ການປະຕິຮູບເສດຖະກິດຢ່າງແຂງແຮງພ້ອມກັບຍຸດທະສາດພັດທະນາຢ່າງເປັນລະບົບໄດ້ຊ່ວຍໃຫ້ຫວຽດນາມ ຮັກສາທ່າເຕີບໂຕທີ່ໜ້າປະທັບໃຈໃນຫຼາຍປີຜ່ານມາ. ເຖິງຢ່າງໃດກໍ່ຕາມ, ພື້ນຖານເສດຖະກິດຍັງປະເຊີນໜ້າກັບສິ່ງທ້າທາຍຫຼາຍຢ່າງຈາກສະພາບແວດລ້ອມສາກົນ, ຮຽກຮ້ອງຕ້ອງມີການຮັບມືຢ່າງມີໄຫວພິບເພື່ອຮັບປະກັນການພັດທະນາແບບຍືນຍົງໃນໄລຍະຍາວ.

ການປະຕິຮູບເພື່ອຮັກສາການເຕີບໂຕ

ບົດລາຍງານຂອງກອງທຶນເງິນຕາສາກົນ (IMF) ໄດ້ຢໍ້າຄືນຄວາມກ້າວໜ້າເຊິ່ງຫວຽດນາມ ບັນລຸໄດ້ໃນໄລຍະ 2 ທົດສະວັດຜ່ານມາ. ລາຍຮັບສະເລ່ຍຕໍ່ຫົວຄົນໄດ້ເພີ່ມຂຶ້ນຫຼາຍກວ່າ 11 ເທົ່າເມື່ອທຽບກັບປີ 2000, ສະແດງໃຫ້ເຫັນອັດຕາການເຕີບໂຕທີ່ໜ້າປະທັບໃຈ. ການປະຕິຮູບຮອບດ້ານກ່ຽວກັບຂໍ້ກຳນົດ, ການບໍລິຫານ ແລະການສຶກສາສາມາດຊ່ວຍພື້ນຖານເສດຖະກິດຍົກສູງກໍາລັງຄວາມສາມາດຕ້ານທານຕໍ່ການກະທົບໃນສະພາບການຂາດສະຖຽນລະພາບ ແລະຊ່ວຍໃຫ້ພາກເອກະຊົນກາຍເປັນຫົວຈັກທີ່ເຕີບໂຕ.

IMF ຄາດຄະເນວ່າ, ຖ້າສືບຕໍ່ປະຕິບັດການປະຕິຮູບຢ່າງຮອບດ້ານ ແລະຄົບຊຸດ, ພື້ນຖານເສດຖະກິດທີ່ພວມພັດທະນາຄືຫວຽດນາມ ອາດຈະເພີ່ມຜະລິດຕະພັນເສດຖະກິດໃນໄລຍະຍາວ, ສະເລ່ຍແຕ່ 1,5-3% ພາຍໃນ 2-4 ປີ. ເຖິງຢ່າງໃດກໍ່ຕາມ, ການຍູ້ແຮງການປະຕິຮູບໄດ້ຮຽກຮ້ອງໃຫ້ປະເທດຕ້ອງປະເຊີນໜ້າກັບສິ່ງທ້າທາຍທາງດ້ານເສດຖະກິດການເມືອງ ແລະຄວາມເຫັນດີເຫັນພ້ອມຂອງບັນດາຝ່າຍທີ່ກ່ຽວຂ້ອງ.

leftcenterrightdel
ຜະລິດເຄື່ອງຕໍ່າແຜ່ນຕັດຫຍິບສົ່ງອອກ. ພາບ: ສໍານັກຂ່າວສານຫວຽດນາມ

ຄ້າຍຄືກັນ, ບົດລາຍງານຫຼ້າສຸດຂອງທະນາຄານໂລກ (WB) ກໍ່ຍົກອອກແງ່ຫວັງທີ່ຕັ້ງໜ້າກ່ຽວກັບເສດຖະກິດຫວຽດນາມ, ດ້ວຍການຄາດຄະເນການເຕີບໂຕບັນລຸ 6,8% ໃນປີ 2025 ແລະ 6,5% ໃນປີ 2026. ສິ່ງດັ່ງກ່າວ, ມີສ່ວນໃດສ່ວນໜຶ່ງໄດ້ສ່ອງແສງໃຫ້ເຫັນກໍາລັງໜູນເຕີບໂຕຈາກການລົງທຶນຂອງລັດ, ການສົ່ງອອກ ແລະການລົງທຶນໂດຍກົງຈາກຕ່າງປະເທດ (FDI). ເຖິງຢ່າງໃດກໍ່ຕາມ, WB ຖືວ່າ ພື້ນຖານເສດຖະກິດກໍ່ຕ້ອງປະເຊີນໜ້າກັບສິ່ງທ້າທາຍຫຼາຍຢ່າງເມື່ອອີງໃສ່ການສົ່ງອອກຂະໜາດໃຫຍ່ ແລະປັດໄຈພາຍນອກ, ຄື: ການເຕີບໂຕທົ່ວໂລກຊ້າລົງ ແລະຄວາມເຄັ່ງຕຶງດ້ານການຄ້າ.

