ທ່ານປະທານາທິບໍດີອາເມລິກາ ຢ້ຽມຢາມ ເຢຍລະມັນ ແລະອັງໂກລາ
ວັນທີ 24 ກັນຍາ, ທຳນຽບຂາວ ໄດ້ແຈ້ງໃຫ້ຊາບວ່າ ທ່ານປະທານາທິບໍດີອາເມລິກາ Joe Biden ຈະຢ້ຽມຢາມ ເຢຍລະມັນ ແລະອັງໂກລາ ແຕ່ວັນທີ 10 ຕຸລາ ຫາວັນທີ 15 ຕຸລາ.
ໃນໄລຍະເຄື່ອນໄຫວຢູ່ ເຢຍລະມັນ, ທ່ານປະທານາທິບໍດີ ອາເມລິກາ ຈະປຶກສາຫາລືກັບການນຳປະເທດເຈົ້າພາບກ່ຽວກັບວິທີການເພີ່ມທະວີສາຍພົວພັນຮ່ວມມືສອງຝ່າຍ ແລະສົມທົບກັນໃນບັນດາບຸລິມະສິດລວມ, ເຊັ່ນ: ປັບປຸງຄຳໝັ້ນສັນຍາຂອງ ອາເມລິກາ ແລະເຢຍລະມັນ ສຳລັບປະຊາທິປະໄຕ ແລະຕ້ານລັດທິລົບລ້າງຊາວຢິວ, ເພີ່ມທະວີການພົວພັນລະຫວ່າງປະຊາຊົນສອງປະເທດ ແລະຊຸກຍູ້ການຮ່ວມມືກ່ຽວກັບເສດຖະກິດ, ການຄ້າ ແລະເຕັກໂນໂລຢີ.
ຫຼັງຈາກນັ້ນ, ທ່ານປະທານາທິບໍດີ Joe Biden ຈະຢ້ຽມຢາມ ອັງໂກລາ ແຕ່ວັນທີ 13-15 ຕຸລາ. ການນຳສອງປະເທດຈະປຶກສາຫາລືສົມທົບກັນໃນບັນດາບຸລິມະສິດລວມທັງການປັບປຸງຄູ່ຮ່ວມມືເສດຖະກິດ, ເພີ່ມທະວີການເຄື່ອນໄຫວກ່ຽວກັບຄວາມໝັ້ນຄົງດ້ານດິນຟ້າອາກາດ ແລະຫັນປ່ຽນພະລັງງານສະອາດ ແລະປັບປຸງສັນຕິພາບ ແລະຄວາມໝັ້ນຄົງ.
ແຫຼ່ງຄັດຈາກ: vovworld.vn