ການຢ້ຽມຢາມໄດ້ດໍາເນີນໄປໃນສະພາບການໂລກ ພວມຢືນຢູ່ຕໍ່ໜ້າການຫັນປ່ຽນທາງດ້ານການເມືອງ-ຄວາມໝັ້ນຄົງ, ເສດຖະກິດຢ່າງເລິກເຊິ່ງ, ວ່ອງໄວ, ມີຜົນກະທົບເລິກເຊິ່ງກວ້າງຂວາງ, ມີລັກສະນະບາດລ້ຽວ ແລະສ່ອງແສງໃຫ້ເຫັນໄລຍະການຫັນປ່ຽນຈາກລະບຽບໂລກເກົ່າໄປສູ່ລະບຽບໂລກໃໝ່. ພາກພື້ນອາຊີ-ປາຊີຟິກ ແລະມະຫາສະໝຸດອິນເດຍ ຍັງຄົງຮັກສາບົດບາດໃຈກາງແຫ່ງການເຕີບໂຕຂອງເສດຖະກິດໂລກ, ແຕ່ກໍ່ແມ່ນໜຶ່ງໃນບັນດາຈຸດສຸມຂອງການແກ່ງແຍ້ງຍຸດທະສາດລະຫວ່າງບັນດາປະເທດໃຫຍ່.
ເລື່ອງທ່ານນາຍົກລັດຖະມົນຕີສະໂລວາກີ ເລືອກມາຫວຽດນາມ ຢ້ຽມຢາມເປັນປະເທດທຳອິດຢູ່ພາກພື້ນອາຊີຕາເວັນອອກສ່ຽງໃຕ້ ໄດ້ສະແດງໃຫ້ເຫັນການຖືເປັນສຳຄັນຕໍ່ການພົວພັນ ຫວຽດນາມ-ສະໂລວາກີ, ກໍ່ຄືຖານະບົດບາດ ແລະທີ່ຕັ້ງຂອງຫວຽດນາມ ຢູ່ພາກພື້ນອາຊີ-ປາຊີຟິກ.
ຫວຽດນາມ ແລະ ສະໂລວາກີ ມີການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືອັນດີງາມ, ເຊິ່ງໄດ້ຮັບການສືບທອດ ແລະເສີມຂະຫຍາຍຈາກການພົວພັນລະຫວ່າງຫວຽດນາມ ແລະ ເຊັກໂກສະໂລວາກີ. ກ່ຽວກັບດ້ານການເມືອງ-ການທູດ, ສອງຝ່າຍໄດ້ຮັກສາການແລກປ່ຽນຄະນະຜູ້ແທນທຸກລະດັບ ແລະ ການພົບປະຂັ້ນສູງຢ່າງເປັນປະຈໍາ, ສະໜັບສະໜູນເຊິ່ງກັນ ແລະກັນ ຢູ່ເວທີປາໄສຫຼາຍຝ່າຍ... ພັກກຳອຳນາດແນວທາງ-ປະຊາທິປະໄຕສັງຄົມ (Smer-SD) ແລະ ບັນດາພັກການເມືອງອື່ນໆ ໃນພັນທະມິດກໍາອໍານາດຂອງທ່ານນາຍົກລັດຖະມົນຕີ ກໍ່ໄດ້ເອົາໃຈໃສ່ເປັນພິເສດເຖິງການເພີ່ມທະວີການຮ່ວມມືດ້ານການເມືອງ ກັບພັກກອມມູນິດຫວຽດນາມ. ການຮ່ວມມືຜ່ານຊ່ອງທາງສະພາແຫ່ງຊາດ ໄດ້ຮັບການຮັກສາໄວ້ຢ່າງເປັນປະຈໍາໂດຍຜ່ານການແລກປ່ຽນຄະນະຜູ້ແທນກັບບັນດາກຳມາທິການສະເພາະກິດ.
