ທ່ານນາຍົກລັດຖະມົນຕີ ຟ້າມມິງຈິ໊ງ ກວດກາບັນດາກິດຈະກໍາຮັບໃຊ້ກອງປະຊຸມ APEC 2027
ກປ.ອອນໄລ - ຕອນເຊົ້າວັນທີ 28 ມັງກອນ, ຢູ່ທີ່ແຂວງ ອານຢາງ, ທ່ານ ຟ້າມມິງຈິ໊ງ ນາຍົກລັດຖະມົນຕີ ໄດ້ລົງກວດກາ ແລະ ກະຕຸກຊຸກຍູ້ການຜັນຂະຫຍາຍບັນດາໂຄງການກໍ່ສ້າງຮັບໃຊ້ກອງປະຊຸມເວທີຮ່ວມມືເສດຖະກິດ ອາຊີ - ປາຊີຟິກ (APEC) 2027 ທີ່ຈະດຳເນີນຢູ່ເຂດເສດຖະກິດພິເສດ ຝູ໋ກວກ.
    |
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີ ມອບຂອງຂວັນໃຫ້ບັນດາຫົວໜ່ວຍລົງມືກໍ່ສ້າງສະໜາມບິນສາກົນຝູ໋ກວກ. ພາບ: ສໍານັກຂ່າວສານຫວຽດນາມ |
ລົງກວດກາ, ກະຕຸກຊຸກຍູ້ ແລະມອບຂອງຂວັນລະດົມກຳລັງໃຈບັນດາກໍາລັງທີ່ພວມລົງມືກໍ່ສ້າງສະໜາມບິນສາກົນ ຝູ໋ກວກ, ທ່ານ ຟ້າມມິງຈິ໊ງ ຮຽກຮ້ອງໃຫ້ບໍລິສັດຮັບເໝົາ ລະດົມກໍາລັງ, ພາຫະນະ ແລະລະດົມບໍລິສັດຮັບເໝົາສໍາຮອງຕື່ມອີກ, ຈັດຕັ້ງການລົງມືກໍ່ສ້າງໃນວັນພັກບຸນເຕັດ ແລະຍາດແຍ່ງເວລາໃນລະດູແລ້ງ, ຍູ້ໄວຄວາມຄືບໜ້າຜັນຂະຫຍາຍໂຄງການ, ແຕ່ຮັບປະກັນດ້ານເຕັກນິກ, ຄວາມງາມ, ຄຸນນະພາບ, ຄວາມປອດໄພ, ສິ່ງແວດລ້ອມ. ທ່ານນາຍົກລັດຖະມົນຕີ ຍັງຮຽກຮ້ອງໃຫ້ກໍ່ສ້າງສະໜາມບິນສາກົນ ຝູ໋ກວກ ຕາມທິດ “ສ້າງສະໜາມບິນສີຂຽວ, ຫັນສະໜາມບິນເປັນດີຈີຕອນ, ຍົກສູງປະສິດທິຜົນສະໜາມບິນຢ່າງສຸດຂີດ”.
ຕອນເຊົ້າວັນດຽວກັນ, ທ່ານ ຟ້າມມິງຈິ໊ງ ໄດ້ເຂົ້າຮ່ວມພິທີເລີ່ມລົງມືກໍ່ສ້າງ 2 ໂຄງການ ຄື: ເຂດຕົວເມືອງປະສົມ-ດິນແດງ ແລະ ເຂດຕົວເມືອງປະສົມການທ່ອງທ່ຽວຊີວະພາບ ພູອົງກວ໋ານ.
ຕອນທ່ຽງວັນດຽວກັນ, ທ່ານ ຟ້າມມິງຈິ໊ງ ນາຍົກລັດຖະມົນຕີ ໄດ້ເປັນປະທານການເຮັດວຽກກັບບັນດາກະຊວງ, ຂະແໜງການ, ທ້ອງຖິ່ນ, ແຂວງອານຢາງ, ບັນດາເຈົ້າຂອງໂຄງການ ເພື່ອແນໃສ່ແກ້ໄຂຄວາມຫຍຸ້ງຍາກ, ຂໍ້ຕິດຂັດ, ຊຸກຍູ້ການຜັນຂະຫຍາຍບັນດາໂຄງການຮັບໃຊ້ APEC.
ໂດຍ: ທູຈາງ