ແຜ່ຂະຫຍາຍວັດທະນະທໍາ ແລະອາຫານການກິນອາຊຽນ ຢູ່ກໍາປູເຈຍ
ກປ.ອອນໄລ - ວັນທີ 27 ເມສາ, ສະຖານທູດ ອິນໂດເນເຊຍ ປະຈຳ ລາຊະອານາຈັກ ກໍາປູເຈຍ ໄດ້ຈັດຕັ້ງເຫດການງານຕະຫຼາດນັດວັດທະນະທໍາ ແລະອາຫານການກິນ Bazaar ອາຊຽນ, ແນໃສ່ແນະນຳວັດທະນະທໍາ, ອາຫານການກິນ ແລະຮັດແໜ້ນນໍ້າໃຈໄມຕີຈິດມິດຕະພາບລະຫວ່າງປະເທດສະມາຊິກອາຊຽນດ້ວຍກັນ, ມຸ່ງໄປເຖິງພິທີສະເຫຼີມສະຫຼອງ 57 ປີແຫ່ງວັນສ້າງຕັ້ງອາຊຽນ (8-8-1967 / 8-8-2024).
ກ່າວຄຳເຫັນທີ່ພິທີໄຂເຫດການ, ທ່ານ Santo Darmosumarto, ເອກອັກຄະລັດຖະທູດ ອິນໂດເນເຊຍ ປະຈຳ ກໍາປູເຈຍ ໃຫ້ຮູ້ວ່າ ງານຕະຫຼາດນັດອາຊຽນ Bazaar ປີ 2024 ແມ່ນກິດຈະກຳແນໃສ່ປັບປຸງ, ເພີ່ມທະວີສາຍພົວພັນລະຫວ່າງພະນັກງານ, ພາລະກອນ ແລະຄອບຄົວສະຖານທູດຂອງບັນດາປະເທດອາຊຽນ ປະຈໍາ ກໍາປູເຈຍ, ກໍ່ຄື: ບາງກະຊວງ, ຂະແໜງການຂອງປະເທດເຈົ້າພາບ, ຄື: ກະຊວງການຕ່າງປະເທດ, ກະຊວງທ່ອງທ່ຽວ, ກະຊວງການຄ້າ, ນະຄອນຫຼວງພະນົມເປັນ...
|
|
ເອກອັກຄະລັດຖະທູດບັນດາປະເທດສະມາຊິກອາຊຽນ ປະຈໍາ ກໍາປູເຈຍ ປະຕິບັດພິທີໄຂງານຕະຫຼາດນັດວັດທະນະທໍາ ແລະອາຫານການກິນ Bazaar ອາຊຽນ. ພາບ: ສໍານັກຂ່າວສານຫວຽດນາມ |
ກ່າວຄຳເຫັນທີ່ເຫດການ, ທ່ານ Sok Chenda Sophea ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະການຮ່ວມມືສາກົນກໍາປູເຈຍ ຊີ້ແຈ້ງວ່າ ງານຕະຫຼາດນັດອາຊຽນ Bazaar ປີ 2024 ແມ່ນໂອກາດທີ່ດີເພື່ອໃຫ້ບັນດາປະເທດສະມາຊິກໂຄສະນາຜະລິດຕະພັນທີ່ມີຄຸນນະພາບສູງ, ພ້ອມກັບສີມືແຮງງານຫັດຖະກຳຂອງອາຊຽນ, ຍົກສູງຄວາມຮັບຮູ້ຂອງປະຊາຄົມ, ເພີ່ມທະວີການແລກປ່ຽນກ່ຽວກັບວັດທະນະທໍາ, ມໍລະດົກ ແລະອາຫານການກິນທີ່ຫຼາກຫຼາຍຂອງບັນດາປະເທດໃນກຸ່ມ. ນີ້ກໍ່ແມ່ນກາລະໂອກາດຊຸກຍູ້ນໍ້າໃຈໄມຕີຈິດມິດຕະພາບ ແລະການຮ່ວມມືພາຍໃນອາຊຽນ, ພ້ອມທັງຮັບຊົມຜະລິດຕະພັນດ້ານວັດທະນະທໍາ, ການສະແດງສິລະປະ, ເພີ່ມທະວີຄວາມເຂົ້າໃຈ ແລະຄວາມເຄົາລົບເຊິ່ງກັນ ແລະກັນ.
ສ່ວນທ່ານ ຫງວຽນຮຸຍຕັງ ເອກອັກຄະລັດຖະທູດຫວຽດນາມ ປະຈໍາ ກໍາປູເຈຍ ຖືວ່າ ເຫດການນີ້ແມ່ນກາລະໂອກາດເພື່ອໃຫ້ບັນດາປະເທດອາຊຽນ ສາມາດແນະນຳບັນດາຜະລິດຕະພັນດ້ານວັດທະນະທໍາໃຫ້ແກ່ກັນ, ພົບປະແລກປ່ຽນສິລະປະລະຫວ່າງບັນດາປະເທດ, ທ່ານເອກອັກຄະລັດຖະທູດ ຫງວຽນຮຸຍຕັງ ຢັ້ງຢືນວ່າ ງານຕະຫຼາດນັດຄັ້ງນີ້ກໍ່ແມ່ນກາລະໂອກາດເພື່ອໃຫ້ສະຖານທູດ ອາຊຽນ ປະຈໍາ ກໍາປູເຈຍ, ກໍ່ຄືບັນດາປະເທດໃນກຸ່ມເວົ້າລວມ ເພີ່ມທະວີການພົວພັນມິດຕະພາບ ແລະການຮ່ວມມືເພື່ອ “ອາຊຽນ-ວິໄສທັດດຽວ, ສີສັນດຽວ, ປະຊາຄົມດຽວ”.
ໂດຍ: ເຈິ່ນຮວ່ຽນ