ຫວຽດນາມ, ລາວ, ກໍາປູເຈຍ ແບ່ງປັນບົດຮຽນກ່ຽວກັບການພັດທະນາກະສິກໍາ, ຊາວກະສິກອນ, ຊົນນະບົດ
ກປ.ອອນໄລ - ຕອນເຊົ້າວັນທີ 2 ທັນວາ, ທີ່ນະຄອນດ່າລາດ, ແຂວງເລິມດົ່ງ ໄດ້ດໍາເນີນ “ກອງປະຊຸມສໍາມະນາແບ່ງປັນບົດຮຽນກ່ຽວກັບການພັດທະນາກະສິກໍາ, ຊາວກະສິກອນ, ຊົນນະບົດ”.
ນີ້ແມ່ນກິດຈະກໍາໃນຂອບເຂດລາຍການພົບປະແລກປ່ຽນມິດຕະພາບຊາວກະສິກອນສາມປະເທດຫວຽດນາມ-ລາວ-ກໍາປູເຈຍ ໂດຍສູນກາງສະມາຄົມຊາວກະສິກອນຫວຽດນາມ ແລະຄະນະກໍາມະການປະຊາຊົນແຂວງເລິມດົ່ງ ສົມທົບກັນຈັດຕັ້ງ. ເຂົ້າຮ່ວມກອງປະຊຸມສໍາມະນາມີທ່ານນາງ ເຈືອງທິມາຍ, ກໍາມະການກົມການເມືອງ, ຫົວໜ້າຄະນະຂົນຂວາຍປະຊາຊົນສູນກາງ; ທ່ານ ຟຸ່ງກວກຫຽນ, ຮອງປະທານສະພາແຫ່ງຊາດ.
|
|
ບັນຍາກາດທີ່ກອງປະຊຸມສໍາມະນາ. ພາບ: qdnd.vn. |
ທີ່ກອງປະຊຸມສໍາມະນາ, ການນໍາກະຊວງກະສິກໍາ ແລະພັດທະນາຊົນນະບົດຫວຽດນາມ; ກະຊວງກະສິກໍາ, ປ່າໄມ້ ແລະການປະມົງລາຊະອານາຈັກກໍາປູເຈຍ; ກະຊວງກະສິກໍາ ແລະປ່າໄມ້ລາວ ໄດ້ພ້ອມກັນແບ່ງປັນຜົນງານ, ບົດຮຽນໃນການພັດທະນາກະສິກໍາ, ຊົນນະບົດ ແລະຊາວກະສິກອນພ້ອມກັບການກໍານົດທິດຂອງບັນດາປະເທດໃນການພັດທະນາກະສິກໍາ, ຊາວກະສິກອນ ແລະຊົນນະບົດ; ບົດບາດຂອງສະມາຄົມຊາວກະສິກອນຫວຽດນາມ, ປະຊາຄົມກະສິກໍາກໍາປູເຈຍ, ເຄືອຂ່າຍຊາວກະສິກອນລາວ ໃນການພັດທະນາກະສິກໍາ, ຊາວກະສິກອນ, ຊົນນະບົດ...
ບັນດາຝ່າຍພ້ອມກັນລົງນາມໃນຂໍ້ຕົກລົງຮ່ວມມືໜູນຊ່ວຍການໝູນໃຊ້ເຕັກໂນໂລຢີສູງເຂົ້າລະບົບຄວາມປອດໄພດ້ານສະບຽງອາຫານ ແລະຮັບຈໍາໜ່າຍຜະລິດຕະພັນກະເສດຂອງທັງສາມປະເທດ. ກ່ອນໜ້ານັ້ນບັນດາຜູ້ແທນໄດ້ຢ້ຽມຊົມຮູບແບບກະສິກໍາເຕັກໂນໂລຢີສູງຢູ່ບໍລິສັດດ່າລາດ Hasfarm, ບໍລິສັດດ່າລາດ Gap ແລະໝູ່ບ້ານດອກໄມ້ວ້ານແທັ່ງ (ດ່າລາດ).
ໂດຍ: ທະນາພອນ