IMF ແລະ ILO ຈະສືບຕໍ່ຮ່ວມມື ແລະໜູນຊ່ວຍຫວຽດນາມ
ກປ.ອອນໄລ - ຕອນບ່າຍວັນທີ 19 ສິງຫາ, ທີ່ສໍານັກງານສູນກາງພັກ, ທ່ານ ຫງວຽນວັນບິ່ງ ຫົວໜ້າຄະນະເສດຖະກິດສູນກາງພັກ ໄດ້ໃຫ້ການຕ້ອນຮັບທ່ານ Francois Painchaud, ຫົວໜ້າຜູ້ຕາງໜ້າຂອງກອງທຶນສາກົນ (IMF) ປະຈໍາ ຫວຽດນາມ.
ທີ່ການຕ້ອນຮັບ, ທ່ານ ຫງວຽນວັນບິ່ງ ຢືນຢັນວ່າ, ການນໍາພັກ, ລັດຫວຽດນາມ ຍາມໃດກໍ່ຖືເປັນສໍາຄັນ ແລະຮັບຟັງບັນດາຄໍາຄິດເຫັນທີ່ປຶກສາອັນລໍ້າຄ່າຂອງ IMF ໃນວິວັດການວາງແຜນນະໂຍບາຍ, ສ້າງໂຄງປະກອບພື້ນຖານເສດຖະກິດຄືນໃໝ່, ທ່ານ ຫງວຽນວັນບິ່ງ ສະເໜີທ່ານ Francois Painchaud ເພີ່ມທະວີການຮ່ວມມື, ສົມທົບກັນຢ່າງແໜ້ນແຟ້ນກັບບັນດາອົງການທີ່ກ່ຽວຂ້ອງຂອງ ຫວຽດນາມ, ໂດຍສະເພາະແມ່ນໃນຂົງເຂດໃຫ້ຄຳປຶກສາດ້ານນະໂຍບາຍ ແລະໜູນຊ່ວຍດ້ານເຕັກນິກ, ຍົກສູງກໍາລັງຄວາມສາມາດໃຫ້ຝ່າຍຫວຽດນາມ.
|
|
ທ່ານ ຫງວຽນວັນບິ່ງ, ຫົວໜ້າຄະນະເສດຖະກິດສູນກາງພັກ ຕ້ອນຮັບທ່ານ Francois Painchaud, ຫົວໜ້າຜູ້ຕາງໜ້າກອງທຶນສາກົນ (IMF) ປະຈໍາ ຫວຽດນາມ. ພາບ: ແມ້ງຮຸ່ງ. |
ທ່ານ Francois Painchaud ຕີລາຄາສູງຜົນງານຕ່າງໆ ເຊິ່ງ ຫວຽດນາມ ບັນລຸໄດ້ໃນການຮັກສາເສດຖະກິດມະຫາພາກໃຫ້ມີຄວາມໝັ້ນທ່ຽງ, ຄວບຄຸມໄພເງິນເຟີ້ ແລະເຕີບໂຕເສດຖະກິດ; ຢັ້ງຢືນວ່າ IMF ຈະສືບຕໍ່ຮ່ວມມື ແລະໜູນຊ່ວຍຫວຽດນາມ ໃນການໃຫ້ຄຳປຶກສາດ້ານນະໂຍບາຍ ແລະໜູນຊ່ວຍຍົກສູງກໍາລັງຄວາມສາມາດ.
ຕອນບ່າຍວັນດຽວກັນ, ທ່ານ ຫງວຽນວັນບິ່ງ ຫົວໜ້າຄະນະເສດຖະກິດສູນກາງພັກ ກໍ່ໄດ້ຕ້ອນຮັບທ່ານ Changhee-Lee, ຜູ້ອໍານວຍການຫ້ອງການຕາງໜ້າແຫ່ງຊາດຂອງອົງການແຮງງານສາກົນ (ILO) ປະຈໍາ ຫວຽດນາມ.
ທ່ານ ຫງວຽນວັນບິ່ງ ຕີລາຄາສູງບົດບາດ, ການສະໜັບສະໜູນ ແລະສົມທົບກັນຢ່າງແໜ້ນແຟ້ນ, ມີປະສິດທິຜົນຂອງ ILO ຢູ່ ຫວຽດນາມ ໃນຂົງເຂດແຮງງານ, ພັດທະນາເສດຖະກິດ-ສັງຄົມແບບຍືນຍົງ, ປະກອບສ່ວນຢ່າງຕັ້ງໜ້າຂອງ ILO ເຂົ້າໃນວິວັດການສ້າງກົດໝາຍ, ນະໂຍບາຍກ່ຽວກັບແຮງງານ ແລະສັງຄົມຂອງຫວຽດນາມ, ທ່ານ ຫງວຽນວັນບິ່ງ ຢັ້ງຢືນວ່າໃນວິວັດການເຊື່ອມໂຍງເຂົ້າກັບສາກົນ, ຫວຽດນາມ ພ້ອມແລ້ວທີ່ຈະເຂົ້າຮ່ວມບັນດາສົນທິສັນຍາສາກົນ, ລວມມີທັງສົນທິສັນຍາກ່ຽວກັບແຮງງານ.
|
|
ທ່ານ ຫງວຽນວັນບິ່ງ, ຫົວໜ້າຄະນະເສດຖະກິດສູນກາງພັກ ຕ້ອນຮັບທ່ານ Changhee-Lee, ຜູ້ອໍານວຍການຫ້ອງການຕາງໜ້າແຫ່ງຊາດຂອງອົງການແຮງງານສາກົນ (ILO) ປະຈໍາ ຫວຽດນາມ. ພາບ: ແມ່ງຮຸ່ງ. |
ທ່ານ Changhee-Lee ຢັ້ງຢືນວ່າ, ILO ຈະສືບຕໍ່ເສີມຂະຫຍາຍການພົວພັນຮ່ວມມືທີ່ດີງາມ, ໜູນຊ່ວຍຫວຽດນາມຢ່າງຕັ້ງໜ້າໃນການບູລະນະລະບົບນະໂຍບາຍກົດໝາຍກ່ຽວກັບແຮງງານ, ວຽກເຮັດງານທໍາ, ຊີວິດສັງຄົມທີ່ສອດຄ່ອງກັບສະພາບການໃໝ່; ສ້າງຍຸດທະສາດ ເພື່ອແກ້ໄຂສິ່ງທ້າທາຍຕ່າງໆທີ່ກ່ຽວກັບການປ່ຽນແປງຂອງດິນຟ້າອາກາດ ແລະການພັດທະນາຍຸດທະສາດກ່ຽວກັບວຽກເຮັດຂຽວ; ຍົກສູງບັນດາເງື່ອນໄຂເສດຖະກິດ ແລະສັງຄົມເພື່ອນໍາຫວຽດນາມ ຫຼຸດພົ້ນອອກຈາກລາຍຮັບປານກາງສະເລ່ຍ.
ໂດຍ: ໄຊນີດາ