ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ຕ້ອນຮັບຫົວໜ້າຄະນະຈັດຕັ້ງສູນກາງພັກປະຊາຊົນ ປະຕິວັດ ລາວ
ກປ.ອອນໄລ - ວັນທີ 25 ພຶດສະພາ, ຢູ່ສໍານັກງານນາຍົກລັດຖະມົນຕີຫວຽດນາມ, ທ່ານ ຫງວຽນຊວນຟຸກ ນາຍົກລັດຖະມົນຕີ ໄດ້ຕ້ອນຮັບທ່ານ ຈັນສີ ໂພສີຄໍາ, ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກປະຊາຊົນ ປະຕິວັດ ລາວ ພວມຢ້ຽມຢາມ ແລະເຮັດວຽກຢູ່ ຫວຽດນາມ.
ກ່າວຄໍາເຫັນທີ່ການຕ້ອນຮັບ, ທ່ານ ຫງວຽນຊວນຟຸກ ຢືນຢັນວ່າ, ພັກ, ລັດ ຫວຽດນາມ ຍາມໃດກໍ່ຊາບຊຶມເຖິງທຸກຂັ້ນ, ບັນດາກະຊວງ, ຂະແໜງການ, ທ້ອງຖິ່ນກ່ຽວກັບການເພີ່ມທະວີຊ່ວຍເຫຼືອປະເທດ ລາວ ໃນການພັດທະນາປະເທດ; ຖືນັ້ນແມ່ນຄວາມຮັບຜິດຊອບຂອງຫວຽດນາມ ຕໍ່ກັບ ລາວ, ກໍ່ຄືສົມກັບມູນເຊື້ອຂອງຮຸ້ນການນໍາອະວຸໂສສອງປະເທດໄດ້ທຸ້ມເທເຫື່ອແຮງເພີ່ມພູນຄູນສ້າງ.
|
|
ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ຕ້ອນຮັບທ່ານ ຈັນສີ ໂພສີຄໍາ ຫົວໜ້າຄະນະຈັດຕັ້ງສູນກາງພັກປະຊາຊົນ ປະຕິວັດ ລາວ. ພາບ: ສໍານັກຂ່າວສານຫວຽດນາມ. |
ທ່ານ ຈັນສີ ໂພສີຄໍາ ໃຫ້ຮູ້ວ່າ, ພັກ, ລັດ, ປະຊາຊົນ ລາວ ຍາມໃດກໍ່ຍຶດໝັ້ນຕໍ່ສາຍພົວພັນຮ່ວມມື, ນໍ້າໃຈມິດຕະພາບ ແລະມູນເຊື້ອອັນດີງາມກັບພັກ, ລັດ ແລະປະຊາຊົນ ຫວຽດນາມ. ຕາມທ່ານ ຈັນສີ ໂພສີຄໍາ ແລ້ວ, ຝ່າຍ ລາວ ກໍ່ພວມຜັນຂະຫຍາຍຢ່າງຕັ້ງໜ້າບັນດາໂຄງການພັດທະນາພື້ນຖານໂຄງລ່າງ ເພື່ອເຊື່ອມຈອດສອງປະເທດ, ເປັນຕົ້ນແມ່ນບັນດາໂຄງການຄົມມະນາຄົມ.
|
|
ບັນຍາກາດທີ່ການຕ້ອນຮັບ. ພາບ: ຫວູຢູງ. |
ທ່ານ ຫງວຽນຊວນຟຸກ ໃຫ້ຮູ້ວ່າ, ບັນດາທ້ອງຖິ່ນຫວຽດນາມ, ເປັນຕົ້ນແມ່ນບັນດາແຂວງຕິດກັບຊາຍແດນ ລາວ ລ້ວນແຕ່ຕັ້ງໜ້າຊຸກຍູ້ການຮ່ວມມືກັບບັນດາທ້ອງຖິ່ນຂອງ ລາວ. ທ່ານ ນາຍົກລັດຖະມົນຕີ ເນັ້ນໜັກວ່າ, ຫວຽດນາມພວມມານະພະຍາຍາມ, ເອົາໃຈໃສ່ເຖິງຖັນແຖວພະນັກງານ, ນັກສຶກສາ ລາວ ທີ່ພວມຮໍ່າຮຽນ, ຄົ້ນຄວ້າຢູ່ ຫວຽດນາມ ກວ່າອີກ; ພ້ອມທັງ, ພ້ອມແລ້ວທີ່ຈະສະໜອງງົບປະມານໃຊ້ຈ່າຍ ເພື່ອເພີ່ມທະວີຊຸກຍູ້ວຽກງານນີ້ໃຫ້ນັບມື້ນັບມີປະສິດທິຜົນກວ່າອີກ.
ທ່ານ ຫງວຽນຊວນຟຸກ ສະເໜີສອງຝ່າຍສົມທົບກັນຢ່າງແໜ້ນແຟ້ນກວ່າອີກໃນການຜັນຂະຫຍາຍປະຕິບັດບັນດາຖະແຫຼງການຮ່ວມ ຫວຽດນາມ-ລາວ; ຂໍ້ຕົກລົງລະຫວ່າງການນໍາຂັ້ນສູງສອງພັກ, ຂໍ້ຕົກລົງຢູ່ກອງປະຊຸມຄະນະກໍາມະການລະຫວ່າງລັດຖະບານຄັ້ງທີ 40; ບັນດາສັນຍາລະຫວ່າງສອງລັດຖະບານ, ລາຍການຮ່ວມມືລະຫວ່າງສອງຝ່າຍ... ບັນລຸໄດ້ປະສິດທິຜົນ, ນໍາມາເຊິ່ງຜົນປະໂຫຍດໃຫ້ປະຊາຊົນສອງປະເທດ.
ແປໂດຍ: ກວຽດເຕີມ