    |
 |
|
ຫວຽດນາມ - ສະໂລວາກີ ຍົກລະດັບການພົວພັນສອງຝ່າຍ. ພາບ: ສໍານັກຂ່າວສານຫວຽດນາມ |
ການຮ່ວມມືດ້ານເສດຖະກິດ, ການຄ້າ ແລະການລົງທຶນ ແມ່ນເສົາຄ້ຳສຳຄັນໃນການພົວພັນສອງປະເທດ. ໃນໄລຍະຜ່ານມາ, ການຄ້າສອງຝ່າຍມີບາດກ້າວເຕີບໂຕຢ່າງຕັ້ງໜ້າ, ດ້ວຍວົງເງິນການຄ້າສອງສົ້ນໃນປີ 2025 ບັນລຸ 1,78 ຕື້ໂດລາສະຫະລັດ. ໄລ່ຮອດເດືອນທັນວາ ປີ 2025, ສະໂລວາກີ ມີ 16 ໂຄງການລົງທຶນໂດຍກົງທີ່ຍັງມີຜົນສັກສິດຢູ່ຫວຽດນາມ ດ້ວຍເງິນລົງທຶນຈົດທະບຽນທັງໝົດແມ່ນ 140,87 ລ້ານໂດລາສະຫະລັດ, ຢູ່ອັນດັບທີ 47 ໃນຈໍານວນ 153 ປະເທດ ແລະ ເຂດແຄ້ວນທີ່ລົງທຶນ ຢູ່ຫວຽດນາມ. ໃນນັ້ນ, ມີ 2 ໂຄງການ ໄດ້ລົງທຶນໃສ່ຂົງເຂດອຸດສາຫະກຳປຸງແຕ່ງ ແລະປະດິດສ້າງ, 1 ໂຄງການດໍາເນີນທຸລະກິດອະສັງຫາລິມະຊັບ ແລະ 2 ໂຄງການລົງທຶນໃສ່ຂົງເຂດກໍ່ສ້າງ. ຫວຽດນາມ ກໍ່ມີ 1 ໂຄງການລົງທຶນ ຢູ່ສະໂລວາກີ ດ້ວຍເງິນລົງທຶນທັງໝົດແມ່ນ 447.000 ໂດລາສະຫະລັດ, ຖືກຈັດຢູ່ອັນດັບທີ 74 ໃນຈໍານວນ 85 ປະເທດ ແລະເຂດແຄ້ວນທີ່ມີການລົງທຶນຂອງຫວຽດນາມ. ສະໂລວາກີ ແມ່ນໜຶ່ງໃນບັນດາປະເທດເອີລົບ (EU) ທີ່ໄດ້ໃຫ້ສັດຕະຍາບັນສັນຍາປົກປ້ອງການລົງທຶນ EVIPA ໄວທີ່ສຸດ (ໃນເດືອນກຸມພາ 2023).
ການຮ່ວມມືດ້ານການສຶກສາ-ບໍາລຸງກໍ່ສ້າງ, ແຮງງານ ແລະການທ່ອງທ່ຽວ ສືບຕໍ່ໄດ້ຮັບຄວາມເອົາໃຈໃສ່ ແລະຊຸກຍູ້ຈາກສອງຝ່າຍ. ການຮ່ວມມືດ້ານແຮງງານໄດ້ຮັບການຜັນຂະຫຍາຍ ບົນພື້ນຖານບົດບັນທຶກຊ່ວຍຈໍາກ່ຽວກັບການຮ່ວມມືດ້ານແຮງງານ (MOU) ປີ 2008, ໄດ້ນຳເອົາຜູ້ອອກແຮງງານທີ່ມີສີມືສູງຂອງຫວຽດນາມ ໄປເຮັດວຽກ ຢູ່ສະໂລວາກີ. ກ່ຽວກັບດ້ານການທ່ອງທ່ຽວ, ຫວຽດນາມ ໄດ້ນໍາ ສະໂລວາກີ ເຂົ້າໃນບັນຊີລາຍຊື່ຍົກເວັ້ນວີຊາຕາມໂຄງການສົ່ງເສີມພັດທະນາການທ່ອງທ່ຽວໃນເດືອນສິງຫາ ປີ 2025.
ການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ ໄດ້ຮັບການປັບປຸງຢ່າງບໍ່ຢຸດຢັ້ງ ແລະບັນລຸໄດ້ໝາກຜົນທີ່ຕັ້ງໜ້າບົນພື້ນຖານບົດບັນທຶກຊ່ວຍຈໍາກ່ຽວກັບການຮ່ວມມືດ້ານປ້ອງກັນຊາດ ທີ່ໄດ້ລົງນາມໃນປີ 2015. ສອງຝ່າຍໄດ້ເພີ່ມທະວີການສົມທົບກັນໃນຂອບເຂດໜັງສືເຈດຈຳນົງ ວ່າດ້ວຍການເພີ່ມທະວີການຮ່ວມມືສອງຝ່າຍໃນຂົງເຂດຕ້ານ ແລະສະກັດກັ້ນອາດຊະຍາກຳ ປີ 2025.
