ນາຍົກລັດຖະມົນຕີ ຟ້າມມິງຈິ໊ງ: “ປີ 2025 ຕ້ອງກໍ່ສ້າງເສັ້ນທາງດ່ວນສຳເລັດຢ່າງໜ້ອຍສຸດ 3.000 ກິໂລແມັດ”
“ປີ 2025 ຕ້ອງກໍ່ສ້າງເສັ້ນທາງດ່ວນສຳເລັດຢ່າງໜ້ອຍສຸດ 3.000 ກິໂລແມັດ ຢ່າງເດັດຂາດ, ດ້ວຍຄວາມຕັດສິນໃຈ ແລະຄວາມຮັບຜິດຊອບສູງສຸດ”. ນີ້ແມ່ນຄຳເນັ້ນໜັກຂອງທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໃນກອງປະຊຸມສະຫຼຸບການຈັດຕັ້ງປະຕິບັດວຽກງານ 6 ເດືອນຕົ້ນປີ 2025 ຂອງຄະນະຊີ້ນຳແຫ່ງລັດກ່ຽວກັບກິດຈະກຳ, ໂຄງການສຳຄັນລະດັບຊາດ, ກິດຈະກຳຈຸດສຸມຂະແໜງຄົມມະນາຄົມຂົນສົ່ງ ແລະສະຫຼຸບການແຂ່ງຂັນຍອດສູງ ພາຍໃຕ້ຫົວຂໍ້ “500 ວັນ ແລະຄືນ ແຂ່ງຂັນກໍ່ສ້າງເສັ້ນທາງດ່ວນສຳເລັດ 3000 ກິໂລແມັດ” ເຊິ່ງໄດ້ດຳເນີນໃນຕອນເຊົ້າວັນທີ 31 ກໍລະກົດ ຢູ່ຮ່າໂນ້ຍ.
    |
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ກ່າວຄຳເຫັນທີ່ກອງປະຊຸມ. ພາບ: baochinhphu.vn |
ເມື່ອກ່າວຄຳເຫັນທີ່ກອງປະຊຸມ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ຊີ້ແຈ້ງວ່າ ນັບແຕ່ນີ້ຮອດທ້າຍປີ ຍັງເຫຼືອພຽງແຕ່ 5 ເດືອນ, ປະລິມານວຽກງານຍັງຫຼາຍ, ໃນຂະນະນັ້ນ ຄຳຮຽກຮ້ອງໄດ້ວາງອອກແມ່ນພື້ນຖານໂຄງລ່າງຕ້ອງໄປກ່ອນ, ເປີດທາງ, ເປັນພື້ນຖານ, ສ້າງປະຖົມປັດໄຈໃຫ້ແກ່ບັນດາຂະແໜງການ, ທ້ອງຖິ່ນ, ສ້າງກຳລັງໜູນໃໝ່ໃຫ້ແກ່ປະເທດຊາດ, ເປີດພື້ນທີ່ພັດທະນາໃໝ່, ເພີ່ມກຳລັງແກ່ງແຍ້ງຂອງຜະລິດຕະພັນພາຍໃນປະເທດ ແລະສາກົນ, ພິເສດໃນສະພາບການທົ່ວປະເທດຫາກໍ່ປະຕິບັດ 1 ເດືອນ ຂອງການດຳເນີນຮູບແບບອຳນາດການປົກຄອງທ້ອງຖິ່ນ 2 ຂັ້ນສຳເລັດ. ດັ່ງນັ້ນ, ທ່ານນາຍົກລັດຖະມົນຕີ ຟ້າມມິງຈິ໊ງ ສະເໜີວ່າ: “ນັບແຕ່ນີ້ຮອດທ້າຍປີ 2025, ຕ້ອງກໍ່ສ້າງເສັ້ນທາງດ່ວນສຳເລັດຢ່າງໜ້ອຍສຸດ 3.000 ກິໂລແມັດ ທາງດ່ວນ ຢ່າງເດັດຂາດ, ນີ້ແມ່ນເປົ້າໝາຍຂອງກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຫວຽດນາມ ໄດ້ວາງອອກ. ຍ້ອນຄຸນລັກສະນະ ແລະຄວາມໝາຍຂອງໜ້າທີ່, ພວກເຮົາຖືນີ້ແມ່ນ ຄຳສັ່ງຈາກຫົວໃຈ ແລະຈິດໃຈຄວາມຮັບຜິດຊອບອັນສູງສຸດທີ່ມີຕໍ່ນ້ຳໃຈຂອງການປະຕິວັດເດືອນສິງຫາ”.
ແຫຼ່ງຄັດຈາກ: vovworld.vn