ຢູ່ເຂດວາງສະແດງກາງແຈ້ງ, Viettel ໄດ້ນໍາເອົາບັນດາເຕັກໂນໂລຊີການທະຫານ ເຊັ່ນ: ປືນໃຫຍ່ໜ້າດິນ, ປືນໃຫຍ່ປ້ອງກັນອາກາດ, ລະບົບ radar ປ້ອງກັນອາກາດ ແລະເວນຍາມທາງທະເລ, ພາຫະນະບໍ່ມີຄົນຂັບ (UAV) ແລະພາຫະນະຕ້ານ UAV ຮັບໃຊ້ການສູ້ຮົບທັນສະໄໝ, ລະບົບສື່ສານຮັກສາຄວາມລັບ, ລະບົບລູກສອນໄຟ S125 VT, ລະບົບລູກສອນໄຟ ເຈື່ອງເຊີນ.
ລະບົບປືນໃຫຍ່ຂອງ Viettel ກໍ່ໄດ້ດຶງດູດຜູ້ຊົມເປັນຈຳນວນຫຼວງຫຼາຍ. ຈຸດພົ້ນເດັ່ນທີ່ Viettel ນຳມາວາງສະແດງແມ່ນປືນໃຫຍ່ 152 ມມ ໂດຍ Viettel ຄົ້ນຄວ້າ ແລະຜະລິດ. ນີ້ແມ່ນປືນໃຫຍ່ໜ້າດິນ ໄດ້ອອກແບບມາເພື່ອຍິ່ງແບບອ້ອມດ້ວຍກຳລັງໄຟແຮງ, ເຄື່ອນໄຫວໄວ ແລະມີຄວາມສາມາດ ສະໜັບສະໜູນກຳລັງໄຟໄລຍະໄກໃຫ້ທະຫານບົກ ແລະຍານເກາະ. ປືນໃຫຍ່ປ້ອງກັນອາກາດ 57 ມມ ມີຄວາມສາມາດປ້ອງກັນຖານຮົບປ້ອງກັນອາກາດ, ສະໜາມບິນ, ທ່າເຮືອ, ໂຮງງານ ແລະຮາກຖານທີ່ສຳຄັນຈາກບັນດາເປົ້າໝາຍໂຈມຕີທາງອາກາດ ເຊັ່ນ: ເຮືອບິນ, ເຮລິຄອບເຕີ, ທະຫານໂດດຈ້ອງ, ລູກສອນໄຟ ແລະUAV.
    |
 |
|
ຜະລິດຕະພັນ “ໝາຫຸ່ນຍົນ” ຂອງກຸ່ມບໍລິສັດ Viettel ທີ່ງານວາງສະແດງ. ພາບ: qdnd.vn |
ນອກຈາກນັ້ນຍັງມີ UAV ຂັ້ນຍຸດທະສາດທີ່ປະຕິບັດໜ້າທີ່ ເຊັ່ນ: ການສອດແນມ, ການກໍານົດເປົ້າໝາຍຕາມເວລາຕົວຈິງ, ການສອດແນມເອເລັກ ໂຕຣນິກ, ການສົ່ງຕໍ່ຂໍ້ມູນ, ການບຸກໂຈມຕີເປົ້າໝາຍດ້ວຍຄວາມສາມາດຮັບນ້ຳໜັກໄດ້ຫຼາຍ. ດ້ວຍຄຸນລັກສະນະຂອງການດໍາເນີນງານຢ່າງຕໍ່ເນື່ອງໃນໄລຍະຍາວ ແລະໄລຍະການເຄື່ອນໄຫວຂະໜາດໃຫຍ່, UAV ນີ້ ມີຄວາມໂດດເດັ່ນຢູ່ທີ່ຄວາມສາມາດໃນການປະຕິບັດໜ້າທີ່ໃນຫຼາຍປະເພດ ຂອງພູມສັນຖານເຂດດິນຕໍ່ແຜ່ນ, ຊາຍແດນຈົນໄປເຖິງເຂດທະເລ, ໝູ່ເກາະ ແລະໃນສະພາບອາກາດທີ່ສັບສົນ.
