ບັນດາທ້ອງຖິ່ນຈັດຕັ້ງພິທີໄຂງານບຸນລະດູບານໃໝ່ 2019
ກປ.ອອນໄລ - ວັນທີ 14 ກຸມພາ, ງານບຸນລະດູບານໃໝ່ ອຽນຕື 2019 ໄດ້ໄຂຂຶ້ນຢູ່ສູນວັດທະນະທໍາ ຈຸກເລິມອຽນຕື ຂຶ້ນກັບເຂດປູຊະນິຍະສະຖານທັດສະນີຍະພາບ ອຽນຕື, ນະຄອນ ອວງບີ໋, ແຂວງກວາງນິງ, ຫວຽດນາມ ຢ່າງເປັນທາງການ.
|
|
ລາຍການສະແດງສິລະປະທີ່ງານບຸນລະດູບານໃໝ່ອຽນຕື 2019. ພາບ: ລານຢິ້ວ. |
ງານບຸນລະດູບານໃໝ່ອຽນຕື ແມ່ນການເຄື່ອນໄຫວວັດທະນະທໍາທີ່ມີຄຸນຄ່າອັນເລິກເຊິ່ງດ້ວຍຄວາມໝາຍມຸ່ງຫາກົກເຄົ້າ; ແມ່ນໂອກາດ ເພື່ອໃຫ້ປະຊາຊົນທຸກຊັ້ນວັນນະ, ພຸດທະສາສະນິກະຊົນ ແລະແຂກທ່ອງທ່ຽວທີ່ມາຈາກທຸກສາລະທິດໄປນະມັດສະການເຂດດິນແດນພະພຸດທະເຈົ້າ ເພື່ອຖະຫວາຍທູບທຽນ, ຢ້ຽມຊົມ, ສະແດງຄວາມເຄົາລົບນັບຖື, ຄວາມຮູ້ບຸນຄຸນອັນໃຫຍ່ຫຼວງຕໍ່ເຈົ້າຊີວິດພະພຸດທະເຈົ້າ ເຈິ່ນເຍີນຕົງ... ແຂກທ່ອງທ່ຽວມາຮ່ວມງານບຸນອຽນຕື ຍັງໄດ້ເຂົ້າຮ່ວມການລະຫຼິ້ນພື້ນເມືອງຕ່າງໆ ຄື: ຕີໄກ່, ດຶງເຊືອກ...
ກໍ່ໃນວັນດຽວກັນ, ຄະນະກໍາມະການປະຊາຊົນເມືອງດິ້ງຮວ໋າ, ແຂວງທ໋າຍງວຽນ ກໍຈັດຕັ້ງພິທີໄຂງານບຸນ ລົ່ງຕົ່ງ ລະດູບານໃໝ່ປີກຸນ 2019. ນີ້ແມ່ນການເຄື່ອນໄຫວວັດທະນະທໍາທີ່ເປັນເອກະລັກສະເພາະຂອງພໍ່ແມ່ປະຊາຊົນບັນດາເຜົ່າຢູ່ເມືອງດິ້ງຮວ໋າ ດ້ວຍຄວາມໝາຍຂໍໃຫ້ດິນຟ້າອາກາດເອື້ອອຳນວຍຄວາມສະດວກ, ລະດູເກັບກ່ຽວງອກງາມໄດ້ຮັບຜົນດີໃນປີໃໝ່ນີ້. ງານບຸນ ລົ່ງຕົ່ງ (ງານບຸນລົງນາ) ໄດ້ຮັບການຮັບຮອງເປັນມໍລະດົກວັດທະນະທໍາບໍ່ເປັນວັດຖຸລະດັບແຫ່ງຊາດ. ເຊິ່ງດໍາເນີນໃນສອງວັນແມ່ນວັນທີ 13 – 14 ກຸມພາ, ໃນງານບຸນລົ່ງຕົ່ງ ມີຫຼາຍການເຄື່ອນໄຫວວັດທະນະທໍາທີ່ເປັນເອກະລັກສະເພາະຫຼາຍຢ່າງຂອງພໍ່ແມ່ປະຊາຊົນຊົນບັນດາເຜົ່າໃນທ້ອງຖິ່ນ.
ໂດຍ: ເກື່ອງດັ້ງ