ເລັ່ງອະນາໄມເສັ້ນທາງ ແລະໂຮງຮຽນ
ຫຼັງພາຍຸ, ຖະໜົນຫຼາຍສາຍຢູ່ແຂວງຮ່າຕິ້ງ ແລະເງະອານ ມີຕົ້ນໄມ້ຫັກ, ເສົາໄຟຟ້າຖືກທຳລາຍ, ສັງກະສີກະແຈກກະຈາຍຢູ່ທົ່ວທຸກແຫ່ງ. ຫຼັງຄາເຮືອນຫຼາຍຫຼັງໄດ້ເພີກອອກເຫຼືອແຕ່ໂຄງເປົ່າ. ຖະໜົນຫົນທາງທີ່ເຄີຍຄຶກຄັກມາປະຈຸບັນແມ່ນເຕັມໄປດ້ວຍໃບໄມ້ ແລະ ກະເບື້ອງທີ່ແຕກຫັກ. ຫຼາຍທ້ອງຖິ່ນ, ຫຼາຍຄອບຄົວໄດ້ຮັບຄວາມເສຍຫາຍຢ່າງໜັກໜ່ວງກ່ຽວກັບຊັບສິນ...
ຕອນເຊົ້າວັນທີ 26 ສິງຫາ, ທ່ານ ເຈິ່ນຮົ່ງຮ່າ ຮອງນາຍົກລັດຖະມົນຕີຫວຽດນາມ ແລະຄະນະປະຕິບັດງານສູນກາງ ພ້ອມກັບທະຫານເຂດ 4 ໄດ້ໄປຮອດແຂວງຮ່າຕິ້ງ ເພື່ອກວດກາສະພາບການພາຍຫຼັງພາຍຸພັດຜ່ານ ແລະຢ້ຽມຢາມຖາມຂ່າວ, ລະດົມກໍາລັງໃຈພໍ່ແມ່ປະຊາຊົນຢູ່ຕາແສງລົກຮ່າ. ໄປຢ້ຽມຢາມບາງຄອບຄົວທີ່ຖືກພາຍຸພັດເອົາເຮືອນໄປ, ທ່ານ ເຈິ່ນຮົ່ງຮ່າ ໄດ້ແບ່ງປັນຄວາມຫຍຸ້ງຍາກ ແລະຮຽກຮ້ອງໃຫ້ອຳນາດການປົກຄອງທ້ອງຖິ່ນ ຈົ່ງຊ່ວຍປະຊາຊົນສ້ອມແປງເຮືອນຊານໃຫ້ມີຄວາມປອດໄພໃນການດຳລົງຊີວິດໂດຍໄວ. ທີ່ໂຮງຮຽນອະນຸບານ ງາລົກ ກໍ່ໄດ້ຮັບຄວາມເສຍຫາຍຢ່າງໜັກໜ່ວງເຊັ່ນດຽວກັນ, ທ່ານຮອງນາຍົກລັດຖະມົນຕີ ເນັ້ນໜັກວ່າ ຕ້ອງໄດ້ໃຫ້ບຸລິມະສິດໃນການສ້ອມແປງໂຮງຮຽນ, ສຸກສາລາ, ຮັບປະກັນໃຫ້ນັກຮຽນໄດ້ກັບຄືນມາຮຽນໂດຍໄວ ແລະປະຊາຊົນໄດ້ຮັບການສົ່ງເສີມສຸຂະພາບຢ່າງພຽງພໍ. ທ່ານຮອງນາຍົກລັດຖະມົນຕີ ກໍ່ຮຽກຮ້ອງໃຫ້ທ້ອງຖິ່ນກຳແໜ້ນສະພາບການ, ກວດກາຄືນທຸກກໍລະນີທີ່ໄດ້ຮັບຄວາມເສຍຫາຍ, ພິເສດແມ່ນບັນດາຄອບຄົວທີ່ປະສົບກັບຄວາມຫຍຸ້ງຍາກ, ສະເໜີໃຫ້ມີການໜູນຊ່ວຍຢ່າງທັນການ, ຖືກຕ້ອງຕາມເປົ້າໝາຍ.