ໜຶ່ງໃນບັນດາຍຸດທະສາດສຳຄັນຊ່ວຍຫວຽດນາມ ຮັບມືກັບສິ່ງທ້າທາຍດ້ານເສດຖະກິດທົ່ວໂລກແມ່ນຍູ້ແຮງການລົງທຶນຂອງລັດ. WB ສະເໜີແນະວ່າ ຫວຽດນາມ ຄວນໝູນໃຊ້ໂອກາດທາງການເງິນເພື່ອເປີດກວ້າງການລົງທຶນດ້ານພື້ນຖານໂຄງລ່າງ, ຄົມມະນາຄົມ ແລະພະລັງງານ, ແນໃສ່ສ້າງກຳລັງໜູນການເຕີບໂຕໃນໄລຍະຍາວ ແລະຫຼຸດຜ່ອນການອີງໃສ່ການສົ່ງອອກ. ນອກຈາກນັ້ນ, ເງິນລົງທຶນໂດຍກົງຈາກຕ່າງປະເທດ (FDI) ສືບຕໍ່ແມ່ນເສົາຄໍ້າສຳຄັນຂອງພື້ນຖານເສດຖະກິດ. WB ຄາດຄະເນວ່າ FDI ເຂົ້າຫວຽດນາມ ຈະຮັກສາຢູ່ລະດັບປະມານ 25 ຕື້ໂດລາສະຫະລັດ/ປີ, ສະແດງໃຫ້ເຫັນຄວາມດຶງດູດຂອງຕະຫຼາດຫວຽດນາມ ທີ່ມີຕໍ່ນັກລົງທຶນສາກົນ.

ພ້ອມກັບ WB ແລະ IMF, ຫຼາຍອົງການຈັດຕັ້ງສາກົນ ກໍ່ໃຫ້ຄຳເຫັນຢ່າງຕັ້ງໜ້າກ່ຽວກັບເສດຖະກິດຫວຽດນາມ. ຕາມ Fibre2Fashion (ອິນເດຍ) ແລ້ວ, ຍອດຜະລິດຕະພັນພາຍໃນ (GDP) ຫວຽດນາມ ຄາດວ່າຈະເພີ່ມຂຶ້ນເກືອບ 8% ໃນໄຕມາດ 1/2025, ສ້າງພື້ນຖານເພື່ອບັນລຸເປົ້າໝາຍການເຕີບໂຕທັງປີ.

ໃນຂະນະນັ້ນ, ທະນາຄານ Standard Chartered ຄາດຄະເນວ່າ GDP ຫວຽດນາມ ຈະເພີ່ມຂຶ້ນ 6,7% ໃນປີ 2025 ແລະ 7,5% ໃນ 6 ເດືອນຕົ້ນປີ, ຍ້ອນກະແສເງິນລົງທຶນ FDI ທີ່ອຸດົມສົມບູນ, ພິເສດແມ່ນຂະແໜງການຜະລິດ ແລະອະສັງຫາລິມະຊັບ, ພ້ອມກັບການຟື້ນຟູຂອງການທ່ອງທ່ຽວ, ການເຕີບໂຕການສົ່ງອອກ ແລະການຜະລິດອຸດສາຫະກຳ.

ຄູ່ຮ່ວມມືການຄ້າເປັນໜ້າໄວ້ເນື້ອເຊື່ອໃຈ

ພ້ອມກັບການເຕີບໂຕທີ່ໜ້າປະທັບໃຈ, ຫວຽດນາມ ພວມນັບມື້ນັບຢືນຢັນທີ່ຕັ້ງຂອງຕົນໃນແຜນທີ່ການຄ້າໂລກ. ຫວ່າງມໍ່ໆມານີ້ ເວັບໄຊຂ່າວ rnz.co.nz ຂອງນິວຊີແລນ ໃຫ້ຂໍ້ສັງເກດວ່າ, ປະຈຸບັນ ຫວຽດນາມ ແມ່ນພື້ນຖານເສດຖະກິດເຕີບໂຕໄວທີ່ສຸດຢູ່ອາຊີຕາເວັນອອກສ່ຽງໃຕ້. ພິເສດ, ການຄ້າສອງສົ້ນລະຫວ່າງຫວຽດນາມ ແລະນິວຊີແລນ ບັນລຸໄດ້ 1,54 ຕື້ໂດລາສະຫະລັດ, ສະແດງໃຫ້ເຫັນຄວາມດຶງດູດຂອງຕະຫຼາດຫວຽດນາມ ສໍາລັບຜູ້ສົ່ງອອກ.

