ປັບປຸງຄະນະຊີ້ນໍາການກໍ່ສ້າງຫໍສະພາແຫ່ງຊາດ ລາວ ຫຼັງໃໝ່
ກປ.ອອນໄລ - ນາຍົກລັດຖະມົນຕີ ໄດ້ເຊັນຂໍ້ຕົກລົງສະບັບເລກທີ 1330/QĐ-TTg ວ່າດ້ວຍການປັບປຸງສະມາຊິກຄະນະຊີ້ນໍາການກໍ່ສ້າງຫໍສະພາແຫ່ງຊາດ ລາວ ຫຼັງໃໝ່ (ຄະນະຊີ້ນໍາ). ທ່ານ ເລວັນແທ່ງ ຮອງນາຍົກລັດຖະມົນຕີ ເປັນຫົວໜ້າຄະນະຊີ້ນໍາ.
|
|
ທ່ານ ເລວັນແທ່ງ ຮອງນາຍົກລັດຖະມົນຕີ. ພາບ: ສໍານັກຂ່າວສານຫວຽດນາມ. |
ກິດຈະກຳຫໍສະພາແຫ່ງຊາດ ລາວ ຫຼັງໃໝ່ - ຂອງຂວັນຂອງພັກ, ລັດ ແລະປະຊາຊົນຫວຽດນາມ ມອບໃຫ້ພັກ, ລັດ ແລະປະຊາຊົນລາວ. ຮອງຫົວໜ້າຄະນະຊີ້ນໍາ ລວມມີ: ທ່ານ ຫງວຽນແທງງິ້ ລັດຖະມົນຕີກະຊວງກໍ່ສ້າງ (ຮອງຫົວໜ້າຜູ້ປະຈໍາການຄະນະຊີ້ນໍາ); ທ່ານ ດັ້ງແຄ໊ງຕວ່ານ ຮອງຫົວໜ້າຫ້ອງວ່າການສູນກາງພັກ. ກໍາມະການແມ່ນຜູ້ຕາງໜ້າການນໍາບັນດາອົງການ: ຄະນະພົວພັນຕ່າງປະເທດສູນກາງພັກ, ຫ້ອງວ່າການສະພາແຫ່ງຊາດ, ຫ້ອງວ່າການສໍານັກງານນາຍົກລັດຖະມົນຕີ; ກະຊວງກໍ່ສ້າງ, ກະຊວງແຜນການ ແລະການລົງທຶນ, ກະຊວງປ້ອງກັນປະເທດ, ກະຊວງການຕ່າງປະເທດ, ກະຊວງຕໍາຫຼວດ, ກະຊວງການເງິນ. ລາຍຊື່ສະມາຊິກຄະນະຊີ້ນໍາສະບັບນີ້ປ່ຽນແທນໃຫ້ລາຍຊື່ສະບັບທີ່ໄດ້ປະກາດໃຊ້ຕິດພ້ອມຂໍ້ຕົກລົງສະບັບເລກທີ 1204/QĐ-TTg ລົງວັນທີ 16 ສິງຫາ 2017 ຂອງນາຍົກລັດຖະມົນຕີ.
|
|
ຫໍສະພາແຫ່ງຊາດ ລາວ ຫຼັງໃໝ່ ຢູ່ນະຄອນຫຼວງວຽງຈັນ - ຂອງຂວັນຂອງພັກ, ລັດ ແລະປະຊາຊົນຫວຽດນາມ ມອບໃຫ້ພັກ, ລັດ ແລະປະຊາຊົນລາວ. ພາບ: ສໍານັກຂ່າວສານຫວຽດນາມ. |
ພາລະບົດບາດ, ໜ້າທີ່, ສິດອໍານາດຂອງຄະນະຊີ້ນໍາໄດ້ລະບຸໄວ້ໃນມາດຕາ 2, ມາດຕາ 3 ຂອງຂໍ້ຕົກລົງສະບັບເລກທີ 1204/QĐ-TTg ລົງວັນທີ 16 ສິງຫາ 2017 ຂອງນາຍົກລັດຖະມົນຕີ ວ່າດ້ວຍການສ້າງຕັ້ງຄະນະຊີ້ນໍາການກໍ່ສ້າງຫໍສະພາແຫ່ງຊາດ ລາວ ຫຼັງໃໝ່ ຍັງບໍ່ປ່ຽນແປງ.
ຫໍສະພາແຫ່ງຊາດລາວ ຫຼັງໃໝ່ ແມ່ນໜຶ່ງໃນບັນດາສັນຍາລັກແຫ່ງການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດລາວ ແລະຫວຽດນາມ. ນີ້ແມ່ນຂອງຂວັນເຊິ່ງພັກ, ລັດ ແລະປະຊາຊົນຫວຽດນາມ ມອບໃຫ້ພັກ, ລັດ ແລະປະຊາຊົນລາວ ເນື່ອງໃນໂອກາດທ່ານເລຂາທິການໃຫຍ່ ຫງວຽນຝູຈ້ອງ ເດີນທາງໄປຢ້ຽມຢາມ ສປປ ລາວ ຢ່າງເປັນທາງການແຕ່ວັນທີ 24-26 ພະຈິກ 2016.
ໂດຍ: ໄຊຊະນະ