ການນໍາຂັ້ນສູງຂອງລາວ ສົ່ງສານສະແດງຄວາມເສົ້າສະຫຼົດໃຈເຖິງການນໍາຂັ້ນສູງຫວຽດນາມ
ກປ.ອອນໄລ - ຄະນະບໍລິຫານງານສູນກາງພັກປະຊາຊົນປະຕິວັດລາວ, ສະພາແຫ່ງຊາດ ສປປ ລາວ, ລັດຖະບານແຫ່ງ ສປປ ລາວ ແລະສູນກາງແນວລາວສ້າງຊາດໄດ້ສົ່ງສານສະແດງຄວາມເສົ້າສະຫຼົດໃຈເຖິງຄະນະບໍລິຫານງານສູນກາງພັກກອມມູນິດຫວຽດນາມ, ສະພາແຫ່ງຊາດແຫ່ງ ສສ ຫວຽດນາມ, ລັດຖະບານແຫ່ງ ສສ ຫວຽດນາມ, ສູນກາງແນວໂຮມປະເທດຊາດຫວຽດນາມ ທີ່ນະຄອນຫຼວງຮ່າໂນ້ຍ ເມື່ອວັນທີ 23 ເມສາ, ເນື້ອໃນສານລະບຸວ່າ:
ໃນນາມຄະນະບໍລິຫານງານສູນກາງພັກປະຊາຊົນປະຕິວັດລາວ, ສະພາແຫ່ງຊາດ, ລັດຖະບານແຫ່ງ ສປປ ລາວ ແລະສູນກາງແນວລາວສ້າງຊາດ, ພວກຂ້າພະເຈົ້າ ຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງຕໍ່ການຈາກໄປຂອງສະຫາຍພົນເອກ ເລດຶກແອັງ ອະດີດປະທານປະເທດແຫ່ງ ສສ ຫວຽດນາມ, ອະດີດກໍາມະການກົມການເມືອງສູນກາງພັກສະໄໝທີ V, VI, VII, VIII, ອະດີດສະມາຊິກສະພາແຫ່ງຊາດສະໄໝທີ VI, VIII, IX.
ພວກຂ້າພະເຈົ້າ ຕີລາຄາສູງຕໍ່ການປະກອບສ່ວນອັນໃຫຍ່ຫຼວງຂອງສະຫາຍ ເລດຶກແອັງ ໃນພາລະກິດຕໍ່ສູ້ກູ້ຊາດເພື່ອເອກະລາດແຫ່ງຊາດໃນເມື່ອກ່ອນກໍ່ຄືໃນພາລະກິດແຫ່ງການປົກປັກຮັກສາ ແລະສ້າງສາພັດທະນາປະເທດຊາດຂອງຫວຽດນາມ ເປັນເວລາຫຼາຍກວ່າ 80 ປີ.
|
|
ສະຫາຍ ເລດຶກແອັງ ອະດີດປະທານປະເທດແຫ່ງ ສສ ຫວຽດນາມ. ພາບ: ສໍານັກຂ່າວສານຫວຽດນາມ |
ສະຫາຍ ເລດຶກແອັງ ເປັນຜູ້ໜຶ່ງທີ່ໄດ້ປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງ ລາວ ແລະຫວຽດນາມ ຕະຫຼອດມາ.
ການຈາກໄປຂອງສະຫາຍ ເລດຶກແອັງ ບໍ່ພຽງແຕ່ເປັນການສູນເສຍຜູ້ນໍາທີ່ເຄົາລົບຮັກຂອງພັກ, ລັດ ແລະປະຊາຊົນຫວຽດນາມ, ແຕ່ຍັງເປັນການສູນເສຍເພື່ອນມິດສະຫາຍທີ່ສະໜິດສະໜົມ ແລະໃກ້ຊິດຂອງພັກ, ລັດ ແລະປະຊາຊົນລາວ ພວກຂ້າພະເຈົ້າອີກດ້ວຍ.
ໃນໄລຍະເວລາອັນໂສກເສົ້າເສຍດາຍນີ້, ຄະນະບໍລິຫານງານສູນກາງພັກປະຊາຊົນປະຕິວັດລາວ, ສະພາແຫ່ງຊາດ, ລັດຖະບານແຫ່ງ ສປປ ລາວ ແລະສູນກາງແນວລາວສ້າງຊາດ ຂໍແບ່ງເບົາຄວາມໂສກເສົ້າ ແລະສົ່ງຄວາມໄວ້ອາໄລຢ່າງສຸດຊຶ້ງໄປຍັງຄະນະບໍລິຫານງານສູນກາງພັກກອມມູນິດຫວຽດນາມ, ສະພາແຫ່ງຊາດ, ລັດຖະບານແຫ່ງ ສສ ຫວຽດນາມ ແລະສູນກາງແນວໂຮມປະເທດຊາດຫວຽດນາມ ພ້ອມດ້ວຍປະຊາຊົນຫວຽດນາມອ້າຍນ້ອງ ກໍ່ຄືຄອບຄົວ, ຍາດຕິພີ່ນ້ອງ ແລະເພື່ອນມິດຂອງສະຫາຍ ເລດຶກແອັງ ມານະໂອກາດນີ້ດ້ວຍ.
ໂດຍ: ໜັງສືພິມປະຊາຊົນລາວ