ຫວຽດນາມ ແລະລາວ ເພີ່ມທະວີການຮ່ວມມືກ່ຽວກັບຂົງເຂດພຸດທະສາສະໜາ
ກປ.ອອນໄລ - ວັນທີ 17 ສິງຫາ, ຢູ່ຮ່າໂນ້ຍ, ທ່ານ ໂງແຊກທຶກ ຮອງປະທານຄະນະກໍາມະການສູນກາງແນວໂຮມປະເທດຊາດຫວຽດນາມ ໄດ້ໃຫ້ການຕ້ອນຮັບຄະນະຜູ້ແທນອົງການພຸດທະສາສະໜາສຳພັນລາວ ໂດຍພະອາຈານ ເວດ ມະເສໄນ, ຮອງປະທານຜູ້ປະຈໍາການສູນກາງອົງການພຸດທະສາສະໜາສຳພັນລາວ ເປັນຫົວໜ້າຄະນະມາຢ້ຽມຢາມຫວຽດນາມ.
ທີ່ການຕ້ອນຮັບ, ທ່ານ ໂງແຊກທຶກ ໃຫ້ຮູ້ວ່າ, ເລື່ອງປຸກລະດົມຄວາມສາມັກຄີດ້ານສາສະໜາຂອງຫວຽດນາມ ມີໂຄງການລວມຂອງອົງການແນວໂຮມປະເທດຊາດ, ໃນນັ້ນມີການເຂົ້າຮ່ວມຢ່າງຕັ້ງໜ້າຂອງສະມາຄົມພຸດທະສາສະໜາຫວຽດນາມ ໃນການປຸກລະດົມຄວາມສາມັກຄີທົ່ວປວງຊົນທັງຊາດ.
|
|
ທ່ານ ໂງແຊກທຶກ ຮອງປະທານຄະນະກໍາມະການສູນກາງແນວໂຮມປະເທດຊາດຫວຽດນາມ ຕ້ອນຮັບພະອາຈານ ເວດ ມະເສໄນ. ພາບ: ສໍານັກຂ່າວສານຫວຽດນາມ. |
ປັດຈຸບັນ, ແນວໂຮມປະເທດຊາດຫວຽດນາມ ພວມມີການປຸກລະດົມໃຫຍ່ແມ່ນທົ່ວປວງຊົນສາມັກຄີກັນກໍ່ສ້າງຊົນນະບົດໃໝ່, ຕົວເມືອງສີວິໄລດ້ວຍບັນດາມາດຕະຖານລະອຽດ, ໃນນັ້ນມີການປຸກລະດົມຄວາມສາມັກຄີສ້າງແບບແຜນການດໍາລົງຊີວິດດ້ານວັດທະນະທໍາ; ບັນດາສາສະໜາໄດ້ເຂົ້າຮ່ວມການປົກປັກຮັກສາສິ່ງແວດລ້ອມ, ຮັບມືກັບການປ່ຽນແປງຂອງດິນຟ້າອາກາດ, ເປັນຕົ້ນແມ່ນບັນດາລາຍການມະນຸດສະທໍາ, ການກຸສົນເພື່ອຊ່ວຍເຫຼືອຜູ້ທຸກຍາກບືນຕົວຂຶ້ນເຮັດໃຫ້ການດໍາລົງຊີວິດເປັນປົກກະຕິ. ບັນດາການປຸກລະດົມນີ້ໄດ້ເຮັດໃຫ້ຈິດໃຈທາງດ້ານພຸດທະສາສະໜາທະວີຄູນ, ເປັນຕົ້ນແມ່ນການເຂົ້າຮ່ວມໜູນຊ່ວຍພໍ່ແມ່ປະຊາຊົນຢູ່ເຂດປະສົບໄພນໍ້າຖ້ວມ, ໄພທໍາມະຊາດ.
ພະອາຈານ ເວດ ມະເສໄນ ໃຫ້ຮູ້ວ່າ, ນັບແຕ່ປີ 2005, ພຸດທະສາສະໜາຫວຽດນາມ ແລະລາວ ໄດ້ລົງນາມໃນບົດບັນທຶກຊ່ວຍຈໍາ ລວມມີ 6 ຂໍ້ເພື່ອແນໃສ່ຊຸກຍູ້ສາຍພົວພັນລະຫວ່າງສະມາຄົມພຸດທະສາສະໜາສອງປະເທດ; ພ້ອມທັງປາດຖະໜາຢາກໃຫ້ພຸດທະສາສະໜາລະຫວ່າງສອງປະເທດ ມີການເຄື່ອນໄຫວແທດຈິງ, ຍົກສູງບົດບາດຂອງບົດບັນທຶກຊ່ວຍຈໍາ ແລະຊຸກຍູ້ຄວາມສະໜິດຕິດພັນລະຫວ່າງພຸດທະສາສະໜາຫວຽດນາມ-ລາວ ໃຫ້ຫຼາຍກວ່າອີກ.
ໂດຍ: ທູຈາງ