    |
 |
|
ທ່ານ ເຈິ່ນຮົ່ງຮ່າ ຮອງນາຍົກລັດຖະມົນຕີຫວຽດນາມ ພ້ອມດ້ວຍການນຳທະຫານເຂດ 4 ລົງຢ້ຽມຢາມຖາມຂ່າວ, ລະດົມກໍາລັງໃຈບັນດາຄອບຄົວຢູ່ຕາແສງລົກຮ່າ (ແຂວງຮ່າຕິ້ງ) ທີ່ຖືກເສຍຫາຍຢ່າງໜັກໜ່ວງຈາກພາຍຸ. ພາບ: ຮວ່າງທ໊າຍ |
ຕອນຄໍ່າວັນທີ 25 ສິງຫາ, ເມື່ອພາຍຸໄດ້ອ່ອນກຳລັງລົງ, ກອງບັນຊາການທະຫານແຂວງເງະອານ ໄດ້ລະດົມພະນັກງານ, ນັກຮົບ 1.500 ກວ່າຄົນ, ພ້ອມກັບກໍາລັງທະຫານລາດຢູ່ບັນດາຕາແສງໄດ້ລົງໄປຖະໜົນທຸກສາຍ, ເຂດຊຸມຊົນເພື່ອຊ່ວຍອະນາໄມເກັບມ້ຽນຕົ້ນໄມ້ທີ່ຫັກພັງ ແລະເປີດເສັ້ນທາງຕົ້ນຕໍໃຫ້ແກ່ການສັນຈອນໃນຕອນກາງຄືນ. ຕອນເຊົ້າວັນທີ 26 ສິງຫາ, ກອງບັນຊາການທະຫານແຂວງເງະອານ ສືບຕໍ່ລະດົມພະນັກງານ, ນັກຮົບນັບຮ້ອຍຄົນໄປຊ່ວຍເຫຼືອປະຊາຊົນຢູ່ເຂດຖືກເສຍຫາຍຢ່າງໜັກໜ່ວງເພື່ອແກ້ໄຂຜົນຮ້າຍຢ້ອນຫຼັງ. ຢູ່ບັນດາຕາແສງແທັ່ງວີງ, ເຈື່ອງວີງ... ມີຕົ້ນໄມ້ໃຫຍ່ຫຼາຍຕົ້ນລົ້ມ, ຫັກ; ພະນັກງານ, ນັກຮົບຈໍານວນ 50 ກວ່າຄົນຂອງກອງພັນໃຫຍ່ 764 ຂຶ້ນກັບກອງບັນຊາການທະຫານແຂວງ ໄດ້ມ້ຽນມັດອະນາໄມຢ່າງຮີບດ່ວນ. ທ່ານ ຫວູແອັງຕ່າຍ, ຮອງຫົວໜ້າໜ່ວຍບໍລິການເລກ 2, ສັງກັດຫ້ອງການພະລັງງານໄຟຟ້າແຂວງເງະອານ ທີ່ມາເຮັດວຽກກັບທະຫານໄດ້ແບ່ງປັນວ່າ: “ຍ້ອນມີການຊ່ວຍເຫຼືອຂອງພະນັກງານ, ນັກຮົບກອງບັນຊາການທະຫານແຂວງເງະອານ, ຕົ້ນໄມ້, ງ່າໄມ້ທີ່ຫັກຕົກມາຄ້າງຢູ່ກັບສາຍໄຟຟ້າ ຈຶ່ງໄດ້ຮັບການແກ້ໄຂຢ່າງວ່ອງໄວ, ທະຫານປະຕິບັດໜ້າທີ່ໄດ້ຮັບຜົນດີທີ່ສຸດ, ຊ່ວຍພວກຂ້າພະເຈົ້າແກ້ໄຂຄວາມເສຍຫາຍຂອງຕາຂ່າຍໄຟຟ້າໄດ້ຢ່າງວ່ອງໄວ”.
|
|
 |
|
ພະນັກງານ, ນັກຮົບກອງພັນໃຫຍ່ 764 ຂຶ້ນກັບກອງບັນຊາການທະຫານແຂວງເງະອານ ອະນາໄມຕົ້ນໄມ້ທີ່ລົ້ມຕາມເສັ້ນທາງຕ່າງໆ. ພາບ: ແອັງເຕິ່ນ |
ບັນຊາກຳລັງຢູ່ຈຸດເກີດເຫດໂດຍກົງ, ທ່ານພັນເອກ ຫງວຽນຈ້ອງດຶກ ຮອງຫົວໜ້າເສນາທິການກອງບັນຊາການທະຫານແຂວງເງະອານ ໃຫ້ຮູ້ວ່າ: “ກຳລັງຕ່າງໆໄດ້ແບ່ງອອກເປັນ 4 ໜ່ວຍ, ເພື່ອສຸມໃສ່ແກ້ໄຂບັນຫາເສັ້ນທາງເປັນຫຼັກ, ນອກຈາກກຳລັງນີ້ແລ້ວ, ກອງບັນຊາການທະຫານແຂວງເງະອານ ຍັງໄດ້ຊີ້ນຳບັນດາກົມກອງທີ່ຂຶ້ນກັບ, ກອງບັນຊາການປ້ອງກັນເຂດ ຈັດຕັ້ງກໍາລັງຢູ່ກັບທີ່ເພື່ອໜູນຊ່ວຍທ້ອງຖິ່ນແກ້ໄຂຜົນຮ້າຍຢ້ອນຫຼັງຈາກພາຍຸ”.