ທ່ານ Nicola Griggs ລັດຖະມົນຕີກະຊວງການຄ້າ ແລະການລົງທຶນນິວຊີແລນ ຢືນຢັນວ່າ ຜູ້ບໍລິໂພກຫວຽດນາມ ນັບມື້ນັບນິຍົມຜະລິດຕະພັນສະບຽງອາຫານ ແລະເຄື່ອງດື່ມລະດັບສູງ, ເປີດຄວາມສາມາດບົ່ມຊ້ອນອັນໃຫຍ່ຫຼວງໃຫ້ບັນດາວິສາຫະກິດນິວຊີແລນ. ນີ້ແມ່ນຕົວຢ່າງດີທີ່ສຸດກ່ຽວກັບການພື້ນຖານເສດຖະກິດເປີດປະຕູຂອງຫວຽດນາມ ພວມນຳເອົາຜົນປະໂຫຍດມາໃຫ້ທັງສອງຝ່າຍ.

ແງ່ຫວັງກາຍເປັນຕະຫຼາດທີ່ຫາກໍ່ພົ້ນເດັ່ນ

ໜຶ່ງໃນບັນດາປັດໄຈທີ່ສາມາດສ້າງການປ່ຽນແປງຂະໜາດໃຫຍ່ໃຫ້ພື້ນຖານເສດຖະກິດຫວຽດນາມ ໃນໄລຍະຈະມາເຖິງແມ່ນຄວາມສາມາດໄດ້ຍົກລະດັບຕະຫຼາດຫຼັກຊັບຈາກຕະຫຼາດແຖວໜ້າໄປສູ່ຕະຫຼາດຫາກໍ່ພົ້ນເດັ່ນໃນປີ 2025 ຕາມການຕີລາຄາຂອງ FTSE Russell. ຖ້າຫາກບັນລຸໄດ້ສິ່ງດັ່ງກ່າວ, ຫວຽດນາມ ສາມາດດຶງດູດກະແສເງິນລົງທຶນຈາກກອງທຶນລົງທຶນທົ່ວໂລກນັບມື້ນັບຫຼາຍຂຶ້ນ, ຜ່ານນັ້ນສ້າງເງື່ອນໄຂສະດວກໃຫ້ວິສາຫະກິດພາຍໃນປະເທດເຂົ້າເຖິງແຫຼ່ງທຶນ ແລະເປີດກວ້າງຂະໜາດ.

ຕາມທ່ານ Gary Harron, ຜູ້ອຳນວຍການຝ່າຍບໍລິການຫຼັກຊັບ, HSBC ຫວຽດນາມ ແລ້ວ, ໃນທົດສະວັດຜ່ານມາ, ຕະຫຼາດຫຼັກຊັບຫວຽດນາມ ໄດ້ມີການເຕີບໂຕຢ່າງແຂງແຮງ. ຫວຽດນາມ ປະຕິບັດຫຼາຍນະໂຍບາຍແນໃສ່ປັບປຸງຄຸນນະພາບຕະຫຼາດ ແລະຕອບສະໜອງມາດຖານຂອງ FTSE Russell. ການປະຕິຮູບນີ້ໄດ້ຊ່ວຍເພີ່ມທະວີຄວາມໂປ່ງໃສ, ຫຼຸດຜ່ອນຄວາມສ່ຽງ ແລະສ້າງຄວາມເຊື່ອໝັ້ນໃຫ້ນັກລົງທຶນທັງພາຍໃນ ແລະຕ່າງປະເທດ.

ເຖິງວ່າຍັງມີບາງສິ່ງກີດຂວາງກໍ່ຕາມ, ແຕ່ການປະຕິຮູບໃນປະຈຸບັນໄດ້ສະແດງໃຫ້ເຫັນວ່າ ຫວຽດນາມ ພວມມານະພະຍາຍາມເພື່ອໃຫ້ບັນລຸໄດ້ມາດຖານຕະຫຼາດຫາກໍ່ພົ້ນເດັ່ນ.

ໂດຍ: ເຈິ່ນຮວ່ຽນ