ກອງປະຊຸມການພົວພັນຕ່າງປະເທດຄັ້ງທີ 19
ເສີມຂະຫຍາຍບົດບາດວຽກງານພົວພັນຕ່າງປະເທດໃນການພັດທະນາເສດຖະກິດ-ສັງຄົມຢູ່ທ້ອງຖິ່ນ
ກປ.ອອນໄລ - ຕອນເຊົ້າວັນທີ 12 ສິງຫາ, ທີ່ຮ່າໂນ້ຍໄດ້ດຳເນີນພິທີໄຂກອງປະຊຸມການພົວພັນຕ່າງປະເທດທົ່ວປະເທດຄັ້ງທີ 19 ດ້ວຍຫົວຂໍ້ “ເປັນເຈົ້າການ, ມີຫົວຄິດປະດິດສ້າງ, ຮັບໃຊ້ການເຊື່ອມໂຍງຢ່າງມີປະສິດທິຜົນ ແລະພັດທະນາແບບຍືນຍົງ”. ກອງປະຊຸມມີການເຂົ້າຮ່ວມຂອງຜູ້ແທນ 500 ຄົນແມ່ນການນຳຂອງບັນດາຄະນະ, ກະຊວງ, ຂະແໜງການສູນກາງ; ການນຳທ້ອງຖິ່ນ ແລະອົງການພົວພັນຕ່າງປະເທດຂອງ 63 ແຂວງ, ນະຄອນ; ບັນດາຫົວໜ້າອົງການຜູ້ຕາງໜ້າຫວຽດນາມຢູ່ຕ່າງປະເທດ ແລະບັນດາອົງການຂອງກະຊວງການຕ່າງປະເທດ.
ກ່າວຄຳເຫັນທີ່ພິທີໄຂ, ທ່ານ ຟ້າມບິ່ງມິນ, ກຳມະການກົມການເມືອງ, ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຕີລາຄາສູງຄວາມເອົາໃຈໃສ່, ການຊີ້ນຳຂອງການນຳບັນດາແຂວງ, ນະຄອນທີ່ສະຫງວນໃຫ້ວຽກງານພົວພັນຕ່າງປະເທດຢູ່ທ້ອງຖິ່ນ, ບົດບາດເປັນເສນາທິການຂອງບັນດາອົງການພົວພັນຕ່າງປະເທດຢູ່ທ້ອງຖິ່ນ, ການສົມທົບກັນລະຫວ່າງທ້ອງຖິ່ນກັບກະຊວງການຕ່າງປະເທດ ແລະບັນດາກະຊວງ, ຂະແໜງການສູນກາງໃນການຜັນຂະຫຍາຍບັນດາໜ້າທີ່ການຕ່າງປະເທດຢູ່ບັນດາທ້ອງຖິ່ນໃນໄລຍະຜ່ານມາ, ຜ່ານນັ້ນປະກອບສ່ວນຮັກສາສະພາບແວດລ້ອມສັນຕິພາບ, ສະຖຽນລະພາບ, ຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ສ້າງເງື່ອນໄຂໃຫ້ການພັດທະນາເສດຖະກິດ-ສັງຄົມຂອງປະເທດ.
|
|
ທ່ານ ຟ້າມບິ່ງມິນ ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ກ່າວຄຳເຫັນ ທີ່ກອງປະຊຸມ. ເຟືອງລິງ. |
ທ່ານ ຟ້າມບິ່ງມິນ ກ່າວວ່າໃນໄລຍະຈະມາເຖິງ, ບັນດາທ້ອງຖິ່ນຄວນປ່ຽນແປງໃໝ່ຈິນຕະນາການເຊື່ອມໂຍງເຂົ້າກັບສາກົນ; ສຸມໃສ່ປະຕິບັດວຽກງານເຊື່ອມໂຍງເຂົ້າກັບສາກົນຕິດພັນກັບການພັດທະນາເສດຖະກິດ-ສັງຄົມຂອງທ້ອງຖິ່ນເປັນຢ່າງດີ; ນຳໃຊ້ແຫຼ່ງທຶນໜູນຊ່ວຍການພັດທະນາ (ODA) ແລະແຫຼ່ງທຶນຊ່ວຍເຫຼືອບໍ່ຂຶ້ນກັບລັດຖະບານຂອງຕ່າງປະເທດຢ່າງມີປະສິດທິຜົນ. ຄຽງຂ້າງນັ້ນ, ບັນດາທ້ອງຖິ່ນກໍ່ຄວນສືບຕໍ່ບູລະນະກົງຈັກເຮັດວຽກງານພົວພັນຕ່າງປະເທດຢູ່ທ້ອງຖິ່ນຕອບສະໜອງຄວາມຮຽກຮ້ອງຕ້ອງການຂອງການຫັນເປັນອຸດສາຫະກຳ, ທັນສະໄໝ ແລະເຊື່ອມໂຍງເຂົ້າກັບສາກົນ
ໂດຍ:ແສງເດືອນ