ປັບປຸງນໍ້າໃຈມິດຕະພາບຫວຽດນາມ - ຣູມານີ

ກ່າວຄຳເຫັນທີ່ເຫດການ, ທ່ານ ໂຮ່ກວາງເລີ້ຍ ປະທານສະມາຄົມມິດຕະພາບຫວຽດນາມ-ຣູມານີ ໄດ້ທົບທວນຄືນຄວາມໝາຍທາງປະຫວັດສາດຂອງວັນຊາດຣູມານີ ແລະຜົນງານທີ່ສຳຄັນທີ່ຣູມານີ ບັນລຸໄດ້ໃນການພັດທະນາເສດຖະກິດ-ສັງຄົມ.

ບັນຍາກາດທີ່ເຫດການ. ພາບ: qdnd.vn

ທ່ານ ໂຮ່ກວາງເລີ້ຍ ໃຫ້ຮູ້ວ່າ ຣູມານີ ແມ່ນໜຶ່ງໃນ 10 ປະເທດທຳອິດທີ່ສ້າງຕັ້ງສາຍພົວພັນທາງການທູດກັບຫວຽດນາມ, ປະຫວັດສາດຂອງສາຍພົວພັນລະຫວ່າງສອງປະເທດໃນໄລຍະ 75 ປີຜ່ານມາ ໄດ້ມີເຫດການສຳຄັນຫຼາຍຢ່າງທີ່ເກີດຂຶ້ນ. ສືບຕໍ່ມູນເຊື້ອອັນດີງາມທີ່ໄດ້ສ້າງຂຶ້ນ ແລະທົດສອບຜ່ານບັນດາໄລຍະປະຫວັດສາດ, ສາຍພົວພັນມິດຕະພາບ ແລະການຮ່ວມມືຮອບດ້ານລະຫວ່າງຫວຽດນາມ ແລະຣູມານີ ໃນຊຸມປີມໍ່ໆມານີ້ໄດ້ຮັບການເປີດກວ້າງ ແລະເລິກເຊິ່ງກວ່າເກົ່າໃນຫຼາຍຂົງເຂດ. ໃນໄລຍະຜ່ານມາ, ສະມາຄົມມິດຕະພາບຫວຽດນາມ-ຣູມານີ ໄດ້ມີຄວາມມານະພະຍາຍາມເປັນຂົວເຊື່ອມຕໍ່ສົ່ງເສີມການຄ້າ, ການສຶກສາ, ວັດທະນະທໍາ, ການທ່ອງທ່ຽວ, ສະໜັບສະໜູນການແລກປ່ຽນແຮງງານ, ປະກອບສ່ວນຊຸກຍູ້ສາຍພົວພັນມິດຕະພາບ ແລະການຮ່ວມມືຮອບດ້ານລະຫວ່າງສອງປະເທດ.

ທີ່ເຫດການ, ທ່ານນາງ Cristina Romila ເອກອັກຄະລັດຖະທູດຣູມານີ ປະຈຳ ຫວຽດນາມ ຢືນຢັນວ່າ ຫວຽດນາມ ຍັງຄົງເປັນໜຶ່ງໃນຄູ່ຮ່ວມມືຫຼັກຂອງຣູມານີ ໃນພາກພື້ນອາຊີ-ປາຊີຟິກ. ສາຍພົວພັນລະຫວ່າງສອງປະເທດໄດ້ຮັບການປັບປຸງຢ່າງບໍ່ຢຸດຢັ້ງຜ່ານການເຄື່ອນໄຫວສາມັກຄີ ແລະການສະໜັບສະໜູນເຊິ່ງກັນ ແລະກັນ. ທ່ານນາງ ຍັງໄດ້ຕີລາຄາສູງຕໍ່ບົດບາດ ແລະການປະກອບສ່ວນຂອງສະຫະພັນບັນດາອົງການຈັດຕັ້ງມິດຕະພາບຫວຽດນາມ ແລະສະມາຄົມ ມິດຕະພາບຫວຽດນາມ-ຣູມານີ ໃນການເຮັດໃຫ້ສາຍພົວພັນມິດຕະພາບ ແລະຄວາມໄວ້ເນື້ອເຊື່ອໃຈລະຫວ່າງປະຊາຊົນສອງປະເທດເລິກເຊິ່ງຂຶ້ນຕື່ມ.

ໂດຍ: ໄຊນີດາ