ພິທີເປີດສະຫຼອງໂຮງຮຽນມັດທະຍົມຕອນປາຍສີທ່ານາໄຊ
ກປ.ອອນໄລ - ຕອນເຊົ້າວັນທີ 11 ພະຈິກ, ຢູ່ແຂວງບໍລິຄໍາໄຊ, ສປປ ລາວ, ໄດ້ດຳເນີນພິທີເປີດສະຫຼອງ ແລະມອບ - ຮັບໂຮງຮຽນມັດທະຍົມຕອນປາຍສີທ່ານາໄຊ ເຊິ່ງແມ່ນຂອງຂວັນຈາກທ່ານ ຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ມອບໃຫ້ປະຊາຊົນລາວ ເວົ້າລວມ ແລະປະຊາຊົນແຂວງບໍລິຄຳໄຊ ເວົ້າສະເພາະເນື່ອງໃນໂອກາດທ່ານ ຫງວຽນຝູຈ້ອງ ໄປຢ້ຽມຢາມປະເທດ ສປປ ລາວ ໃນເດືອນພະຈິກ 2016.
ກ່າວຄຳເຫັນທີ່ພິທີ, ທ່ານ ຮວ່າງກົງຮວ່ານ ຮອງຫົວໜ້າຫ້ອງວ່າການສູນກາງພັກ ຊີ້ແຈ້ງວ່າການເປີດສະຫຼອງ ແລະມອບ - ຮັບໂຮງຮຽນໂດຍທ່ານ ຫງວຽນຝູຈ້ອງ ເລຂາທິການໃຫຍ່, ປະທານປະເທດຫວຽດນາມມອບໃຫ້ປະຊາຊົນລາວບັນດາເຜົ່າອ້າຍນ້ອງແມ່ນການສະແດງໃຫ້ເຫັນສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງປະເທດຢ່າງມີຊີວິດຊີວາ.
|
|
ພິທີຕັດແຖບຜ້າເປີດສະຫຼອງ ແລະມອບ - ຮັບໂຮງຮຽນມັດທະຍົມຕອນປາຍສີທ່ານາໄຊ. ພາບ: nhandan.com.vn. |
|
|
ທ່ານ ຮວ່າງກົງຮວ່ານ, ຮອງຫົວໜ້າຫ້ອງວ່າການສູນກາງພັກກ່າວຄຳເຫັນທີ່ພິທີ. ພາບ: nhandan.com.vn. |
ໂດຍໄດ້ຮັບການມອບສິດຈາກທ່ານ ຫງວຽນຝູຈ້ອງ ເລຂາທິການໃຫຍ່, ປະທານປະເທດຫວຽດນາມ, ທ່ານ ຮວ່າງກົງຮວ່ານ ໄດ້ມອບໂຮງຮຽນຫຼັງດັ່ງກ່າວໃຫ້ຝ່າຍປະເທດເພື່ອນມິດລາວນຳໃຊ້ຢ່າງເປັນທາງການ.
ຕາງໜ້າຄະນະພັກ ແລະອຳນາດການປົກຄອງແຂວງບໍລິຄຳໄຊ, ທ່ານ ບຸນມາ ບຸຈະເລີນ, ຮອງເລຂາພັກແຂວງ, ຮອງເຈົ້າແຂວງໆບໍລິຄໍາໄຊ ຢືນຢັນວ່າໂຮງຮຽນດັ່ງກ່າວນັ້ນບໍ່ພຽງແຕ່ມີຄວາມໝາຍອັນໃຫຍ່ຫຼວງທີ່ສຸດສຳລັບພາລະກິດພັດທະນາແຫຼ່ງຊັບພະຍາກອນມະນຸດໃຫ້ປະເທດລາວເທົ່ານັ້ນ, ຫາກຍັງສະແດງໃຫ້ເຫັນສາຍພົວພັນແບບພິເສດ, ການຮ່ວມມືຮອບດ້ານ ແລະການສະໜິດຕິດພັນຢ່າງເລິກເຊິ່ງລະຫວ່າງສອງພັກ, ສອງລັດ ລາວ - ຫວຽດນາມ ອີກດ້ວຍ.
ໂດຍ: ບົວພອນ