ເລື່ອງຫວຽດນາມ ຕ້ອນຮັບທ່ານນາຍົກລັດຖະມົນຕີສະໂລວາກີ ມາຢ້ຽມຢາມຢ່າງເປັນທາງການ ແມ່ນສະແດງໃຫ້ເຫັນເຖິງແນວທາງການພົວພັນຕ່າງປະເທດ ເອກະລາດ, ເປັນເຈົ້າຕົນເອງ, ຫັນເປັນຫຼາຍຝ່າຍ, ຫຼາຍຮູບຫຼາຍແບບ; ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນຢ່າງຮອບດ້ານ, ເລິກເຊິ່ງກວ້າງຂວາງ ແລະ ມີປະສິດທິຜົນ ຂອງກອງປະຊຸມໃຫຍ່ ຄັ້ງທີ XIV ຂອງພັກ, ມະຕິເລກທີ 59-NQ/TW ລົງວັນທີ 24 ມັງກອນ ປີ 2025 ຂອງກົມການເມືອງ ວ່າດ້ວຍການເຊື່ອມໂຍງເຂົ້າກັບສາກົນໃນສະພາບການໃໝ່.
ການຢ້ຽມຢາມຍັງເປັນການຢັ້ງຢືນນະໂຍບາຍທີ່ສະເໝີຕົ້ນສະເໝີປາຍຂອງຫວຽດນາມ ແມ່ນຍາມໃດກໍ່ຖືເປັນສໍາຄັນ ແລະປາດຖະໜາຢາກປັບປຸງສາຍພົວພັນກັບບັນດາປະເທດເພື່ອນມິດອັນເປັນມູນເຊື້ອ, ໃນນັ້ນມີສະໂລວາກີ; ສະແດງໃຫ້ເຫັນຄວາມຕັດສິນໃຈພ້ອມກັບ ສະໂລວາກີ ຊຸກຍູ້ສາຍພົວພັນສອງປະເທດໃຫ້ເຂົ້າສູ່ລວງເລິກ, ມີປະສິດທິຜົນ, ຊຸກຍູ້ການຮ່ວມມືໃນຂົງເຂດການເມືອງ-ການທູດ, ເສດຖະກິດ-ການຄ້າ-ການລົງທຶນ, ການປ້ອງກັນຊາດ, ປ້ອງກັນຄວາມສະຫງົບ ແລະເປີດກວ້າງການຮ່ວມມືໃນຂົງເຂດທີ່ມີຄວາມສາມາດບົ່ມຊ້ອນ, ຄື: ວິທະຍາສາດ-ເຕັກໂນໂລຢີ, ເຕັກໂນໂລຢີຂໍ້ມູນຂ່າວສານ, ກະສິກໍາ, ສິ່ງແວດລ້ອມ, ວັດທະນະທໍາ, ການສຶກສາ, ແຮງງານ, ການທ່ອງທ່ຽວ, ການຮ່ວມມືທ້ອງຖິ່ນ ແລະການພົບປະແລກປ່ຽນປະຊາຊົນ... ເຊິ່ງສອດຄ່ອງກັບການຍົກລະດັບສາຍພົວພັນສອງຝ່າຍໃນສະພາບການໃໝ່.
ພວກເຮົາເຊື່ອໝັ້ນວ່າ ການຢ້ຽມຢາມຫວຽດນາມ ຂອງທ່ານ Robert Fico ນາຍົກລັດຖະມົນຕີສະໂລວາກີ ຈະປະສົບຜົນສຳເລັດຢ່າງຈົບງາມ, ນຳສາຍພົວພັນສອງຝ່າຍຫວຽດນາມ-ສະໂລວາກີ ກ້າວເຂົ້າສູ່ໄລຍະພັດທະນາໃໝ່ທີ່ເຕັມໄປດ້ວຍການຈະເລີນເຕີບໂຕ, ນຳເອົາຜົນປະໂຫຍດແທດຈິງມາໃຫ້ປະຊາຊົນສອງປະເທດ.
ໂດຍ: ທູຈາງ