນັ້ນໜັກເຖິງລະດັບຄວາມສໍາຄັນຂອງການກໍານົດຂົງເຂດທີ່ມີຄວາມສາມາດບົ່ມຊ້ອນທີ່ສຸດ ແລະການຜັນຂະຫຍາຍໂຄງການທີ່ລະອຽດ, ດ້ວຍການເຂົ້າຮ່ວມຂອງລັດຖະບານ, ວິສາຫະກິດ ແລະອົງການຈັດຕັ້ງສັງຄົມ. ຂົງເຂດຕ່າງໆເຊັ່ນການສຶກສາ, ການປ່ຽນແປງໃໝ່ກະສິກໍາ, ການບໍລິຫານທີ່ດີ ໄດ້ຮັບຖືວ່າ ເປັນເສົາຄ້ຳບຸລິມະສິດ.
ໃນມູມມອງອື່ນ, ທ່ານນາງ Suzannah Jessep ໃຫ້ຂໍ້ສັງເກດວ່າ ໃນໄລຍະຮ່ວມມືທີ່ຈະມາເຖິງ ຈະໄດ້ຮັບການຊຸກຍູ້ດ້ວຍຄວາມເຂັ້ມແຂງຂອງເສດຖະກິດຫວຽດນາມ ແລະຍຸດທະສາດເພີ່ມທະວີການມີໜ້າຂອງນິວຊີແລນ ຢູ່ອາຊີ. ສິ່ງດັ່ງກ່າວຈະຊ່ວຍໃຫ້ການພົວພັນບໍ່ພຽງແຕ່ເປີດກວ້າງສອງຝ່າຍເທົ່ານັ້ນ, ຫາກຍັງປັບປຸງຄວາມໝັ້ນຄົງໃນພາກພື້ນອີກດ້ວຍ.
ການສຶກສາໄດ້ຮັບການຕີລາຄາວ່າ ເປັນໜຶ່ງໃນບັນດາເສົາຄ້ໍາຫຼັກແຫຼ່ງ. ຕາມ ສຈ Damon Salesa ແລ້ວ, ການຮ່ວມມືດ້ານການສຶກສາບໍ່ພຽງແຕ່ກໍ່ສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງເທົ່ານັ້ນ, ຫາກຍັງເພີ່ມທະວີຄວາມເຂົ້າໃຈເຊິ່ງກັນ ແລະກັນ, ສ້າງການເຊື່ອມຕໍ່ປະຊາຊົນ - ເຊິ່ງເປັນປັດໃຈຫຼັກແຫຼ່ງໃນການຮັກສາສາຍພົວພັນແບບຍືນຍົງອີກດ້ວຍ. ນີ້ແມ່ນວິທີການສ້າງຜູ້ນຳໃນອະນາຄົດທີ່ມີຈິນຕະນາການທົ່ວໂລກ, ເຂົ້າໃຈວັດທະນະທຳສອງຝ່າຍ.
|
|
 |
|
ທ່ານນາງ Suzannah Jessep, ຜູ້ອຳນວຍການຝ່າຍບໍລິຫານກອງທຶນອາຊີ-ນິວຊີແລນ. ພາບ: ສໍານັກຂ່າວສານຫວຽດນາມ |
ເຖິງຢ່າງໃດກໍຕາມ, ໃນປະຈຸບັນສະພາບການທົ່ວໂລກພວມຜັນແປຫຼາຍຢ່າງ, ນັບແຕ່ການແກ່ງແຍ້ງຍຸດທະສາດຈົນເຖິງການປະທະກັນໃນພາກພື້ນ, ການປ່ຽນແປງຂອງດິນຟ້າອາກາດ ແລະຄວາມໝັ້ນຄົງທີ່ບໍ່ແມ່ນການທະຫານ. ນັກຄົ້ນຄວ້າ Jim Rolfe (ສັງກັດມະຫາວິທະຍາໄລ Victoria) ຖືວ່າ ການພົວພັນ ຫວຽດນາມ - ນິວຊີແລນ ຕ້ອງປັບຕົວດ້ວຍການເປີດກວ້າງການຮ່ວມມືດ້ານເສດຖະກິດ ແລະການທູດຫຼາຍຝ່າຍ, ພ້ອມທັງເພີ່ມທະວີກຳລັງຄວາມສາມາດດ້ານປ້ອງກັນຊາດ. ສິ່ງດັ່ງກ່າວນີ້ຈະຊ່ວຍໃຫ້ສອງປະເທດປະກອບສ່ວນເຂົ້າໃນການສ້າງໂຄງປະກອບມະຫາສະໝຸດອິນເດຍ - ປາຊີຟິກ ທີ່ມີສະຖຽນລະພາບ ແລະມີຄວາມດຸ່ນດ່ຽງ.
ດ້ວຍພື້ນຖານການຮ່ວມມມື 50 ປີ, ຄວາມຄ້າຍຄືກັນກ່ຽວກັບຜົນປະໂຫຍດ ແລະຄວາມຕັດສິນໃຈທາງດ້ານການເມືອງ, ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ນິວຊີແລນ ໄດ້ມີເງື່ອນໄຂອັນຄົບຖ້ວນເພື່ອພັດທະນາຢ່າງເລິກເຊິ່ງກວ້າງຂວາງກວ່າອີກ. ຜົນສຳເລັດແມ່ນຂຶ້ນກັບຄວາມສາມາດຂອງສອງປະເທດໃນການສ້າງວິໄສທັດຮ່ວມກັນ, ການລົງທຶນໃສ່ມະນຸດ, ພື້ນຖານໂຄງລ່າງທີ່ປະດິດສ້າງ ແລະການເຊື່ອມຕໍ່ທົ່ວໂລກ; ພ້ອມທັງ ເປີດກວ້າງການຮ່ວມມືໃນຂົງເຂດທີ່ພົ້ນເດັ່ນ ເຊັ່ນ: ການປ່ຽນແປງຂອງດິນຟ້າອາກາດ, ຄວາມໝັ້ນຄົງທາງດ້ານສະບຽງອາຫານ, ຄວາມຍຸຕິທຳທາງດີຈີຕອນ, ການທ່ອງທ່ຽວ ແລະການຄົ້ນຄວ້າວິທະຍາສາດ.
ການພົວພັນຄູ່ຮ່ວມມືທີ່ເລິກເຊິ່ງ ແລະມີຈຸດສຸມກວ່າ ບໍ່ພຽງແຕ່ຈະນຳເອົາຜົນປະໂຫຍດຕົວຈິງມາໃຫ້ປະຊາຊົນສອງປະເທດເທົ່ານັ້ນ, ຫາກຍັງປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະການພັດທະນາແບບຍືນຍົງຢູ່ພາກພື້ນອີກດ້ວຍ. ຍິ່ງໄປກວ່ານັ້ນ, ສິ່ງດັ່ງກ່າວຍັງສາມາດກາຍເປັນຮູບແບບການຮ່ວມມືທີ່ເປັນແບບຢ່າງເພື່ອໃຫ້ບັນດາປະເທດອື່ນທາບທາມ ແລະເຂົ້າຮ່ວມ, ປະກອບສ່ວນສ້າງຄວາມເປັນລະບຽບຂອງພາກພື້ນຢ່າງເປີດອົກເປີດໃຈ, ສັນຕິພາບ ແລະວັດທະນາຖາວອນ.
ໂດຍ: ຈາງຫງວຽນ