ຢູ່ເຂດວາງສະແດງໃນຮົ່ມຂອງກະຊວງປ້ອງກັນປະເທດ, ບັນດາຜະລິດຕະພັນເຕັກໂນໂລຢີຂອງ Viettel ກໍ່ດຶງດູດຄວາມສົນໃຈປະຊາຊົນມາ ສຶກສາຮຽນຮູ້, ພິເສດແມ່ນຜະລິດຕະພັນ “ໝາຫຸ່ນຍົນ” ທີ່ໃຊ້ໃນການລາດຕະເວນ.
ພັນຕີ ຫງວຽນແມ້ງກຸ໋໊ຍ, ຜູ້ອໍານວຍການສູນບໍລິການຂໍ້ມູນ ແລະປັນຍາປະດິດ (Viettel AI), ກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ ໃຫ້ຮູ້ວ່າ ກົມກອງໄດ້ນໍາເອົາຜະລິດຕະພັນຫຸ່ນຍົນ 4 ຂາທີ່ມີຮູບຮ່າງ ຄ້າຍຄືໂຕໝາມາວາງສະແດງ, ສາມາດປະຕິບັດໄດ້ໃນຫຼາຍຂົງເຂດ, ໂດຍສະເພາະແມ່ນການສົ່ງເສີມຈຸດດີໃນການລາດຕະເວນ, ຄວບຄຸມ.
ຄຽງຂ້າງນັ້ນ ຍັງມີລະບົບກ້ອງຖ່າຍພາບຄວາມຮ້ອນ ແລະກ້ອງອອບຕີຄອນ, ຫຸ່ນຍົນມີຄວາມສາມາດພົບເຫັນເປົ້າໝາຍທີ່ສັງເກດເຫັນຍາກ. ເມື່ອພົບເຫັນເປົ້າໝາຍ, ຫຸ່ນຍົນຈະແຈ້ງຂໍ້ມູນໃຫ້ທັນທີ ແລະສົ່ງຮູບພາບໄປໃຫ້ສູນບັນຊາ. ຫຸ່ນຍົນດັ່ງກ່າວໄດ້ອອກແບບເພື່ອປ່ຽນແທນ ຫຼື ໜູນຊ່ວຍກໍາລັງປ້ອງກັນໃນເຂດອຸດສາຫະກໍາ, ເຂດຊຸມຊົນ, ໂຮງງານ ແລະພື້ນຖານໂຄງລ່າງທີ່ສໍາຄັນ.
ຄຽງຂ້າງບັນດາອາວຸດຍຸດໂທປະກອນທີ່ທັນສະໄໝ, Viettel ຍັງແນະນຳບັນດາຜະລິດຕະພັນເຕັກໂນໂລຢີດີຈີຕອນ, ໃນນັ້ນມີສະຖານີຮັບ-ສົ່ງສັນຍານໂທລະສັບມືຖື 5G; ຕົວເມືອງອັດສະລິຍະ, ໂຮງງານອັດສະລິຍະ; ລະບົບຄວາມປອດໄພຂໍ້ມູນຂ່າວສານ, ການຫັນເປັນດີຈີຕອນໃນຕົວເມືອງ ແລະຜູ້ຊ່ວຍເໝືອນຈິງ. ບັນດາຜະລິດຕະພັນຊຸດນີ້ ສະແດງໃຫ້ເຫັນບົດບາດນໍາໜ້າຂອງ Viettel ໃນການສ້າງສັງຄົມດີຈີຕອນ, ສະໜອງພື້ນຖານໂຄງລ່າງໃຫ້ແກ່ການຫັນເປັນດີຈີຕອນດ້ວຍການເຊື່ອມຕໍ່ 5G ແລະບັນດາແອັບ, ມາດຕະການໃນທຸກດ້ານຂອງຊີວິດສັງຄົມ.
ໂດຍ: ໄຊຊະນະ