ຊົມເຊີຍທ່ານນາງ Gillian Bird ທີ່ໄດ້ຮັບການແຕ່ງຕັ້ງເປັນເອກອັກຄະລັດຖະທູດອົດສະຕາລີ ປະຈໍາ ຫວຽດນາມ, ທ່ານປະທານປະເທດ ເລືອງເກື່ອງ ເຊື່ອໝັ້ນວ່າ ທ່ານນາງ Gillian Bird ຈະມີອາຍຸການປະສົບຜົນສໍາເລັດຢ່າງຈົບງາມ ດ້ວຍບັນດາການປະກອບສ່ວນສຳຄັນເຂົ້າໃນການພັດທະນາການພົວພັນລະຫວ່າງ 2 ປະເທດ.

leftcenterrightdel
ທ່ານ ເລືອງເກື່ອງ ປະທານປະເທດຫວຽດນາມ ຕ້ອນຮັບທ່ານນາງ Gillian Bird ເອກອັກຄະລັດຖະທູດອົດສະຕາລີ ປະຈໍາ ຫວຽດນາມ. ພາບ: qdnd.vn

ທ່ານນາງ Gillian Bird ເນັ້ນໜັກວ່າ ຫວຽດນາມ ແມ່ນໜຶ່ງໃນບັນດາຄູ່ຮ່ວມມືສຳຄັນຂອງອົດສະຕາລີ ຢູ່ພາກພື້ນ. ໃນສະພາບການສາກົນໃນປະຈຸບັນ, ທ່ານນາງເອກອັກຄະລັດຖະທູດອົດສະຕາລີ ປາດຖະໜາວ່າ 2 ປະເທດຈະສືບຕໍ່ຊຸກຍູ້ການຮ່ວມມື ເພື່ອການພັດທະນາຢ່າງໝັ້ນຄົງ ແລະ ວັດທະນາຖາວອນຂອງແຕ່ລະປະເທດ ແລະ ພາກພື້ນ.

ທ່ານປະທານປະເທດ ໄດ້ຮຽກຮ້ອງໃຫ້ທ່ານນາງ Gillian Bird ເອົາໃຈໃສ່, ກະຕຸກຊຸກຍູ້ ແລະຫັນບັນດາຂໍ້ຕົກລົງທີ່ໄດ້ລົງນາມແລ້ວເຂົ້າສູ່ລວງເລິກ ແລະແທດຈິງ; ໃນນັ້ນ, ຕ້ອງສືບຕໍ່ຊຸກຍູ້ການພົບປະແລກປ່ຽນຂັ້ນສູງ ແລະທຸກຂັ້ນ, ຂະແໜງການຂັ້ນສູນກາງ ແລະທ້ອງຖິ່ນ; ຊຸກຍູ້ການຮ່ວມມືລົງທຶນໃນບັນດາຂົງເຂດທີ່ສອງຝ່າຍມີທ່າແຮງ ກວ່າອີກ ຄື: ການຄ້າ, ການສຶກສາ-ບຳລຸງສ້າງ, ການປ້ອງກັນຊາດ-ປ້ອງກັນຄວາມສະຫງົບ ແລະການພົບປະແລກປ່ຽນປະຊາຊົນ. ບົນພື້ນຖານປັບປຸງ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, 2 ຝ່າຍສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສຫຼາຍຝ່າຍ ບົນພື້ນຖານກົດໝາຍສາກົນ, ພິເສດແມ່ນກົດບັດສະຫະປະຊາຊາດ.

* ທີ່ການຕ້ອນຮັບທ່ານ Reinaldo Rafael Espinal Nunez ເອກອັກຄະລັດຖະທູດ Dominicana, ທ່ານປະທານປະເທດ ເລືອງເກື່ອງ ໃຫ້ຮູ້ວ່າ ຫວຽດນາມ ປາດຖະໜາຢາກປັບປຸງການພົວພັນມິດຕະພາບທີ່ເປັນມູນເຊື້ອອັນດີງາມ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ ແລະຍົກສູງປະສິດທິຜົນການພົວພັນຮ່ວມມື, ຕອບສະໜອງຄວາມສາມາດບົ່ມຊ້ອນ ແລະຄວາມຕ້ອງການຂອງສອງຝ່າຍ, ພິເສດແມ່ນດ້ານເສດຖະກິດ - ການຄ້າ ແລະການລົງທຶນ, ວັດທະນະທຳ ແລະພົບປະແລກປ່ຽນປະຊາຊົນ.

leftcenterrightdel
ທ່ານ ເລືອງເກື່ອງ ປະທານປະເທດຫວຽດນາມ ຕ້ອນຮັບທ່ານເອກອັກຄະລັດຖະທູດ Reinaldo Rafael Espinal Nunez. ພາບ: qdnd.vn

ທ່ານ Reinaldo Rafael Espinal Nunez ໃຫ້ຄຳໝັ້ນສັນຍາຈະເຮັດຈົນສຸດຄວາມສາມາດຂອງຕົນ ເພື່ອຊຸກຍູ້ການພັດທະນາການຮ່ວມມືລະຫວ່າງ 2 ປະເທດ ຂຶ້ນສູ່ລະດັບສູງໃໝ່ໃນໄລຍະຈະມາເຖິງ.