ແລ່ນນໍ້າຖ້ວມໃນພາຍຸ
ພາຍຸລູກທີ 5 ມາພ້ອມກັບຝົນຕົກໜັກເຮັດໃຫ້ຫຼາຍເຂດໃນບໍລິເວນທາງທິດຕາເວັນຕົກຂອງແຂວງເງະອານ ຖືກນໍ້າຖ້ວມ, ເຮັດໃຫ້ການສັນຈອນຕິດຂັດຢ່າງຮ້າຍແຮງຢູ່ເສັ້ນທາງທີ່ຂຶ້ນກັບຕາແສງກຸ່ຍເຈົາ, ເຈົາຕ໊ຽນ, ເຈົ້າລົກ, ຕ່ຽນຟອງ... ກອງບັນຊາການປ້ອງກັນເຂດ 3-ກຸ່ຍເຈົາ ໄດ້ລະດົມພະນັກງານ, ນັກຮົບ 50 ຄົນ, ທະຫານລາດ 728 ຄົນພ້ອມດ້ວຍພາຫະນະຫຼາຍຄັນເພື່ອເກັບມ້ຽນຕົ້ນໄມ້ທີ່ລົ້ມ, ຫັກ, ເຮັດອະນາໄມເສັ້ນທາງ, ພ້ອມທັງຍົກຍ້າຍປະຊາຊົນອອກຈາກເຂດອັນຕະລາຍ 417 ຄອບຄົວ, ມີ 1.476 ຄົນ.
|
|
 |
|
ກໍາລັງກອງບັນຊາການທະຫານແຂວງຮ່າຕິ້ງ ຊ່ວຍໂຮງຮຽນແຫ່ງຕ່າງໆ ແກ້ໄຂຜົນຮ້າຍຢ້ອນຫຼັງຈາກພາຍຸ. ພາບ: ເຢືອງຮວ່າງ |
ຢູ່ແຂວງແທັງຮວ໊າ, ຝົນຕົກໜັກຕະຫຼອດຄືນຈົນຮອດຮຸ່ງເຊົ້າ, ນັບທັງຕົວເມືອງຈົນໄປຮອດໝູ່ບ້ານຕ່າງໆລ້ວນແຕ່ຖືກນ້ຳຖ້ວມ. ຕອນເຊົ້າວັນທີ 26 ສິງຫາ, ກອງບັນຊາການປ້ອງກັນພົນລະເຮືອນແຂວງແທັງຮວ໊າ ມີໂທລະເລກເຕືອນໄພຢູ່ບັນດາແມ່ນ້ຳໃຫຍ່ຢ່າງຕໍ່ເນື່ອງ ຄື: ແມ່ນ້ຳມາ, ແມ່ນ້ຳຈູ, ແມ່ນ້ຳແລ່ນ, ແມ່ນ້ຳເບື໋ອຍ... ນໍ້າໃນແມ່ນໍ້າໄດ້ເພີ່ມຂຶ້ນຢ່າງວ່ອງໄວໃນຕອນກາງຄືນ, ເຮັດໃຫ້ປະຊາຊົນນັບພັນຄອບຄົວທີ່ດຳລົງຊີວິດຢູ່ນອກຄັນຄູ ແລະເຂດຕໍ່າຖືກນ້ຳຖ້ວມຈົນໝົດ. ທ່ານ ເຈິ່ນຊວນຊື້, ເລຂາໜ່ວຍພັກ ທັງເປັນນາຍບ້ານບັ໊ກຕ໊ຽນ, ຢູ່ຕາແສງທໍ້ຊວນ ໃຫ້ຮູ້ວ່າ: “ໃນຕະຫຼອດຄືນທີ່ຜ່ານມາ, ບັນດາກຳລັງຢູ່ກັບທີ່ຂອງທ້ອງຖິ່ນໄດ້ຈັດຕັ້ງເວນຍາມ, ຈົນຮອດເວລາ 4 ໂມງເຊົ້າ, ເຫັນວ່າ ນ້ຳອາດຈະຖ້ວມເຮືອນຂອງຄອບຄົວທີ່ຢູ່ນອກຄັນຄູແມ່ນໍ້າຈູ, ສະນັ້ນ ພວກຂ້າພະເຈົ້າ ຈຶ່ງໄດ້ຈັດຕັ້ງການຍົກຍ້າຍປະຊາຊົນ, ໃຫ້ບຸລິມະສິດຊ່ວຍບັນດາຄອບຄົວເປົ້າໝາຍນະໂຍບາຍ, ຊ່ວຍຄອບຄົວຍົກຍ້າຍເຄື່ອງ, ວັດຖຸສິ່ງຂອງຊັບສິນໄປຢູ່ບ່ອນສູງ, ຊ່ວຍຍົກຍ້າຍປະຊາຊົນເກືອບ 400 ຄົນ ໄປຢູ່ນຳເຮືອນປະຊາຊົນທີ່ແໜ້ນໜາຖາວອນຢູ່ຟາກໃນຄັນຄູຊົ່ວຄາວ”.
