ສະຫາຍ ຟ້າມມີງຈິ໊ງ ໄດ້ຮັບການເລືອກຕັ້ງໃຫ້ດໍາລົງຕໍາແໜ່ງນາຍົກລັດຖະມົນຕີ
ກປ.ອອນໄລ - ຕອນບ່າຍວັນທີ 5 ເມສາ, ສະມາຊິກສະພາແຫ່ງຊາດທີ່ມີໜ້າ 462/466 ໄດ້ລົງຄະແນນສຽງເຫັນດີເຫັນພ້ອມ (ກວມເອົາ 96,25% ຈໍານວນສະມາຊິກສະພາແຫ່ງຊາດທັງໝົດ), ສະພາແຫ່ງຊາດໄດ້ຮັບຮອງເອົາມະຕິເລືອກຕັ້ງສະຫາຍ ຟ້າມມີງຈິ໊ງ ເປັນນາຍົກລັດຖະມົນຕີ ແຫ່ງ ສສ ຫວຽດນາມ ອາຍຸການ 2016 - 2021.
ມະຕິເລືອກຕັ້ງນາຍົກລັດຖະມົນຕີແຫ່ງ ສສ ຫວຽດນາມ ໂດຍທ່ານ ຫງວຽນແຮ້ງຟຸກ ເລຂາທິການໃຫຍ່ສະພາແຫ່ງຊາດ ກ່າວປາໄສ, ມະຕິ: ເລືອກຕັ້ງສະຫາຍ ຟ້າມມີງຈິ໊ງ, ກຳມະການກົມການເມືອງສະໄໝທີ XIII, ຫົວໜ້າຄະນະຈັດຕັ້ງສູນກາງພັກ, ສະມາຊິກສະພາແຫ່ງຊາດຊຸດທີ XIV ໃຫ້ດໍາລົງຕໍາແໜ່ງນາຍົກລັດຖະມົນຕີແຫ່ງ ສສ ຫວຽດນາມ ອາຍຸການ 2016-2021. ມະຕິສະບັບນີ້ມີຜົນສັກສິດນັບແຕ່ເວລາສະພາແຫ່ງຊາດລົງມະຕິຮັບຮອງເອົາ.
ກ່ອນໜ້ານັ້ນ, ສະພາແຫ່ງຊາດໄດ້ຮັບຟັງທ່ານ ເຈິ່ນແທງເໝິນ ຮອງປະທານຜູ້ປະຈຳການສະພາແຫ່ງຊາດ, ໃນນາມຕາງໜ້າກໍາມາທິການສະພາແຫ່ງຊາດ, ລາຍງານຕໍ່ສະພາແຫ່ງຊາດກ່ຽວກັບໝາກຜົນຂອງການປຶກສາຫາລືກ່ຽວກັບການຄາດຄະເນບຸກຄະລາກອນ ເພື່ອເລືອກຕັ້ງນາຍົກລັດຖະມົນຕີ. ຫຼັງຈາກນັ້ນ, ປະທານປະເທດລາຍງານຕໍ່ສະພາແຫ່ງຊາດກ່ຽວກັບການອະທິບາຍ, ຮັບເອົາຄຳເຫັນປະກອບຂອງສະມາຊິກສະພາແຫ່ງຊາດກ່ຽວກັບການຄາດຄະເນບຸກຄະລາກອນ ເພື່ອເລືອກຕັ້ງນາຍົກລັດຖະມົນຕີ. ຕໍ່ຈາກນັ້ນ, ສະພາແຫ່ງຊາດປຶກສາຫາລື ແລະລົງຄະແນນສຽງຮັບຮອງເອົາບັນຊີລາຍຊື່ເພື່ອເລືອກຕັ້ງນາຍົກລັດຖະມົນຕີ ແລະສະພາແຫ່ງຊາດດຳເນີນການເລືອກຕັ້ງນາຍົກລັດຖະມົນຕີດ້ວຍການປ່ອນບັດ.
|
|
ທ່ານ ຟ້າມມີງຈິ໊ງ ນາຍົກລັດຖະມົນຕີ ສາບານຕົວຮັບດຳລົງຕຳແໜ່ງ. ພາບ: qdnd.vn |
ຫຼັງຈາກນັ້ນ, ທ່ານ ຟ້າມມີງຈິ໊ງ ນາຍົກລັດຖະມົນຕີ ໄດ້ດຳເນີນພິທີສາບານຕົວ. ທ່ານ ຟ້າມມີງຈິ໊ງ ນາຍົກລັດຖະມົນຕີ ໄດ້ສາບານຕົວວ່າ: "ພາຍໃຕ້ທຸງແດງດາວເຫຼືອງທີ່ສັກກາລະບູຊາຂອງຊາດ, ຕໍ່ໜ້າສະພາແຫ່ງຊາດ, ພໍ່ແມ່ປະຊາຊົນ ແລະຜູ້ມີສິດເລືອກຕັ້ງທົ່ວປະເທດ, ຂ້າພະເຈົ້າ - ນາຍົກລັດຖະມົນຕີ ແຫ່ງ ສສ ຫວຽດນາມ ສາບານຕົວ: ຈະຈົ່ງຮັກພັກດີຕໍ່ປະເທດຊາດ, ປະຊາຊົນ ແລະລັດຖະທໍາມະນູນແຫ່ງ ສສ ຫວຽດນາມ ຢ່າງເດັດຂາດ; ອອກແຮງປະຕິບັດສໍາເລັດໜ້າທີ່ເຊິ່ງພັກ, ລັດ ແລະປະຊາຊົນມອບໝາຍໃຫ້ເປັນຢ່າງດີ.”
ຫຼັງພິທີສາບານຕົວຮັບດຳລົງຕຳແໜ່ງຂອງນາຍົກລັດຖະມົນຕີ, ທ່ານ ເວືອງດິ່ງເຫວ້ ປະທານສະພາແຫ່ງຊາດ ໄດ້ມອບຊໍ່ດອກໄມ້ຊົມເຊີຍທ່ານ ຟ້າມມີງຈິ໊ງ ນາຍົກລັດຖະມົນຕີ.
ໂດຍ: ທະນາພອນ