ສື່ມວນຊົນເຊັກ: ຄວາມມຸ່ງຫວັງຕໍ່ການຢ້ຽມຢາມ ສ.ເຊັກ ຂອງທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ
ກປ.ອອນໄລ - ວັນທີ 14 ເມສາ, ເວັບໄຊ Parlamentnilisty.cz ໄດ້ລົງພິມບົດຂຽນດ້ວຍຫົວຂໍ້ວ່າ: “ຄວາມມຸ່ງຫວັງຕໍ່ການຢ້ຽມຢາມ ສ.ເຊັກ ຂອງທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ”, ໃນນັ້ນ, ຕີລາຄາການຢ້ຽມຢາມສືບຕໍ່ເພີ່ມທະວີສາຍພົວພັນດ້ານການເມືອງອັນດີງາມລະຫວ່າງ ສ.ເຊັກ ແລະ ຫວຽດນາມ, ພ້ອມທັງໄດ້ຮັບຄວາມມຸ່ງຫວັງຈະສ້າງພະລັງແຮງຊຸກຍູ້ການຮ່ວມມືລະຫວ່າງສອງປະເທດໃນໄລຍະຈະມາເຖິງ, ໃນສະພາບການທີ່ສອງປະເທດມຸ່ງໄປເຖິງສະເຫຼີມສະຫຼອງ 70 ປີແຫ່ງວັນສ້າງຕັ້ງສາຍພົວພັນທາງການທູດໃນປີ 2020.
ຕາມບົດຂຽນແລ້ວ, ສ.ເຊັກ ແລະຫວຽດນາມ ມີຄວາມສາມາດບົ່ມຊ້ອນຫຼາຍຢ່າງເພື່ອຊຸກຍູ້ການຮ່ວມມືພັດທະນາໃນໄລຍະຈະມາເຖິງ. ທີໜຶ່ງ, ການພົວພັນລະຫວ່າງສອງປະເທດໄດ້ຮັບການກໍ່ສ້າງບົນພື້ນຖານມິດຕະພາບມາແຕ່ດົນນານ, ພິເສດແມ່ນການພົວພັນດ້ານການເມືອງລະຫວ່າງສອງປະເທດໄດ້ຮັບການປັບປຸງຢ່າງບໍ່ຢຸດຢັ້ງ, ທີສອງ, ປະຊາຄົມຊາວຫວຽດນາມອາໄສຢູ່ ເຊັກ ເປັນຈຳນວນຫຼວງຫຼາຍ, ນັບມື້ນັບເຊື່ອມໂຍງຢ່າງເລິກເຊິ່ງກວ້າງຂວາງເຂົ້າສັງຄົມປະເທດປະຈຳຖິ່ນ ແລະມີຄວາມສະໜິດຕິດພັນຢ່າງແໜ້ນແຟ້ນກັບພາຍໃນປະເທດ.
ທີສາມ, ປະຈຸບັນ ຫວຽດນາມ ເປັນສະມາຊິກສໍາຄັນຂອງອາຊຽນ ເຊິ່ງແມ່ນພາກພື້ນພັດທະນາຢ່າງຂະຫຍັນຂັນເຄື່ອນຂອງໂລກ. ຫວຽດນາມ ສາມາດສວມບົດບາດເປັນຂົວຕໍ່ເພື່ອໃຫ້ເຊັກ ເວົ້າສະເພາະ ແລະອີຢູ ເວົ້າລວມ ເພີ່ມທະວີການຮ່ວມມືກັບອາຊຽນ. ກົງກັນຂ້າມ, ເຊັກ ເປັນສະມາຊິກສໍາຄັນຂອງອີຢູ. ເຊັກ ສາມາດສວມບົດບາດເປັນຂົວຕໍ່ເພື່ອໃຫ້ຫວຽດນາມ ເພີ່ມທະວີການຮ່ວມມືກັບອີຢູ.
|
|
ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ແລະພັນລະຍາ ຢູ່ສະໜາມບິນສາກົນ Henri Coanda ທີ່ນະຄອນຫຼວງ Bucharest, ປະເທດ ໂຣມາເນຍ ໃນວັນທີ 14 ເມສາ. ພາບ: ສໍານັກຂ່າວສານຫວຽດນາມ. |
ປະຈຸບັນ ອີຢູ ເວົ້າລວມ, ໃນນັ້ນມີ ເຊັກ ລ້ວນແຕ່ມີແຜນນະໂຍບາຍຫັນການຄ້າເປັນຫຼາຍຝ່າຍ. ໃນສະພາບການພື້ນຖານເສດຖະກິດຂອງ ເຊັກ ຖືກຜົນກະທົບຈາກການຜັນແປຢ່າງສັບສົນຂອງສະພາບການໂລກ, ເຊັກ ມີແຜນນະໂຍບາຍເພີ່ມທະວີການພົວພັນກັບບັນດາປະເທດອາຊີ ເພື່ອຊອກຫາເປີດກວ້າງຕະຫຼາດສົ່ງອອກ. ໃນຂະນະນັ້ນ, ຫວຽດນາມ ແມ່ນຕະຫຼາດທີ່ມີຄວາມສາມາດບົ່ມຊ້ອນດ້ວຍຈຳນວນພົນລະເມືອງກວ່າ 90 ລ້ານຄົນ ແລະນັບມື້ນັບເຊື່ອມໂຍງຢ່າງເລິກເຊິ່ງກວ້າງຂວາງເຂົ້າພື້ນຖານເສດຖະກິດໂລກ. ເປັນໜ້າເອົາໃຈໃສ່, ເຊັກ ແມ່ນໜຶ່ງໃນບັນດາປະເທດອີຢູທີ່ມີພື້ນຖານວິທະຍາສາດເຕັກນິກ ແລະເຕັກໂນໂລຢີກ້າວໜ້າ, ເປັນຕົ້ນແມ່ນໃນຂົງເຂດການຜະລິດລົດໂອໂຕ, ເຕັກໂນໂລຢີປຸງແຕ່ງສະບຽງອາຫານ, ການຜະລິດເບຍ... ນີ້ກໍ່ແມ່ນກາລະໂອກາດເພື່ອໃຫ້ສອງປະເທດຊຸກຍູ້ການຮ່ວມມືໃນໄລຍະຈະມາເຖິງ.
ບົດຂຽນສະຫຼຸບວ່າ, ການຢ້ຽມຢາມ ແລະເຮັດວຽກຢູ່ ສ.ເຊັກ ຂອງທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ສືບຕໍ່ສະແດງໃຫ້ເຫັນສາຍພົວພັນດ້ານການເມືອງອັນດີງາມລະຫວ່າງຫວຽດນາມ ແລະ ສ.ເຊັກ ກໍ່ຄືໄດ້ຮັບຄວາມມຸ່ງຫວັງຈະສ້າງກໍາລັງໜູນຊຸກຍູ້ການຮ່ວມມືລະຫວ່າງສອງປະເທດໃນໄລຍະຈະມາເຖິງ.
ໂດຍ: ເຈິ່ນຮວ່ຽນ