ອັງກິດ ຈະສືບຕໍ່ໜູນຊ່ວຍຫວຽດນາມ ພັດທະນາເສດຖະກິດແບບຍືນຍົງ
ກປ.ອອນໄລ - ໃນການຕ້ອນຮັບທ່ານ Philip Barton ຮອງລັດຖະມົນຕີຜູ້ປະຈໍາການກະຊວງການຕ່າງປະເທດ ແລະຮ່ວມມືພັດທະນາ ແຫ່ງລາຊະອານາຈັກ ອັງກິດ ຫວ່າງແລ້ວນີ້ ທີ່ຮ່າໂນ້ຍ, ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ ສະແດງຄວາມປິຕິຊົມຊື່ນເມື່ອເຫັນວ່າ ການພົວພັນຄູ່ຮ່ວມມືຍຸດທະສາດ ຫວຽດນາມ-ອັງກິດ ໃນໄລຍະຜ່ານມາ ພັດທະນາຢ່າງຕັ້ງໜ້າ, ໂດຍສະເພາະແມ່ນໃນຂົງເຂດການເມືອງ, ການທູດ, ການຄ້າ, ການລົງທຶນ, ການປ້ອງກັນຊາດ, ປ້ອງກັນຄວາມສະຫງົບ, ການສຶກສາ-ກໍ່ສ້າງ.
    |
 |
|
ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ ຕ້ອນຮັບທ່ານ Philip Barton ຮອງລັດຖະມົນຕີຜູ້ປະຈໍາການກະຊວງການຕ່າງປະເທດ ແລະຮ່ວມມືພັດທະນາ ແຫ່ງລາຊະອານາຈັກ ອັງກິດ. ພາບ: ກະຊວງການຕ່າງປະເທດ. |
ສ່ວນທ່ານຮອງລັດຖະມົນຕີ Philip Barton ຢັ້ງຢືນວ່າ ອັງກິດຖືເປັນສໍາຄັນ ໃນການເພີ່ມທະວີການພົວພັນຄູ່ຮ່ວມມືຍຸດທະສາດກັບຫວຽດນາມ ໃນນະໂຍບາຍຂອງຕົນ ຢູ່ພາກພື້ນອາຊີ-ປາຊີຟິກ; ພ້ອມທັງເນັ້ນໜັກວ່າ ອັງກິດ ຈະສືບຕໍ່ຮ່ວມເດີນທາງ ແລະໜູນຊ່ວຍຫວຽດນາມ ຮັບມືກັບການປ່ຽນແປງຂອງດິນຟ້າອາກາດ, ພັດທະນາເສດຖະກິດແບບຍືນຍົງ, ປົກປັກຮັກສາຊີວະນາໆພັນຢູ່ເຂດແມ່ນໍ້າຂອງ... ສອງຝ່າຍເຫັນດີເປັນເອກະພາບສົມທົບກັນຢ່າງແໜ້ນແຟ້ນ, ໝູນໃຊ້ຜົນປະໂຫຍດ ທີ່ສັນຍາການຄ້າເສລີ ຫວຽດນາມ-ອັງກິດ (UKVFTA) ນໍາມາໃຫ້ຢ່າງມີປະສິດທິຜົນ; ເພີ່ມທະວີການສົມທົບກັນ, ສະໜັບສະໜູນເຊິ່ງກັນ ແລະກັນຢູ່ອົງການຈັດຕັ້ງ, ເວທີປາໄສພາກພື້ນ ແລະສາກົນ...
ເມື່ອແລກປ່ຽນກ່ຽວກັບບັນດາບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ, ທ່ານຮອງລັດຖະມົນຕີ Philip Barton ໄດ້ຢັ້ງຢືນເຖິງຄວາມສໍາຄັນຂອງການຮັບປະກັນຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນທະເລ, ການບິນ, ເຄົາລົບກົດໝາຍສາກົນ, ລວມມີ ສົນທິສັນຍາຂອງສະຫະປະຊາຊາດ ກ່ຽວກັບກົດໝາຍວ່າດ້ວຍທະເລ (UNCLOS) ປີ 1982, ຢູ່ເຂດທະເລ ແລະມະຫາສະໝຸດທັງໝົດ, ໃນນັ້ນມີ ທະເລຕາເວັນອອກ ແລະທະເລແດງ.
ໂດຍ: ໄຊຊະນະ