ປະຊາຄົມຊາວຫວຽດນາມ ຢູ່ ສ.ເກົາຫຼີ ເພີ່ມທະວີຄວາມສະໜິດຕິດພັນ
ກປ.ອອນໄລ - ວັນທີ 26 ກໍລະກົດ, ຢູ່ມະຫາວິທະຍາໄລ Changshin, ນະຄອນ Changwon, ແຂວງ Gyeongsang ໃຕ້, ສະມາຄົມຊາວຫວຽດນາມ ຢູ່ Gyeongnam ໄດ້ສະເໜີຕົວເປັນທາງການໃນພິທີເຕັມໄປດ້ວຍຄວາມສົມກຽດ, ອົບອຸ່ນ, ດຶງດູດຍາດຕິພີ່ນ້ອງຊາວຫວຽດນາມ ຢູ່ຕ່າງປະເທດ ແລະບັນດາແຂກຜູ້ມີກຽດທີ່ມາຈາກອໍານາດການປົກຄອງ, ອົງການຈັດຕັ້ງຂອງ ສ.ເກົາຫຼີ ແລະ ຫວຽດນາມ ເປັນຈໍານວນຫຼວງຫຼາຍ.
ທ່ານ ຮວ່າງຄັກຢາງ, ປະທານສະມາຄົມຫວຽດນາມ ຢູ່ Gyeongnam ໄດ້ກ່າວຄຳປາໄສຢ່າງເລິກເຊິ່ງກ່ຽວກັບເຫດຜົນຂອງການສ້າງຕັ້ງສະມາຄົມ. ທ່ານເນັ້ນໜັກເຖິງຄວາມມຸ່ງມາດປາດຖະໜາຢາກຮັດແໜ້ນນໍ້າໃຈສາມັກຄີ, ເພີ່ມທະວີການໜູນຊ່ວຍເຊິ່ງກັນ ແລະກັນໃນປະຊາຄົມ, ພ້ອມທັງຮັກສາ ແລະແຜ່ຂະຫຍາຍບັນດາຄຸນຄ່າວັດທະນະທຳຂອງຊາດ.
    |
 |
|
ບັນດາຜູ້ແທນ ແລະແຂກຖືກເຊີນຖ່າຍຮູບເປັນທີ່ລະນຶກ. ພາບ: ສໍານັກຂ່າວສານຫວຽດນາມ. |
ຕາງໜ້າໃຫ້ຝ່າຍຫວຽດນາມ, ທ່ານ ຫງວຽນແທງຮຸ່ງ, ຮອງຫົວໜ້າສະຖານກົງສຸນໃຫຍ່ຫວຽດນາມ ປະຈຳ Busan ໄດ້ກ່າວຄຳປາໄສຊົມເຊີຍ, ຢືນຢັນເຖິງການສະໜັບສະໜູນຂອງສະຖານກົງສຸນໃຫຍ່ໃຫ້ສະມາຄົມ. ນອກຈາກນັ້ນ, ແຂກຜູ້ມີກຽດຈາກ ສ.ເກົາຫຼີ ຍັງໄດ້ສົ່ງຄຳອວຍພອນອັນດີງາມ, ລະດົມກໍາລັງໃຈໃຫ້ສະມາຄົມສືບຕໍ່ກ້າວໄປໜ້າ.
ເລື່ອງສ້າງຕັ້ງສະມາຄົມຊາວຫວຽດນາມ ຢູ່ Gyeongnam ຈະແມ່ນຂົວເຊື່ອມຕໍ່ທີ່ໝັ້ນຄົງ, ຊ່ວຍໃຫ້ປະຊາຄົມຊາວຫວຽດນາມ ຢູ່ທີ່ນີ້ນັບມື້ນັບພັດທະນາ, ສາມັກຄີ ແລະເຊື່ອມໂຍງເຂົ້າກັບສັງຄົມຂອງ ສ.ເກົາຫຼີ ຢ່າງເລິກເຊິ່ງກ່ວາອີກ, ພ້ອມທັງຮັກສາ ແລະເສີມຂະຫຍາຍລັກສະນະສະເພາະວັດທະນະທຳຂອງປະເທດຫວຽດນາມ.
ໂດຍ: ຈາງຫງວຽນ