ທີ່ກອງປະຊຸມ, ທ່ານ ເລມິງຮືງ ນາຍົກລັດຖະມົນຕີ ຢືນຢັນວ່າ ຫວຽດນາມ ກຳລັງມານະພະຍາຍາມມຸ່ງໄປເຖິງເປົ້າໝາຍຫຼຸດຜ່ອນການປ່ອຍອາຍພິດລົງເປັນ 0 ໃນປີ 2050, ກຳນົດການພັດທະນາພະລັງງານທົດແທນ ແລະການຫັນເປັນສີຂຽວ ແມ່ນບຸລິມະສິດຍຸດທະສາດ.

leftcenterrightdel
ທ່ານ ເລມິງຮືງ ນາຍົກລັດຖະມົນຕີ ກ່າວຄຳປາໄສທີ່ກອງປະຊຸມສຸດຍອດ ປະຊາຄົມຫຼຸດຜ່ອນການປ່ອຍອາຍພິດລົງເປັນ 0 ອາຊີ (AZEC) ເປີດກວ້າງ. ພາບ: ສໍານັກຂ່າວສານຫວຽດນາມ.

ທ່ານນາຍົກລັດຖະມົນຕີຫວຽດນາມ ໄດ້ສະເໜີໃຫ້ສາມທິດທາງການຮ່ວມມືທີ່ສຳຄັນເພື່ອແກ້ໄຂບັນຫາພະລັງງານ ແລະຮັກສາລະບົບຕ່ອງໂສ້ການສະໜອງ. ທີໜຶ່ງ, ໃນໄລຍະສັ້ນ, ບັນດາປະເທດຕ້ອງເພີ່ມທະວີການຮ່ວມມື ແລະການສົມທົບກັນນະໂຍບາຍເພື່ອແນໃສ່ຫັນແຫຼ່ງການສະໜອງພະລັງງານເປັນຫຼາຍຮູບຫຼາຍແບບ, ຫັນການຄ້າເປັນສະດວກ ແລະຮັກສາລະບົບຕ່ອງໂສ້ການສະໜອງທີ່ໝັ້ນຄົງ, ເປັນຕົ້ນແມ່ນກ່ຽວກັບພະລັງງານ ແລະສະບຽງອາຫານ. ທີສອງ, ໃນໄລຍະກາງ ແລະໄລຍະຍາວ, ຕ້ອງຍົກສູງການເປັນເຈົ້າຕົນເອງກ່ຽວກັບຍຸດທະສາດ ແລະກໍາລັງຄວາມສາມາດຕ້ານທານຂອງພື້ນຖານເສດຖະກິດໂດຍຜ່ານການພັດທະນາພື້ນຖານໂຄງລ່າງພະລັງງານຢ່າງຄົບຊຸດ, ເພີ່ມທະວີການສຳຮອງຍຸດທະສາດ ແລະຍູ້ແຮງການຖ່າຍທອດເຕັກໂນໂລຊີ. ທີສາມ, ຕ້ອງຍູ້ໄວການຜັນຂະຫຍາຍບັນດາໂຄງການຮ່ວມມືໃນຂອບເຂດ AZEC ຢ່າງມີປະສິດທິຜົນ, ແທດຈິງ, ໂດຍສອດຄ່ອງກັບກໍາລັງຄວາມສາມາດ ແລະເງື່ອນໄຂຕົວຈິງຂອງແຕ່ລະປະເທດ.

ທ່ານນາງນາຍົກລັດຖະມົນຕີຍີ່ປຸ່ນ ໄດ້ຂອບໃຈບົດກ່າວປາໄສທີ່ເລິກເຊິ່ງ, ເໝາະສົມກັບສະພາບການໃນປະຈຸບັນ ແລະບັນດາຂໍ້ສະເໜີຂອງການນໍາຫວຽດນາມ ແລະບັນດາປະເທດອື່ນໆ, ພ້ອມທັງ ໃຫ້ຮູ້ວ່າ ຈະມອບໃຫ້ບັນດາອົງການທີ່ກ່ຽວຂ້ອງຂອງຍີ່ປຸ່ນ ແລກປ່ຽນກັບບັນດາປະເທດ ເພື່ອຫັນຂໍ້ລິເລີ່ມດັ່ງກ່າວເປັນລະອຽດໂດຍໄວ.

ໂດຍ: ຈາງຫງວຽນ