ປັບປຸງການພົວພັນຮ່ວມມືລະຫວ່າງຫວຽດນາມ-ສະວິດ
ກປ.ອອນໄລ - ວັນທີ 20 ມັງກອນ, ເນື່ອງໃນໂອກາດເຂົ້າຮ່ວມເວທີປາໄສເສດຖະກິດ Davos WEF 2020, ທ່ານ ເຈື່ອງຮວ່າບິ່ງ ຮອງນາຍົກລັດຖະມົນຕີຜູ້ປະຈໍາການລັດຖະບານຫວຽດນາມ ໄດ້ມີການພົບປະເຈລະຈາກັບທ່ານ Guy Parmelin, ຮອງປະທານາທິບໍດີ, ລັດຖະມົນຕີກະຊວງເສດຖະກິດ, ການສຶກສາ ແລະຄົ້ນຄວ້າສະຫະພັນສະວິດ ເພື່ອແລກປ່ຽນກ່ຽວກັບການພົວພັນສອງຝ່າຍ ຫວຽດນາມ-ສະວິດ.
ທີ່ການພົບປະເຈລະຈາ, ທ່ານ Guy Parmelin ຊົມເຊີຍຜົນງານພັດທະນາເສດຖະກິດ-ສັງຄົມທີ່ໜ້າປະທັບໃຈຂອງຫວຽດນາມ ໃນປີຜ່ານມາ ແລະເລື່ອງຫວຽດນາມ ໄດ້ດໍາລົງຕໍາແໜ່ງເປັນກໍາມະການບໍ່ປະຈໍາການສະພາຄວາມໝັ້ນຄົງສະຫະປະຊາຊາດ ອາຍຸການ 2020-2021 ແລະປະທານອາຊຽນ 2020, ພ້ອມທັງເຊື່ອໝັ້ນວ່າ ຫວຽດນາມ ຈະປະຕິບັດສໍາເລັດບັນດາບົດບາດຂອງຕົນເປັນຢ່າງດີ.
ທ່ານ ເຈື່ອງຮວ່າບິ່ງ ສະແດງຄວາມປາດຖະໜາວ່າສອງຝ່າຍຈະເພີ່ມທະວີການສົມທົບກັນ, ແລກປ່ຽນຢູ່ບັນດາເວທີປາໄສຫຼາຍຝ່າຍ, ຢູ່ສະຫະປະຊາຊາດກໍ່ຄືໃນຂອບເຂດການຮ່ວມມືອາຊຽນ-ສະວິດ.
|
|
ທ່ານ ເຈື່ອງຮວ່າບິ່ງ ແລະທ່ານ Guy Parmelin. ພາບ: ສໍານັກຂ່າວສານຫວຽດນາມ. |
ສອງຝ່າຍຢັ້ງຢືນວ່າລັດຖະບານສອງປະເທດຈະສືບຕໍ່ສົ່ງເສີມ, ສ້າງເງື່ອນໄຂໃຫ້ບັນດາວິສາຫະກິດສະວິດ ແລະຫວຽດນາມ ເພີ່ມທະວີການເຊື່ອມຕໍ່, ການຮ່ວມມືດໍາເນີນທຸລະກິດໃນບັນດາຂົງເຂດທີ່ສະວິດ ມີທ່າແຮງ ແລະຫວຽດນາມ ມີຄວາມຕ້ອງການ. ທ່ານ ເຈື່ອງຮວ່າບິ່ງ ແລະທ່ານ Guy Parmelin ກໍ່ເຫັນດີເປັນເອກະພາບນຳກັນວ່າ ສອງຝ່າຍຄວນສືບຕໍ່ຍູ້ໄວການເຈລະຈາສັນຍາການຄ້າເສລີລະຫວ່າງຫວຽດນາມ ແລະກຸ່ມການຄ້າເສລີເອີຣົບ (EFTA) ເຊິ່ງສະວິດ ເປັນສະມາຊິກ. ສອງຝ່າຍແລກປ່ຽນກ່ຽວກັບຄວາມສໍາຄັນຂອງເລື່ອງແກ້ໄຂການຂັດແຍ້ງກັນໂດຍສັນຕິວິທີ, ບົນພື້ນຖານກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS 1982) ຢູ່ທະເລຕາເວັນອອກ ກໍ່ຄືຢູ່ພາກພື້ນຕ່າງໆ.
ໂດຍ: ທະນາພອນ