ຮອດເວລາ 17 ໂມງ ວັນທີ 26 ສິງຫາ, ທົ່ວແຂວງແທັງຮວ໊າ ໄດ້ມີເກືອບ 4.000 ຄອບຄົວ, ດ້ວຍ 14.000 ກວ່າຄົນຖືກຍົກຍ້າຍໄປຢູ່ສະຖານທີ່ປອດໄພ. ໃນນັ້ນ ຢູ່ເຂດພູດອຍມີ 1.000 ກວ່າຄອບຄົວ, ປະຊາຊົນເກືອບ 4.500 ຄົນ ຕ້ອງໄດ້ຍົກຍ້າຍອອກຈາກເຂດທີ່ມີຄວາມສ່ຽງອາດຈະເກີດດິນເຊາະເຈື່ອນ ແລະຖືກນ້ຳຖ້ວມ. ທ່ານພັນເອກພິເສດ ຫງວຽນຈ້ອງຍິ ຮອງຫົວໜ້າການທະຫານ, ຫົວໜ້າເສນາທິການກອງບັນຊາການທະຫານແຂວງແທັງຮວ໊າ ໃຫ້ຮູ້ວ່າ: “ພວກຂ້າພະເຈົ້າ ໄດ້ສົມທົບກັນຢ່າງແໜ້ນແຟ້ນກັບກຳລັງຕ່າງໆຈັດຕັ້ງ, ແນະນຳສະພາບການສັນຈອນ, ສົ່ງຄົນໄປເວນຍາມ, ປັກທຸ່ນ, ເຮັດຮົ້ວ, ຕັ້ງປ້າຍເຕືອນຢູ່ຕາມເສັ້ນທາງບ່ອນທີ່ຖືກນ້ຳຖ້ວມເລິກ, ນໍ້າຖ້ວມຂັງ, ບ່ອນດິນເຈື່ອນ, ເດັດຂາດບໍ່ໃຫ້ປະຊາຊົນ ແລະພາຫະນະໄປຜ່ານບ່ອນທີ່ອັນຕະລາຍ, ພ້ອມທັງສະເໜີວິທີຮັບປະກັນການສັນຈອນທີ່ປອດໄພ”.
ຢູ່ແຂວງກວ໋າງຈິ, ໃນຕອນກາງຄືນວັນທີ 25 ສິງຫາ ແລະຕອນເຊົ້າວັນທີ 26 ສິງຫາ, ບັນດາກົມກອງທະຫານຊາຍແດນ ໄດ້ນຳເອົາເຄື່ອງໃຊ້ທີ່ຈຳເປັນໄປຊ່ວຍເຫຼືອປະຊາຊົນ 1.500 ກວ່າຄົນທີ່ພວມຫຼີກລ້ຽງພາຍຸ. ເສັ້ນທາງເຂົ້າບ້ານກົ່ນຣວ່າງ (ຕາແສງເທື້ອງແຈັກ) ຖືກນໍ້າຖ້ວມຕັດຂາດຈາກພາຍນອກ, ພະນັກງານ, ນັກຮົບ 10 ຄົນ ຕ້ອງໄດ້ລຸຍນໍ້າເປັນເວລາຫຼາຍຊົ່ວໂມງ ເພື່ອນຳເອົາມີ່ໄວໄວ 80 ແກັດ, ເຂົ້າສານ 100 ກິໂລ ແລະອາຫານທີ່ຈຳເປັນໄປໃຫ້ປະຊາຊົນ. ບັນດາຄ້າຍທະຫານຊາຍແດນ ຄື: ຈາລໍ, ລ່າງຮໍ, ກ່າແຊ່ງ, ຣາໄມ, ຣ່ອນ... ກໍ່ໄດ້ສົ່ງກຳລັງໄປຍັງບ່ອນປະຊາຊົນຫຼີກລ້ຽງພາຍຸແຕ່ລະແຫ່ງ, ກວດສຸຂະພາບ ແລະແຈກຢາຍອາຫານໃຫ້ປະຊາຊົນ.
ໂດຍ: ເຈິ່ນຮວ່ຽນ