ທ່ານນາງ ດັ້ງທິງອັກທິ້ງ ຮອງປະທານປະເທດຫວຽດນາມ ເລີ່ມການຢ້ຽມຢາມ ສປປ ລາວ ຢ່າງເປັນທາງການ
ກປ.ອອນໄລ - ໂດຍໄດ້ຮັບຄໍາເຊີນຂອງທ່ານ ພັນຄໍາ ວິພາວັນ ກໍາມະການກົມການເມືອງ ສູນກາງພັກ, ຜູ້ປະຈຳການຄະນະເລຂາທິການສູນກາງພັກ ປະຊາຊົນ ປະຕິວັດ ລາວ, ຮອງປະທານປະເທດ ລາວ, ໃນຕອນເຊົ້າວັນທີ 19 ມິຖຸນາ ທ່ານນາງ ດັ້ງທິງອັກທິ້ງ, ກໍາມະການສູນກາງພັກ, ຮອງປະທານປະເທດ ຫວຽດນາມ ໄດ້ໄປຮອດນະຄອນຫຼວງ ວຽງຈັນ, ເລີ່ມການຢ້ຽມຢາມ ສປປ ລາວ ຢ່າງເປັນທາງການໃນລະຫວ່າງວັນທີ 19-22 ມິຖຸນາ.
ຕອນບ່າຍວັນທີ 19 ມິຖຸນາ, ຢູ່ສໍານັກງານປະທານປະເທດ ລາວ, ທ່ານນາງ ດັ້ງທິງອັກທິ້ງ ໄດ້ມີການພົບປະເຈລະຈາກັບທ່ານ ພັນຄໍາ ວິພາວັນ ຮອງປະທານປະເທດ ລາວ. ທີ່ການພົບປະສອງຝ່າຍເຫັນດີເປັນເອກະສັນໃນໄລຍະຈະມາເຖິງສືບຕໍ່ປະຕິບັດບັນດາຂໍ້ຕົກລົງຂັ້ນສູງທີ່ໄດ້ຮັບການລົງນາມລະຫວ່າງການນໍາຂັ້ນສູງສອງປະເທດເປັນຢ່າງດີ, ພ້ອມທັງເຊື່ອໝັ້ນວ່າ, ສືບຕໍ່ບັນດາຜົນສໍາເລັດອັນດີງາມຂອງປີສາມັກຄີມິດຕະພາບ ຫວຽດນາມ - ລາວ 2017, ປີ 2018 ແມ່ນປີສະດວກ ເພື່ອໃຫ້ສອງປະເທດເພີ່ມທະວີສາຍພົວພັນແບບພິເສດ ຫວຽດນາມ - ລາວ ກວ່າອີກ. ທ່ານ ພັນຄໍາ ວິພາວັນ ສະເໜີສອງຝ່າຍຄວນສົມທົບກັນ ເພື່ອກໍ່ສ້າງສວນສາທາລະນະ ໂຮ່ຈິມິນ ຢູ່ທິດເໜືອນະຄອນຫຼວງ ວຽງຈັນ ໂດຍໄວ, ປະກອບສ່ວນສຶກສາລຸ້ນໜຸ່ມກ່ຽວກັບສາຍພົວພັນມິດຕະພາບອັນຍິ່ງໃຫຍ່ລະຫວ່າງສອງປະເທດ.
|
|
ບັນຍາກາດທີ່ການພົບປະເຈລະຈາ. ພາບ: nhandan.com.vn. |
ເມື່ອແລກປ່ຽນກ່ຽວກັບການພົວພັນຮ່ວມມືດ້ານເສດຖະກິດ, ວິທະຍາສາດເຕັກນິກ, ທ່ານ ພັນຄໍາ ວິພາວັນ ຕີລາຄາສູງປະສິດທິຜົນຂອງການຮ່ວມມື ຫວຽດນາມ - ລາວ; ສະເໜີຄວນຊຸກຍູ້ການຮ່ວມມືດ້ານການຄ້າ, ການລົງທຶນ, ການເຊື່ອມຈອດຄົມມະນາຄົມກວ່າອີກ...
ຄຽງຂ້າງກັນນັ້ນ, ທ່ານ ພັນຄໍາ ວິພາວັນ ຍັງເນັ້ນໜັກວ່າ, ລັດຖະບານ ລາວ ຍາມໃດກໍ່ສ້າງເງື່ອນໄຂສະດວກ ແລະໜູນຊ່ວຍຊາວ ຫວຽດນາມ ອາໄສຢູ່ ລາວ ທໍາມາຫາກິນເປັນປົກກະຕິຕາມກົດໝາຍຂອງ ສປປ ລາວ.
ຮອງປະທານປະເທດສອງທ່ານ ກໍ່ຢືນຢັນວ່າ, ສອງປະເທດຈະສືບຕໍ່ສົມທົບກັນຢ່າງແໜ້ນແຟ້ນ ແລະສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສສາກົນ ແລະພາກພື້ນຄືສະຫະປະຊາຊາດ, ອາຊຽນ ແລະບັນດາກົນໄກຮ່ວມມືອະນຸພາກພື້ນ.
|
|
ທ່ານນາງ ດັ້ງທິງອັກທິ້ງ ຮອງປະທານປະເທດຫວຽດນາມ ໄດ້ເຂົ້າຢ້ຽມຂໍ່ານັບທ່ານ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດ ສປປ ລາວ. ພາບ: nhandan.com.vn. |
ກໍ່ໃນຕອນບ່າຍວັນດຽວກັນ, ທ່ານນາງ ດັ້ງທິງອັກທິ້ງ ຮອງປະທານປະເທດ ໄດ້ເຂົ້າຢ້ຽມຂໍ່ານັບທ່ານ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດ ສປປ ລາວ ແລະທ່ານ ທອງລຸນ ສີສຸລິດ ນາຍົກລັດຖະມົນຕີ ສປປ ລາວ.
ແປໂດຍ: ກວຽດເຕີມ