ຫວຽດນາມ ເຊີດຊູບົດບາດຂອງແມ່ຍິງ ແລະຊາວໜຸ່ມໃນການສະກັດກັ້ນການປະທະກັນ
ກປ.ອອນໄລ - ວັນທີ 13 ແລະ 19 ມີນາ ຢູ່ນິວຢອກ, ອາເມລິກາ, ສະພາຄວາມໝັ້ນຄົງ ສປຊ ໄດ້ຈັດວາລະປະຊຸມປຶກສາຫາລືເປີດດ້ວຍຫົວຂໍ້ “ຊຸກຍູ້ການສະກັດກັ້ນການປະທະກັນ - ມອບສິດໃຫ້ແກ່ແມ່ຍິງ ແລະຊາວໜຸ່ມ” ພາຍໃຕ້ການເປັນປະທານຂອງ ຍີ່ປຸ່ນ, ປະເທດປະທານສະພາຄວາມໝັ້ນຄົງປະຈຳເດືອນມີນາ.
ກ່າວຄຳເຫັນທີ່ວາລະປຶກສາຫາລື, ທ່ານອຸປະທູດ ຫງວຽນຮວ່າງງວຽນ, ຮອງຫົວໜ້າຄະນະຜູ້ຕາງໜ້າຫວຽດນາມ ປະຈຳສະຫະປະຊາຊາດ ຮຽກຮ້ອງໃຫ້ສະພາຄວາມໝັ້ນຄົງຕ້ອງມີວິທີການສໍາພັດຢ່າງຮອບດ້ານ, ກວມລວມ ແລະຖືປະຊາຊົນເປັນໃຈກາງ; ເອົາໃຈໃສ່ແກ້ໄຂຕົ້ນເຫດຂອງການປະທະກັນ ເພື່ອຫຼຸດພົ້ນອອກຈາກວົງວຽນຂອງສະພາບການດ້ອຍພັດທະນາ, ຂາດຄວາມສະເໝີພາບ, ຂາດຄວາມຍຸດຕິທຳ ແລະໃຊ້ຄວາມຮຸນແຮງ.
|
|
ທ່ານອຸປະທູດ ຫງວຽນຮວ່າງງວຽນ, ຮອງຫົວໜ້າຄະນະຜູ້ຕາງໜ້າຫວຽດນາມ ປະຈຳສະຫະປະຊາຊາດ. ພາບ: ສໍານັກຂ່າວສານຫວຽດນາມ |
ທ່ານອຸປະທູດ ຫງວຽນຮວ່າງງວຽນ ກໍ່ໃຫ້ຮູ້ວ່າ, ສະພາຄວາມໝັ້ນຄົງຕ້ອງຂຸດຄົ້ນເຄື່ອງມືທີ່ມີຢູ່ແລ້ວຢ່າງມີປະສິດທິຜົນກວ່າອີກຄື: ການທູດປ້ອງກັນ, ການໄກ່ເກ່ຍ, ການແກ້ໄຂການຂັດແຍ່ງໂດຍສັນຕິວິທີ ບົນພື້ນຖານການປະຕິບັດຕາມຫຼັກການພື້ນຖານຂອງກົດໝາຍສາກົນ ແລະກົດບັດສະຫະປະຊາຊາດ; ໃຫ້ບຸລິມະສິດແກ່ການລົງທຶນຫຼາຍກວ່າອີກໃຫ້ແກ່ຄວາມມານະພະຍາຍາມສ້າງຄວາມໄວ້ວາງໃຈ ແລະກົນໄກການເຕືອນໄພລ່ວງໜ້າ.
ທ່ານ ຫງວຽນຮວ່າງງວຽນ ຢືນຢັນວ່າ ຫວຽດນາມ ໄດ້ປະຕິບັດບັນດາບາດກ້າວເດີນຢ່າງລະອຽດ ເພື່ອຍົກສູງບົດບາດນຳພາ ແລະການເຂົ້າຮ່ວມຂອງແມ່ຍິງຢູ່ທຸກຂັ້ນຄຸ້ມຄອງ; ໃຫ້ຄຳໝັ້ນສັນຍາສືບຕໍ່ເພີ່ມທະວີການເຂົ້າຮ່ວມ ແລະການປະກອບສ່ວນຂອງແມ່ຍິງຫວຽດນາມ ເຂົ້າໃນການເຄື່ອນໄຫວຮັກສາສັນຕິພາບຂອງສະຫະປະຊາຊາດ; ພ້ອມທັງ ຖືການແກ້ໄຂບັນຫາທີ່ກ່ຽວຂ້ອງກັບຊາວໜຸ່ມ ເຊັ່ນ: ການສຶກສາ, ວຽກເຮັດງານທຳ ແລະສະຫວັດດີການເປັນຂໍກຸນແຈ ເພື່ອສະກັດກັ້ນລັດທິຫົວຮຸນແຮງ, ການໃຊ້ຄວາມຮຸນແຮງ ແລະຄວາມສ່ຽງທີ່ຈະເກີດການປະທະກັນ ຫຼືກັບມາເກີດຂຶ້ນໃໝ່.
ໂດຍ: ທະນາພອນ