ປະຊາຊົນລາວ ຕ້ອນຮັບບຸນປີໃໝ່ຢ່າງຄຶກຄື້ນມ່ວນຊື່ນ
ກປ.ອອນໄລ - ໂດຍກົງກັບຫຼາຍປະເທດຢູ່ອາຊີຕາເວັນອອກສ່ຽງໃຕ້, ໃນລະຫວ່າງວັນທີ 13-16 ເມສາ, ປະຊາຊົນທົ່ວປະເທດລາວ ໄດ້ຈັດກິດຈະກຳຕ້ອນຮັບບຸນປີໃໝ່ລາວ ພສ 2567 ຢ່າງຄຶກຄື້ນມ່ວນຊື່ນ.
|
|
ປະຊາຊົນລາວ ເຂົ້າຮ່ວມພິທີບາສີສູ່ຂວັນ ຕ້ອນຮັບປີໃໝ່ ພສ 2567. ພາບ: ຈິ້ງຢຸງ |
ແຕ່ເຊົ້າໆຂອງວັນທີ 13 ເມສາ, ພິທີສົງນ້ຳພະໄດ້ເລີ່ມປະຕິບັດ, ຈາກນັ້ນ, ນັບແຕ່ເວລາ 12:30 ໂມງເປັນຕົ້ນໄປ, ພິທີແຫ່ພະພຸດທະຮູບ, ເຊິ່ງເປັນໜຶ່ງໃນພິທີກຳສຳຄັນຂອງການເຄື່ອນໄຫວຕ້ອນຮັບປີໃໝ່ໂດຍອໍານາດການປົຄອງນະຄອນຫຼວງວຽງຈັນ ຈັດຂຶ້ນ.
ຢູ່ຕາມວັດວາອາຮາມແຫ່ງຕ່າງໆ, ປະຊາຊົນກໍ່ສືບຕໍ່ປະຕິບັດພິທີສົງນ້ຳພະ, ຂໍພອນ, ອະທິຖານເພື່ອໃຫ້ທຸກຄົນໃນຄອບຄົວມີສຸຂະພາບແຂງແຮງ ແລະມີຄວາມສະຫງົບສຸກໃນປີໃໝ່. ພ້ອມກັນນັ້ນ, ຢູ່ຕາມຖະໜົນຫົນທາງກໍ່ໄດ້ດຳເນີນການເຄື່ອນໄຫວຫົດນ້ຳ, ອວຍພອນເຊິ່ງກັນ ແລະກັນຢ່າງຄຶກຄື້ນມ່ວນຊື່ນ.
|
|
ປະຊາຊົນລາວ ປະຕິບັດພິທີສົງນ້ຳພະຢູ່ວັດ. |
ຕາມຄວາມເຊື່ອຖືຂອງຊາວລາວ, ການຫົດນ້ຳມີຄວາມໝາຍລ້າງຄວາມໂຊກຮ້າຍ, ສິ່ງທີ່ບໍ່ດີ, ພະຍາດໂລຄາ, ການເຈັບເປັນ, ຄວາມຜິດພາດຂອງປີເກົ່າໃຫ້ໄຫຼໄປນຳປີເກົ່າ ປີໃໝ່ຮັບເອົາແຕ່ສິ່ງດີໆ, ຮັບເອົາໂຊກລາບເຂົ້າມາໃນຊີວິດ, ຜູ້ໃດຖືກຫົດນໍ້າຫຼາຍ ໃນປີໃໝ່ກໍ່ຈະພົບແຕ່ສິ່ງທີ່ດີງາມ, ມີໂຊກລາບຫຼາຍ.
ຕາມກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວລາວ ແລ້ວ ບຸນປີໃໝ່ປີນີ້ ຈະຈັດຂຶ້ນດ້ວຍຂະໜາດໃຫຍ່ຢູ່ຫຼາຍທ້ອງຖິ່ນ ແລະມີການເຄື່ອນໄຫວຫຼາຍຢ່າງ ເພື່ອຕອບສະໜອງປີທ່ອງທ່ຽວແຫ່ງຊາດລາວ 2024, ປະກອບສ່ວນຫັນເປົ້າໝາຍດຶງດູດນັກທ່ອງທ່ຽວສາກົນໃຫ້ໄດ້ປະມານ 4 ລ້ານເທື່ອຄົນ ໃຫ້ປະກົດຜົນເປັນຈິງ, ສ້າງລາຍຮັບໃຫ້ປະເທດໃນປີ 2024 ໃຫ້ໄດ້ປະມານ 1 ຕື້ໂດລາສະຫະລັດ.
|
|
ປະຊາຊົນລາວ ປະຕິບັດພິທີຫົດນ້ຳ. ພາບ: ຫ໊າຍຕຽນ |
ເນື່ອງໃນໂອກາດນີ້, ທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ ໄດ້ເນັ້ນໜັກເຖິງຄວາມໝາຍອັນດີງາມຂອງຮີດຄອງປະເພນີຕ້ອນຮັບປີໃໝ່ຂອງປະຊາຊົນລາວ; ພ້ອມກັນນັ້ນກໍ່ຍ້ອງຍໍຊົມເຊີຍປະຊາຊົນລາວບັນດາເຜົ່າທີ່ໄດ້ສາມັກຄີ, ເປັນຈິດໜຶ່ງໃຈດຽວກັນຜ່ານຜ່າທຸກຄວາມຫຍຸ້ງຍາກ, ສິ່ງທ້າທາຍ ແລະມານະພະຍາຍາມປະຕິບັດບັນດານະໂຍບາຍຂອງພັກ ກໍ່ຄືເປົ້າໝາຍຂອງແຜນພັດທະນາເສດຖະກິດ-ສັງຄົມຂອງປະເທດຊາດ.
ໂດຍ: ທະນາພອນ