ຄະນະຜູ້ແທນຄະນະພັກນະຄອນໂຮ່ຈີມິນ ຢ້ຽມຢາມ ແລະເຮັດວຽກຢູ່ເມັກຊິກໂກ
ກປ.ອອນໄລ - ໃນຂອບເຂດການປະຕິບັດງານຢູ່ພາກພື້ນອາເມລິກາ ລາຕິນ, ໃນລະຫວ່າງວັນທີ 22-27 ມີນາ, ຄະນະຜູ້ແທນນະຄອນໂຮ່ຈີມິນ ນໍາໂດຍທ່ານ ຫງວຽນໂຮ່ຫາຍ ຮອງເລຂາພັກນະຄອນ ໄດ້ໄປຢ້ຽມຢາມ ແລະເຮັດວຽກຢູ່ເມັກຊິກໂກ ເພື່ອແນໃສ່ຊຸກຍູ້ການພົວພັນມິດຕະພາບ ກໍ່ຄືຊອກຮູ້ກາລະໂອກາດຮ່ວມມືກັບພື້ນຖານເສດຖະກິດໃຫຍ່ທີ 2 ໃນພາກພື້ນ.
ໃນໄລຍະຢ້ຽມຢາມ ແລະເຮັດວຽກຢູ່ນະຄອນຫຼວງ Mexico City, ຄະນະໄດ້ມີການພົບປະກັບທ່ານ Alfredo Femat Bañuelos ກໍາມະການກົມການເມືອງພັກແຮງງານ, ຫົວໜ້າກຳມາທິການການຕ່າງປະເທດສະພາຕໍ່າເມັກຊິກໂກ. ກ່າວຄໍາເຫັນທີ່ການພົບປະ, ທ່ານ ຫງວຽນໂຮ່ຫາຍ ສະແດງຄວາມປາດຖະໜາຢາກເພີ່ມທະວີການພົວພັນຮ່ວມມືລະຫວ່າງ ເມັກຊິກໂກ ແລະຫວຽດນາມ ເວົ້າລວມ ແລະກັບນະຄອນໂຮ່ຈີມິນ ເວົ້າສະເພາະ, ທ່ານເນັ້ນໜັກວ່ານະຄອນໂຮ່ຈີມິນ ຍາມໃດກໍ່ຍິນດີຕ້ອນຮັບຄະນະຜູ້ແທນເມັກຊິກໂກ ກໍ່ຄືສ້າງທຸກເງື່ອນໄຂສະດວກທີ່ສຸດໃຫ້ບັນດາວິສາຫະກິດ, ນັກລົງທຶນເມັກຊິກໂກ ໄປລົງທຶນຢູ່ນະຄອນ.
|
|
ທ່ານ ຫງວຽນໂຮ່ຫາຍ ມອບຂອງຂວັນເປັນທີ່ລະນຶກໃຫ້ທ່ານ Alfredo Femat Bañuelos. ພາບ: ສໍານັກຂ່າວສານຫວຽດນາມ. |
ທ່ານ ຫງວຽນໂຮ່ຫາຍ ກໍ່ຕີລາຄາສູງນະໂຍບາຍມະນຸດສະທໍາຂອງເມັກຊິກໂກ ໃນການຟື້ນຟູ ແລະພັດທະນາເສດຖະກິດ-ສັງຄົມພາຍຫຼັງພະຍາດ ໂຄວິດ-19, ໃນນັ້ນໄດ້ເນັ້ນໜັກເຖິງການໃຫ້ບຸລິມະສິດໜູນຊ່ວຍຜູ້ທຸກຍາກ, ຜູ້ມີຄວາມສ່ຽງສູງຜ່ານຜ່າວິກິດການ. ທ່ານ ຫງວຽນໂຮ່ຫາຍ ໃຫ້ຮູ້ວ່າ ນີ້ກໍ່ແມ່ນນະໂຍບາຍທີ່ອໍານາດການປົກຄອງນະຄອນໂຮ່ຈີມິນ ປະຕິບັດໃນໄລຍະຜ່ານມາ.
ສ່ວນທ່ານ Alfredo Femat Bañuelos ຊີ້ແຈ້ງວ່າ ພັກແຮງງານເມັກຊິກໂກ ປາດຖະໜາຢາກຊຸກຍູ້ບັນດາໂຄງການຮ່ວມມືລະຫວ່າງສອງພັກເວົ້າລວມ ແລະນະຄອນໂຮ່ຈີມິນ ເວົ້າສະເພາະ, ພິເສດແມ່ນໃນຂົງເຂດໄດ້ຮັບການຜັນຂະຫຍາຍຢ່າງມີປະສິດທິຜົນ, ເປັນຕົ້ນແມ່ນບັນດາໂຄງການຮ່ວມມືດ້ານໂຄສະນາ, ກໍ່ສ້າງພະນັກງານ.
ໂດຍ: ຈາງຫງວຽນ