ກໍາປູເຈຍ ໃຫ້ຄໍາໝັ້ນສັນຍາໜູນຊ່ວຍຊາວກໍາປູເຈຍເຊື້ອຊາດຫວຽດນາມ ຕັ້ງຖິ່ນຖານຄືນໃໝ່
ກປ.ອອນໄລ - ຕອນເຊົ້າວັນທີ 13 ພະຈິກ, ທີ່ສິງກະໂປ, ທ່ານ ຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ໄດ້ນໍາໜ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມສະພາປະຊາຄົມການເມືອງ - ຄວາມໝັ້ນຄົງອາຊຽນ (APSC) ຄັ້ງທີ 18 ແລະກອງປະຊຸມສະພາປະສານງານອາຊຽນ (ACC) ຄັ້ງທີ 22. ຢູ່ນອກກອງປະຊຸມ, ທ່ານ ຟ້າມບິ່ງມິງ ກໍ່ໄດ້ມີການພົບປະກັບທ່ານ Park Sokkonn ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດກຳປູເຈຍ.
ແລກປ່ຽນກ່ຽວກັບບັນຫາຍົກຍ້າຍປະຊາຊົນຢູ່ເຂດທະເລສາບ, ແຂວງ Kampong Chhnang, ໃນນັ້ນມີຊາວກໍາປູເຈຍເຊື້ອຊາດຫວຽດນາມ, ທ່ານ ຟ້າມບິ່ງມິງ ຮັບຮູ້ບັນດາຄວາມມານະພະຍາຍາມຂອງກໍາປູເຈຍໃນການໜູນຊ່ວຍສ້າງຖິ່ນຖານຄືນໃໝ່ໃຫ້ພໍ່ແມ່ນປະຊາຊົນ ແລະສະແດງຄວາມເອົາໃຈໃສ່ຕໍ່ສະພາບການທີ່ຫຼາຍຄົນຖືກຍົກຍ້າຍໄປຢູ່ບັນດາສະຖານທີ່ທີ່ບໍ່ມີຄວາມຮັບປະກັນເງື່ອນໄຂການດໍາລົງຊີວິດຂອງປະຊາຊົນ.
ທ່ານ ຟ້າມບິ່ງມິງ ຢໍ້າຄືນຄຳສະເໜີຂອງທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ໄດ້ສະເໜີຕໍ່ທ່ານ Hun Sen ນາຍົກລັດຖະມົນຕີກໍາປູເຈຍ ກ່ຽວກັບເລື່ອງກໍາປູເຈຍໜູນຊ່ວຍຊາວກໍາປູເຈຍເຊື້ອຊາດຫວຽດນາມ ຍົກຍ້າຍອອກຈາກເຂດທະເລສາບມີຊີວິດການເປັນຢູ່ໃໝ່ໃຫ້ເປັນປົກກະຕິ; ປະຕິບັດການຍົກຍ້າຍຕາມແຕ່ລະບາດກ້າວ, ຮັບປະກັນບັນດາເງື່ອນໄຂກ່ຽວກັບພື້ນຖານໂຄງລ່າງ, ໂຮງຮຽນ, ສຸກສາລາ ແລະສ້າງວຽກເຮັດງານທຳໃຫ້ພໍ່ແມ່ປະຊາຊົນ.
    |
 |
|
ທ່ານ ຟ້າມບິ່ງມິງ ພົບປະກັບທ່ານ Park Sokkonn. ພາບ: ສໍານັກຂ່າວສານຫວຽດນາມ. |
ທ່ານ Park Sokkonn ຢັ້ງຢືນຄວາມປາດຖະໜາຂອງລັດຖະບານກໍາປູເຈຍ ຊຸກຍູ້ການພັດທະນາຂອງການພົວພັນສອງປະເທດ, ຢັ້ງຢືນວ່າກໍາປູເຈຍ ຈະມານະພະຍາຍາມໜູນຊ່ວຍຊີວິດການເປັນຢູ່ຂອງປະຊາຊົນຕັ້ງຖິ່ນຖານຄືນໃໝ່.
ໂດຍ: ບົວພອນ