* ຊົມເຊີຍທ່ານ Azeddine Bechka ໄດ້ຮັບການແຕ່ງຕັ້ງເປັນເອກອັກຄະລັດຖະທູດ Algeria ປະຈຳຫວຽດນາມ, ທ່ານປະທານປະເທດ ເລືອງເກື່ອງ ຢືນຢັນວ່າ ຫວຽດນາມ ຖືເປັນສຳຄັນການພົວພັນຮ່ວມມືທີ່ເປັນມູນເຊື້ອ ແລະການຮ່ວມມືມິດຕະພາບກັບ Algeria, ເຊິ່ງເປັນຄູ່ຮ່ວມມືມິດຕະພາບຂອງຫວຽດນາມ ຢູ່ອາຟຣິກາ ຢ່າງບໍ່ຢຸດຢັ້ງ ແລະເລິກເຊິ່ງທີ່ສຸດ. ທ່ານປະທານປະເທດ ຖືວ່າ ຫວຽດນາມ ແລະ Algeria ຄວນເພີ່ມທະວີການຮ່ວມມື ແລະໜູນຊ່ວຍເຊິ່ງກັນ ແລະກັນ ເພື່ອພ້ອມກັນພັດທະນາກວ່າອີກ.

leftcenterrightdel
ທ່ານ ເລືອງເກື່ອງ ປະທານປະເທດຫວຽດນາມ ຕ້ອນຮັບທ່ານເອກອັກຄະລັດຖະທູດ Azeddine Bechka. ພາບ: qdnd.vn

ຂອບໃຈທ່ານປະທານປະເທດ ທີ່ໄດ້ສະຫຼະເວລາຕ້ອນຮັບ, ທ່ານ Azeddine Bechka ໃຫ້ຄຳໝັ້ນສັນຍາວ່າ ຈະເຮັດຈົນສຸດຄວາມສາມາດຂອງຕົນ ເພື່ອປະກອບສ່ວນຢ່າງຕັ້ງໜ້າເຂົ້າໃນການປັບປຸງ ແລະຊຸກຍູ້ສາຍພົວພັນລະຫວ່າງສອງປະເທດ; ຊຸກຍູ້ການຮ່ວມມືໃນຂົງເຂດເສດຖະກິດການຄ້າ ແລະAlgeria ພ້ອມແລ້ວທີ່ຈະເປັນປະຕູເພື່ອຊ່ວຍໃຫ້ ຫວຽດນາມ ເປີດກວ້າງຕະຫຼາດໄປຍັງບັນດາປະເທດອາຟຣິກາ.

* ທີ່ການຕ້ອນຮັບທ່ານ Fernando Miguel ເອກອັກຄະລັດຖະທູດ Angola ປະຈຳ ຫວຽດນາມ, ທ່ານປະທານປະເທດ ເລືອງເກື່ອງ ໃຫ້ຮູ້ວ່າ ຫວຽດນາມ ພ້ອມແລ້ວທີ່ຈະເພີ່ມທະວີການຮ່ວມມືດ້ານກະສິກຳ, ສິນໃນນ້ຳ, ອຸດສາຫະກຳປຸງແຕ່ງ, ໂທລະຄົມມະນາຄົມ, ຫັນເປັນດີຈີຕອນ, ການສຶກສາ, ບຳລຸງສ້າງ, ສາທາລະນະສຸກ… ກັບ Angola ໃນບັນດາຊ່ອງທາງຮ່ວມມືສອງຝ່າຍ ແລະການຮ່ວມມືຫຼາຍຝ່າຍ.

leftcenterrightdel
ທ່ານ ເລືອງເກື່ອງ ປະທານປະເທດຫວຽດນາມ ຕ້ອນຮັບທ່ານເອກອັກຄະລັດຖະທູດ Fernando Migue. ພາບ: qdnd.vn

ທ່ານເອກອັກຄະລັດຖະທູດ Fernando Miguel ປາດຖະໜາວ່າ  2 ຝ່າຍຈະກຳນົດບັນດາຂົງເຂດທີ່ມີທ່າແຮງ ເພື່ອຮ່ວມມືຄື: ບໍ່ແຮ່, ນ້ຳມັນອາຍແກັສ, ການທ່ອງທ່ຽວ ໂດຍໄວ; ຫວັງວ່າ ຈະມີນັກລົງທຶນຫວຽດນາມ ຈະມາລົງທຶນຢູ່ Angola ນັບມື້ນັບຫຼາຍຂຶ້ນ.

ໂດຍ: ທະນາພອນ